ŴaGalatia 5

Koreskani wanangwa winu

1Ndi wanangwa Kristu watisanduska ifwe ŵanangwa: viyo ngangamikani, ndipo mungawira so cha mu goŵa la uŵanda.

2Awonani, ine nda Paulo nditumneniyani kuti, asani muchinjika, kuti Kristu wakwanduliyeninge kanthu cha. 3Ndipo ndisimikizgiya so ku munthu yose yo wachinjika, kuti ngwamatewu kuchita chilangulu chose. 4Mwagaukako kwaku Kristu mose mwaŵakurunjiskikiya mu chilangulu; mwadezukako ku wezi. 5Chifukwa ifwe mu Mzimu tilindizgiya mu chivwanu chigomekezgu cha urunji. 6Chifukwa mwaku Kristu Yesu chingana ndi mchinju kuti ngwakovya kanthu cha, chingana nkhuwura mchinju; kweni chivwanu chakutataliya mu chanju. 7Mwachimbiyanga umampha; wangumumikani njani, kuti mureke kuvwiya uneneska wo? 8Kachichizgidu yaka kengavi kutuliya kwaku yo watumdanani. 9Mtupu umanavi utupiska burunga lose. 10Ine ndakopeka mwinu mu Mbuya kuti mupimenge chinyake so cha: kweni yo wakuyuzgani wavwiyengepo chisusa chake, chingana ndi yani. 11Kweni ine, mwaŵabali, asani ine ndeche kutaula mchinju, chifukwa chine ndeche kuŵembeka? Iku chiguŵisku cha mphinjika chawayuka. 12Mphanyi kuti wo ŵati kutimbanizgani ŵangajitemuwako ndipo.

13Chifukwa imwe, mwabali, mungudanikiya ku wanangwa; kweni mungasanduska wanangwa winu chitendeku cha liŵavu cha, kweni mu chanju teŵeteranani. 14Chifukwa chilangulu chose chafiskikiya mu mazu ghamoza, mwaku ghenigho; “Wajenge munyako uli ndi wamweni.” 15Kweni asani murumana ndi muturghan, cheŵani vinu mungamarizgana.

Vipasi vya Mzimu ndi vya liŵavu

16Kweni ndititi, endeyani mu Mzimu, ndipo kuti mufiskenge khumbo la liŵavu cha. 17Chifukwa liŵavu lilakalakiya pa mzimu, ndi Mzimu pa liŵavu; pakuti vipindikana vyenivyo, viyo kuti vyenivyo mungakhumba, ndivyo kuti mungachita cha. 18Kweni asani murongozgeka ndi Mzimu, kuti mwe pasi pa chilangulu cha. 19Ndipo milimu ya liŵavu njakuwoneka, yeniyo mbureŵi, 20wiyu, masomaso, chisopangoza, ufwiti, mawongu, zindeu, zisanji, vikwiya, matukutuku, 21zimbembi, mapambuku, viŵinu, mauloŵevu, vindimba, ndi vyakulingana navyo: kuchiri kwaku vyenivyo ndikuchenjezgiyani limu, nge ndimo ndingumuneniyani kali, kuti wakuchita vyaviyo kuti waherenge ufumu waku Chiuta cha. 22Kweni chipasi cha Mzimu nchanju, chimwemwe, chimangu, chilekerezga, ulemu, umampha, ukongorekwa, 23upovu, kujitintha; dangu lakukanizga vyaviyo palive. 24Ndipo ŵeniwo mbaku Kristu Yesu ŵapayika nyama pamoza ndi maulakalaka ndi malikhumbira ghake.

25Asani tijariya umoyo ndi Mzimu, ndi Mzimu so tendeyenge. 26Tingaŵangaŵabereŵeza cha, ŵakusosomorana cha, ŵakuŵiniwana cha.

Currently Selected:

ŴaGalatia 5: TongaMw

Highlight

Copy

Compare