Habakuku 2
2
Mchimi walindizga mazu gha Ambuya
1Ndimenge pa ulinda wangu kulonda,
ndijenge pa chitanthali,
ndi kukhazga kuti ndiwone cho wandikambiyenge,
ndi cho ndimukenge pa madinginiku ghangu.
2Ndipo Ambuya angundamuka anguti:
“Lemba chiwona, malembo ghawonekenge pa vipapate,
mwakuti yo waŵerengapo wendepo ruŵi.
3Chifukwa chiwona cheche kulindizga nyengo yake;
yithaŵiriya ku umari yikapusikanga cha.
Asani yingazuwulika, yilindizge;
yizenge nadi, kuti yizuwulikenge cha.
4Yo mzimu wake kuti
ngwakunyoroka cha watondekenge,
kweni murunji waŵenge wamoyo chifukwa cha chivwanu chake.
5Kweni ndi kweni, vinyo wapuruska,
munthu wakujikuzga kuti wajenge cha.
Chiloko chake nchisani nge ndi muunda;
nge ndi nyifwa kuti waguta cha.
Wajiwunjikiya mitundu yose,
ndi kuwunjika ŵanthu wose nge mbake.”
6Asi wose yaŵa ŵakamukambanga,
ndikumlenga, ndi kumseka kuti,
“Owe, kwaku yo wawunjika vyo kuti vyake cha
mpaka zuŵanji?
Ndi watijizitiska ndi vikole!”
7Asi ŵamatewu ŵako ŵayukenge kwamabuchibuchi,
ndi kuyuska wo ŵakutenthemeskenge?
Penipo uŵenge mskowo kwaku wo.
8Chifukwa iwe waskowa mitundu yinandi,
ŵanthu wose wo ŵakujako ŵakuskoŵenge.
Chifukwa chandopa za ŵanthu ndi nkhaza mu charu,
ndi mu misumba ndi wose ŵakujamo.
9Soka kwaku yo wanduwiya mbumba
yake chanduwo chiheni,
mwakuti wazenge nyumba yake pachanya,
kuti wataskike ku urwani!
10Upaska mbumba yako soni,
pakudumuwa mitundu yinandi ya ŵanthu;
ndipo wanangiya umoyo wako.
11Chifukwa mwa wa chiliŵa wamukati,
ndi mgomba waku mapasu vizomerezgenge.
12Soka kwaku yo wazenga muzi ndi ndopa,
ndi kuzenga msumba pa chiŵanja cha ubudi!
13Asi chikuturiya ku Ambuya ŵa maŵanja,
kuti ŵanthu ŵatakatakiya chifukwa cha moto pe,
ndipo mitundu yitijivukiska ndi vyaŵakaŵaka?
14Chifukwa charu chapasi chizazenge
ndi mziŵiru wa unkhankhu wa Ambuya,
nge ndi maji ghazaza nyanja.
15Soka kwaku yo wamweska munyake
nkhombo ya ukari wake ndi kumuloŵeleska,
mwakuti wawonenge nkhuli yake!
16Wamukoreka ndi suzgu kwakuruska thumbiku.
Mwanga nawi ndi yenda kwakuzendazenda!
Chandi mu janja lamarghe la Ambuya chikazanga kwako,
ndipo soni ziŵenge pa thumbiku la wo.
17Nkhaza zo zinguchitikiya Lebanoni zibwanganduwenge iwe so,
kupasuka kwa vinyama kukofyenge,
chifukwa cha ndopa za ŵanthu ndi nkhaza panu pasi,
ku misumba ndi wose ŵakujamo.
18Kumbi chikozgo chakusema chitanduwa chine
pa wachichita wakusema,
chikozgo chakusongono, musambizgi wa mautesi?
Chifukwa wakupanga wagomekezga mwaku cho wachipanga,
penipo wapanga ŵangoza ŵambuwu!
19Soka kwaku yo wanena ku chimuti chakusemeka, Yuka;
ndi ku mwa wambuwu Ima!
Kumbi ichi chingapereka uvumbuzi?
Wona, nchakumatika ndi golide ndi siliva,
mulivi muvuchi mukati chingana nkhamana.
20Kweni Ambuya ŵemu kasopi wawo wakupaturika;
charu chose chije chisisi paurongo pawo.
Currently Selected:
Habakuku 2: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
