ŴaHebere 6

1Viyo pakusiya mazu ghakutendeka gho ghaku Kristu, titinthimikiye ku mfisku wo; kujarika so cha chiŵanja cha chipe cha kutuwako ku nchitu zakufwa, ndi cha chivwanu chamwaku Chiuta, 2cha sambizgu la vibatizo, ndi cha chiŵika cha manja, ndi cha chiyuka cha ŵakufwa, ndi cha cheruzgu chamuyaya. 3Ndipo tikachitanga chenichi, asani Chiuta wazomera. 4Chifukwa kuchiri kwaku ŵeniwo ŵangweruskika kali, ndi ŵangulaŵa mpasku wakuchanya, ndipo ŵangusangana mu Mzimu Wakupaturika, 5ndi ŵangwesa nkhani yamampha yaku Chiuta, ndi so nthazi za mgonezi wo ukazanga, 6ndipo mbakudezukako, nkhwakutondeka kuŵawerezge so ku chipe; mwakuti ŵajipayikiya so Mwana yo waku Chiuta, ndi kumlengeska pakweru. 7Chifukwa charu cho chamwa vuwa yo yingi'yangi'ya pake panandi, ndi nchakume sungwi zakwenere ŵeniwo chiŵalimikiya, chironde chitumbiku kutuwa kwaku Chiuta: 8kweni cho nchakume minga ndi ŵakankhandi, nchakupatika ndipo che pafupi kutembeka; kamaridu kaku chenicho nkhocheka.

9Kweni, mwaŵakwanjiwa, titoŵeke ndi imwe vyamamphako ndi vyakuyana ndi utaski, chingana tikamba viyo. 10Chifukwa kuti Chiuta ngwambura urunji cha kuruwa nchitu yinu ndi chanju cho mungurongole zina lake, po munguteŵete ŵakupaturika wo, ndi muchaŵateŵete. 11Ndipo tinweka kuti munthu yose waku imwe warongonge phamphu lenilo pe ku uzali wa chigomekezgu mpaka ku umari: 12alinga mungaŵanga ŵakudodoma cha, kweni ŵakwezga ŵeniwo mu chivwanu ndi unkhunthiya mbakuhara mapanganu.

Phanganu lakuneneska laku Chiuta

13Chifukwa Chiuta, wachipangana ndi Abrahamu (penipo wengavi kuziŵa kumrapiya ndi muraku), wangurapa ndi yija, wakuti, 14“Nadidi kutumbika ndikutumbikenge, ndi kwandaniska ndikwandaniskenge.” 15Ndipo viyo wanguti wakunthiyapo, wangufikapo pa phanganu lo. 16Chifukwa ŵanthu ŵarapiya muraku ndipo rapu lakwachikhozge liŵamariya suskano yose. 17Nako viyo chiuta, pakukhumba kurongole limu ku ŵakulihara phanganu uwura masinthika wa chipangu chake, wangudumulizgamo ndi rapu: 18alinga kuti mu vinthu viŵi vizira masinthika, mwaku vyo nkhwambura machitika kuti Chiuta waname, tiŵe ndi kachiskidu kakukho, taŵakuthaŵiriya kukoreska chigomekezgu chakujarikikiya ifwe: 19chigomekezgu chenicho te nacho nge ndi ndondowa ya mzimu, chakuneneska ndi chakukho, ndi chakuserere mwaku cho che mukati mu chijaru cho; 20mwenimo uli ndi mdanjizgi waserere pa chifwa chaku ifwe Yesu, yo waŵiya ku muyaya Mzukuru Mura mwa ndondomeku yaku Melkizedeke.

Currently Selected:

ŴaHebere 6: TongaMw

Highlight

Copy

Compare