Yesaya 2
2
Cheruzgu cha paku Yuda ndi Yerusalemu
(Mika 4.1-3)
1Mazu gho Yesaya mwana waku Amozi wanguvwa gha paku Yuda ndi Yerusalemu.
2Ghazamufiskika mu mazuŵa gha pavuli
kuti phiri la nyumba ya Ambuya
lazamchitika kuŵa litali kwakuruska mapiri ghanyake,
ndipo lazamtumphuskika pachanya pa mithuthu;
ndipo makhamu ghose ghazamuwungana kwaku lo,
3ndipo ŵanthu ŵanandi ŵakazanga ŵakatinge:
“Zaninga, tikweriyenge ku phiri la Ambuya,
ku nyumba yaku Chiuta waku Yakobe,
alinga watisambizge nthowa zake,
ndi kuti ifwe tendenge mu tunthowa twake.”
Pakuti dangu likatuwanga mu Zioni,
ndi mazu gha Ambuya, ghakatuwanga mu Yerusalemu.
4Weruzgenge pakati pa makhamu,
wazamujarika umampha ŵanthu ŵanandi,
ndipo ŵazamsula malipanga ghawo kuŵa vyakulimiya,
ndi mikondo yawo kuŵa vimayi vyakupanthiya;
mtundu kuti wazamsoske lipanga pa mtundu cha;
chingana nkhusambira so nkhondo nako cha.
5Wa nyumba yaku Yakobe we, zanga,
tiye tendenge mu ukweru wa Ambuya.
6Pakuti imwe mwajowo ŵanthu ŵinu nyumba yaku Yakobe,
chifukwa ŵazazika ndi ŵavyanusi ŵakutuwa ku vuma,
ndi ŵakuwukwa uli mba ŵa Filisti,
ndipo ŵazomerezgana ndi ŵalendo.
7Charu chawo chazazika siliva ndi golide,
ndipo mu mbiku zawo mulivi umari;
charu chawo chazazika ndi ŵakavalo,
ndipo magareta ghawo kuti ghamara cha.
8Charu chawo chazaza ŵangoza,
ŵaŵeramiya pasi mitu yawo kunchitu za manja ghawo,
kwaku cho minwe yaŵeneko yachita.
9Viyo munthu wajiyuyuwa ndipo ŵanthu ŵawere pasi,
ungaŵagowoke cha!
10Sereni mu jarawe, bisamani mu fuvu,
kutuwako ku kofya kwa Ambuya,
ndi ku unkhankhu wa ukaronga wake.
11Mawonekedu ghakujikuzga gha munthu ghakasiskikiyanga pasi,
ndi kujikuzga kwa ŵanthu kukasiskikanga,
ndipo Ambuya pe ŵija akakuzgikanga mu zuŵa lo.
12Pakuti Ambuya ŵa maŵanja ŵendi zuŵa lakumikana ndi wose wo
mbakujikuzga ndi akujikwezga,
lakumikana ndi wo ŵakukwezgeka wo ŵe pachanya,
13lakumikana ndi miti ya milanji yaku Lebanoni,
yakujikuzga ndi yakukwezgeka pachanya lakumikana ndi miti ya mkundi yaku Bashani,
14kumikana ndi mapiri ghose ghatalighatali,
ndi kumikana ndi mitunthu yose yakujikuzga;
15kumikana ndi chitanthali chose chitali,
ndi kumikana ndi chimati chose cha malinga;
16kumikana ndi ngaraŵa zose zaku Tarshishi,
ndi kumikana ndi vyakusema-sema vyose vya manyanda.
17Kujikuzga kwa munthu kukabwanthukiyanga pasi,
ndipo kujikuzga kwa ŵanthu kukasiskikiyanga pasi,
ndipo Ambuya pe ŵija ŵakakuzgikanga mu zuŵa lo.
18Ndipo ŵangoza ŵakamaranga, kujako so cha.
19Ŵanthu ŵazamusere mu zimphanji za majarawe
ndi mazenje gha pasi,
kuthaŵa ku chofyu cha Ambuya ndi ku unkhankhu wa ukaronga wake,
penipo akasokanga kofya charu chapasi.
20Mu zuŵa liya ŵanthu ŵakatayanga ŵangoza ŵawo
ŵa siliva ndi ŵangoza ŵawo ŵa golide,
ŵeniwo ŵangujichitiya kuŵasopa,
ku ŵakalulu ndi ŵakasusa,
21kusere mu zimphanji zitali zamajarawe
ndi malijengwajengwa gha masendemu,
kutuwako ku chofyu cha Ambuya,
ndi ku unkhankhu wa ukaronga wawo,
penipo akasokanga kofya charu chapasi.
22Tuwako ku munthu mweniyo mumphunu zake mwe mvuchi,
pakuti iyo njani nayo?
Bible Society of Malawi