Habakuku 1
1
Chiuta wamuka Habakuku
1Uvumbuzi waku Chiuta wo Habakuku mchimi wanguwona.
2Ambuya, ndi bongonge mpaka
zuŵanji chifukwa cha chovyo,
kuti imwe mureke kuvwa?
Pamwenga ndidanirizge kwinu “Nkhaza!”
Ndipo murekenge kutaska?
3Mutindirongoriyanji maubendezi,
ndi kundiwoneska suzgu?
Phasulu ndi nkhaza vye paurongo pangu,
mphindanu ndikulimbana viyuka.
4Dangu lagowoka,
cheruzgu kuti chitenda umampha cha.
Chifukwa ŵaheni ŵazinga ŵarunji,
viyo cheruzgu chirutiriya kubendezgeka.
5Lereskani mukati mu mitundu, ndi wonani;
muzizwenge ndi kutondwa.
Chifukwa ndichita mlimu mu mazuŵa ghinu
weniwo kuti muvwanenge nawo cha chingana ungakonkhomeka kwinu.
6Chifukwa wonani; ndiyuska ŵaKaldiya,
mtundu ukari ndi upusu,
wo wendenge mu usani wa charu,
kwachironda malo ghakujamo gho kuti ngawo cha;
7mbakofya ndi ŵakutenthemeska;
cheruzgu chawo ndi ulemu wawo vituwa kuŵeneko.
8Ŵakavalo ŵawo mbapusu kuruska ŵanyalubwe,
mbakari kuruska mphumphi zamazulo;
ŵapakavalo ŵawo ŵajituntha,
ŵapakavalo ŵatuwiya kutali,
ŵawuruka nge ndi nombo yakuchimbiriya kurgha.
9Wose ŵaziya nkhaza;
mantha ghadanjiya kunthazi kwawo.
Ŵawunjika ŵamikoli, nge ndi mchenga.
10Ŵaseka ŵakaronga,
ndipo mafumu ŵaghanyoza.
Ŵaseka pa malinga ghose,
chifukwa ŵarunda ndundu ya dongo ndi ŵayito.
11Penipo ŵajumpha ndi kurutiriya nge ndi mphepo,
ŵaheni wo nthazi zawo ndi chiuta wawo!
12Asi ndimwe wamuyaya,
Ambuya Chiuta wangu, Mtuŵa wangu?
Kuti tifwenge cha.
Ambuya mwaŵamika nge ncheruzgu;
ndipo imwe, Jarawe, mwaŵaŵika kuti ŵalangike.
13Imwe mwe ndi maso ghatuŵa gho kuti ghalereska uheni cha,
ndipo kuti mulereska pa ubudi cha,
kumbi mulereskiyanji pa ŵanthu ŵambura chigomezgu,
ndikuja ŵaka chete asani muheni wanyenga munthu murunji yo waruska iyo?
14Chifukwa musanduska ŵanthu kuŵa nge ndi somba zamu nyanja,
nge ndi vyakukwaŵa vyo virivi fumu.
15Waŵeja vyose ndi mbeja,
wativituzga ndi mukwawo wake,
waviwunjika mu chirepa chake;
viyo wakondwa ndi kusekere.
16Chifukwa ichi wachitiya chirepa chake sembe,
ndi kocha vyachema mu chirepa chake,
chifukwa mŵaku ivi ndimo wasakata;
ndi vyakurgha vyake vyamampha.
17Kumbi wapong'enge mukwawo kaŵikaŵi,
kubaya ŵamitundu kwambura lisungu muyaya?
Currently Selected:
Habakuku 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
