ŴaHebere 5

1Chifukwa mzukuru mura yose, wakusankhika mu ŵanthu, waŵikikiya pa chifwa cha ŵanthu mu vinthu vya kuchiri kwaku Chiuta, alinga kuti waperekenge mipasku ndi visopu pa chifwa cha vilakwa. 2Mweniyo wangaziŵa kukunthiyapo kwachitima ndi ŵajira ndi ŵakuranda, pakuti iyo nayo wakwetereka ndi unthomboru; 3ndipo chifukwa chenichi watene, uli mpha khamu lo, viyo so paku iyo mweneko, kupereke chifukwa chavilakwa. 4Ndipo palive munthu wajitole mlimu uwu waulemu, kweni yo ngwakudanika ndi Chiuta, uli ndimo wangudanikiya Aroni.

5Viyo so Kristu nayo kuti wangujikakankhuska kuŵa Mzukuru mura cha, kweni ndiyo wangumkambiya,

“Ndiwe, Mwana wangu,

ine le ndakupapa”;

6uli ndimo so wakambiya panyake,

“Ndiwe Mzukuru ku muyaya,

mwa ndondomeku yaku Melkizedeke.”

7Mweniyo mu mazuŵa ghake ghaliŵavu, wanguti wapereke, ndi Mubobotu wanthazi ndi masozi, maniniziku, maŵeyerero, kwaku yo wenga ndi nthazi kumtaska kunyifwa, ndipo wanguvwika pa chifwa cha uwopa Chiuta wake. 8Chingana wenga Mwana, wangusambira mvwiyu mwaku vyo wangukomwa; 9ndipo wanguti wafiskika wanguŵaŵiya wose ŵakumvwiya chata wa utaski wamuyaya; 10pakutamulika ndi Chiuta Mzukuru Mura mwa ndondomeku yaku Melkizedeke.

Chenjezgu pakureka chivwanu

11Ghapaku mweniyo te nagho mazu ghanandi kukamba, gho nganononu kung'anamuwa, pakuti mwaŵa ŵakudodoma kutegherezga. 12Chingana pa nyengo iyi mukhumba kuŵa ŵasambizgi kweni mukavuka yumoza kukusambizgani so mitendeku ya chiyambu cha mazu ghaku Chiuta; ndipo mwaŵa ŵakukavuka mkaka, ndi chakurgha chakukhoma cha. 13Chifukwa yose wakujilera ndi mkaka ngwambura kuziŵiriya mazu gha urunji, pakuti ndi litema. 14Kweni chakurgha chakukhoma ncha ŵara, ŵeniwo mu kupiripita ŵe ndi vinjeru vyawo vyakurongosoleka kuteska chamampha ndi so chiheni.

Currently Selected:

ŴaHebere 5: TongaMw

Highlight

Copy

Compare