Ezekiele 3

1Ndipo wangunena nane, “Mwana wa munthu, yirgha chose cho chapaskika kwaku iwe; yirgha buku ili lakuzinga, rutanga kakambe ndi ŵanyumba yaku Yisraele.” 2Viyo ndingujura mlomo wangu, ndipo wangundipaska buku lakuzinga kuti ndirghi. 3Wanguti, “Mwana wa munthu, yirgha buku lakuzinga ili nditikupaska uzaze nalo nthumbu yako.” Ndingurgha; ndipo mu mlomo wangu lingusamuka nge ndi uchi.

4Ndipo wanguti, “Mwana wa munthu, ruta kasere ku nyumba yaku Yisraele, uŵakambiye mazu ghangu. 5Pakuti kuti utumika ku ŵanthu ŵakakambidu kalendo ndi kanonono cha, kweni ku nyumba yaku Yisraele 6kuti nkhu ŵanthu ŵanandi ŵakakambidu kalendo ndi kanonono cha, wo mazu ghawo kuti ungawamo cha. Kwakuneneska, asani ndingukutuma ku ŵaviyo, mphanyi ŵatinge ŵakakuvwenge. 7Kweni nyumba yaku Yisraele kuti yikakuvwanga cha; chifukwa kuti ŵakhumba kuvwa ine cha; pakuti nyumba yose yaku Yisraele yendi mutu wakulimba ndi mtima unonono. 8Ehe, ndalimbiska chisku chako kumikana ndi visku vyawo, mutu wako kumikana ndi mitu yawo. 9Nge ndimo mwa wa adamati (daimoni) uliri unonono kuruska sangalawe ndimo ndachitiya mutu wako; ungaŵawopanga, nanga nkhugongowa ndi kalereskedu kawo cha, chifukwa mba nyumba ya chigaruka.” 10Ndipo so wangunena nane, “Mwana wa munthu, mazu ghangu ghose gho ndikakambanga nawe ugharonde mu mtima wako, ughavwe mu makutu ghako. 11Rutanga, kasere ku ŵamikoli, ku ŵanthu ŵako, ŵanene kuti, ‘Viyo atiti Ambuya Chiuta’; manyi ŵatuvwa pamwenga ŵakana kuvwa.”

12Penipo mzimu ungundisoska, ndipo po unkhankhu wa Ambuya ungusoka kutuwa pa malo ghake, kuvuli kwangu ndinguvwa nge nkhugundakwa chidiririzi chikuru ukongwa; 13kwenga kugunda kwa mapapa gha vyamoyo vyo pakukwaskana chimoza ku chinyake, ndi kugunda kwa mikombelo ya pamoza navyo, ko kungugunda ulaka nchidiririzi chikuru. 14Mzimu ungundisoska ndi kunditore kutali, ndinguruta mu kuŵaŵa kwa kufunda kwa mzimu wangu, pakuti janja la Ambuya lingundiŵiya la nthazi; 15ndinguza ku ŵamikoli ku Telabibu, wo ŵajanga mu Kebara. Ndipo ndinguja kuwa umamphavi mukati mwawo mazuŵa ghankhonde ndi ghaŵi.

Mlonda wa ŵaYisraele

(Ezekiele 33.1-9)

16Pa umari wa mazuŵa ghankhonde: ndi ghaŵi, ghangundiziya mazu gha Ambuya: kuti, 17“Mwana wa munthu, ndakuchita uŵe mulonda wa nyumba yaku Yisraele; penipo pose utuvwa mazu ghangu, ukaŵachenjezganga. 18Asani ndititi ku muheni, ‘Ndithu ukafwanga,’ ndipo kuti utimchenjezga cha nanga nkhurongoro nayo kumucheŵeska muheni ku nthowa yake yiheni, mwakuti wataske umoyo wake, muheni yuwa wakafwanga mu kwananga kwake; kweni ndopa zake ndikazifumbanga pa janja lako. 19Kweni asani wamuchenjezga muheni, ndipo kuti wang'anamukako ku uheni wake cha, pamwenga kunthowa yake yiheni, wakafwanga mu uheni wake; kweni iwe utaskenge umoyo wako. 20Ndipo so, asani munthu murunji watuwako ku urunji wake ndi wachita uheni, ndipo ine ndaŵika chiguŵisku paurongo pake, wakafwanga chifukwa iwe kuti wamchenjezga cha, wakafwanga pa uheni wake, ndipo nchitu zake za urunji zo wachita kuti zikakumbukikanga cha; kweni ndopa zake ndikazifumbanga pa janja lako. 21Asani wamuchenjezga murunji, kuti reka kulakwa, ndipo kuti walakwa cha, nadi wakaŵanga wamoyo, chifukwa wanguronda kuchenjezgeka, viyo iwe ukataskanga umoyo wako.”

22Janja la Ambuya lenga paku ine; angunena nane, “Soka, rutanga ku chidika, ndamurongoro nawe kwenikuwa.” 23Viyo ndingusoka ndinguruta ku chidika; ndipo, ehe, unkhankhu wa Ambuya unguma kwenikuwa, nge mbunkhanichu wo ndinguwona ku msinji Kebara; ndipo ndinguwa kavunama. 24Kweni Mzimu ungusere mwaku ine ungundimiska jo; angurongoro nane anguti, “Rutanga, kajijariye mu nyumba yako. 25Ndipo iwe, mwana wa munthu awona, vingwe vikaŵikikanga paku iwe, ukamangikanga navyo, mwakuti ureke kuruta mukati mu ŵanthu; 26ndipo ndikabatikiskanga lilime lako kunena kwa mlomo wako, alinga kuti uŵe wa mbuwu ndi wambura kuziŵa kuŵachenya; pakuti mba nyumba ya chigaruka. 27Kweni pakurongoro nawe, ndikajuranga mlomo wako, ndipo ukambenge nawo, ‘Viyo atiti Ambuya,’ yo wakavwanga, wavwe; ndipo yo wakakananga kuvwa, wakane; chifukwa mba nyumba ya chigaruka.

Currently Selected:

Ezekiele 3: TongaMw

Highlight

Copy

Compare