Ezekiele 4

Visimikizgu vya kubwanganduka kwake

1“Ndipo iwe, mwana wa munthu, uto ncherwa uyiŵike paurongo pako, ulembepo chithuthuzi cha msumba, msumba wa Yerusalemu; 2ndipo paŵe nchitu yakuwujara, uwuzenge linga ndi kuwuchitiya chimbumira; uwuzenge so misasa kumikana nawo, ndipo uŵike mizinga kwakuzunguliya yirazgani nawo. 3Uto mbali ya chisulo, uyiŵike nge nchimati cha chisulo pakati paku iwe ndi msumba; chisku chako chidunjike paku wo, uŵe wakujarizgika, ujarizgike ndi nkhondo kumikana nawo. Ichi nchisimikizgu ku nyumba yaku Yisraele.

4“Sono ugone kumbegheka yako ya kumaze, ndipo ndikagonekanga kulangika kwaku Yisraele paku iwe; kwakuyana ndi unandi wa mazuŵa gho ugoniyengeko ukapinganga kulangika kwawo. 5Pakuti ndanyekezga paku iwe unandi wa mazuŵa, machumi pe chumi ghatatu pachanya machumi ghankhonde ndi ghanayi (390), kwakuyana ndi unandi wa virimika vya kulangika kwawo; viyo ndimu unyamuliyenge kulangika kwa nyumba yaku Yisraele. 6Asani wamara ivi, ukagonanga so pasi kachiŵi, kuchiri kumarghe, wakunyamuwa kulangika kwa nyumba yaku Yuda; ndakupaska mazuŵa machumi ghanayi (40), zuŵa limoza nchirimika chimoza. 7Ndipo ukarazganga chisku chako ku linga la Yerusalemu, ndi janja lako lambura kuvwinkhika; ndipo ukachimiyanga pa msumba wo. 8Awona, ndikaŵikanga vingwe paku iwe, kuti ukang'anamukanga kutuwa kuchiri uku kurazgiya uku cha, mpaka po wamara mazuŵa gha kujarizgika kwako.

9“Ndipo iwe, uto trigu, barile, nchunga, ndozi, maŵe, ndi mapila, uviŵike mu chise chimoza, uvichite chiŵanda. Mu unandi wa mazuŵa gho ugoniyenge kuchiri kumarghe, machumi pe chumi ghatatu pachanya machumi ghankhonde ndi ghanayi, ndicho urghenge. 10Kurgha ko urghenge kukapimikanga pa mweso, mashekelo machumi ghaŵi pa zuŵa limoza; ukarghanga kamoza pa zuŵa. 11Maji gho umwenge ghakapimikanga, chigaŵa chimoza cha vigaŵa vinkhonde ndi chimoza cha Hini; ukamwanga kamoza pa zuŵa. 12Ukarghanga nge ndi keki la barile, chiwocheke pa maso pawo pa mavi gha ŵanthu.” 13Ambuya anguti, “Viyo ndimo ŵaYisraele ŵakarghiyanga chiŵande chawo chakukazuzgika, mukati mu mitundu yo ndikaŵadikiyangamo.” 14Ine ndinguti, “A, Ambuya Chiuta! Aawonani, ndilivi kujikazuzgapo kutuwa ku wana wangu mpaka kuno ku sono kuti ndarghapo chakufwa chija cha, pamwenga chakuthwazurika ndi vinyama, nanga ndi nyama yakuvunda kuti ndayesa mu mlomo wangu cha.” 15Penipo angunena nane, “Awona, mu malo mwa mavi gha ŵanthu ndikupaskenge mavi gha ng'ombe, ndipo ukawochanga chiŵande chako.” 16Ndipo so angunena nane, “Mwana wa munthu, ehe, ndikafyonga nchirikizgu ya chiŵande mu Yerusalemu; ŵakarghanga chiŵande chakupima pa mweso ndi mantha ghakuru, ŵakamwanga maji ghakuchita kupima ndi kuzizwa. 17Ndichitenge ichi ŵakasoŵanga chiŵande ndi maji, ŵakalereskananga mu kuzizwa yumoza ndi munyake, mukulangika kwawo ŵawondenge.”

Currently Selected:

Ezekiele 4: TongaMw

Highlight

Copy

Compare