ŴaGalatia 6
6
Pingiyanani mphingu za yumoza ndi munyake
1Mwaŵabali, asani munthu wakoreka mu ubudi wakuti e, imwe mwa ŵamzimu munyoroskeni waviyo mu mzimu wa upovu, pakujithoŵa wamweni, vinu nawe so ungeseka. 2Nyamuliranani mphingu za ŵanyinu, ndipo viyo fiskani dangu lo laku Kristu. 3Chifukwa asani yumoza wajipima kuwa kanthu, pakuŵa kanthu cha, wajifuvya. 4Kweni munthu yose wese mlimu waku yija, po ndipo waŵenge ndi chitumbwa mwaku yija pe, ndipo mu munyake cha. 5Chifukwa munthu yose wanyamuwenge mphingu yapa mtima wake.
6Kweni yo ngwakusambizgika mazu wasanganenge ndi wakusambizga yo mu vyamampha vyose.
7Mungarandizgika cha; kuti Chiuta wanyumbika cha: chifukwa chenicho munthu wangamija, chenicho nacho wakavunanga. 8Pakuti wakumijiya ku liŵavu lake, ku liŵavu lo wakavunanga chivuzi; kweni yo ngwakumijiya ku Mzimu, ku Mzimu yo wakavunanga umoyo wamuyaya. 9Ndipo tingavuka cha pakuchita cho nchamampha: chifukwa pa nyengo yake yiyo tikavunanga, pakureka kuropwa. 10Viyo na, mo titiri ndi nyengo, tichitiyenge kwaku wose cho nchamampha, ukongwa kuŵa nambumba ŵa chivwanu. 11Awonani, ndakulembiyani ndi malembo gheni ghakuru ndi janja langu. 12Wo wose ŵakhumba kuwoneka umampha mu nyama, ndiwo ŵakukakamizgani kuchinjika; kweni mwakuti ŵareke kuŵembeka chifukwa cha mphinjika yaku Kristu. 13Chifukwa chingana mbakuchinjika yiwo kuti ŵasunga cha chilangulu; kweni ŵakhumba imwe kuchinjika, alinga kuti ŵatumbwiyenge mu liŵavu linu. 14Kweni kungandiwiya ine chakutumbwa, kweni mu mphinjika yo ya Ambuyafwe Yesu Kristu, mwaku yo charu chapayikikiya kwaku ine, ndi ine ku charu. 15Chifukwa chingana ndi mchinju kuti nkhanthu cha, chingana nkhuwura-mchinju, kweni chilengeka chifya. 16Ndipo paku wose wo ŵamkwende mu karusu kenaka, chimangu chiŵiye paku wo, ndi lisungu, ndi paku Yisraele yo waku Chiuta.
17Kutuwa ku sono wareke munthu kundijarizga: chifukwa ine ndipinga mu liŵavu langu simbu zaku Yesu.
18Wezi wo wa Ambuyafwe Yesu Kristu uŵe ndi mzimu winu, mwaŵabali. Ameni.
Currently Selected:
ŴaGalatia 6: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
