Ezekiele 36

Uchimi wa paku Yisraele

1“Iwe, mwana wa munthu, uchime ku mapiri ghaku Yisraele, ukambe kuti, Mwa mapiri ghaku Yisraele mwe, vwani mazu gha Ambuya. 2Viyo atiti Ambuya Chiuta: Pakuti murwani pakukamba vya paku imwe wanena kuti, ‘Aha! Malo gha pachanya gha mwaka ghaŵa chihara chidu,’ 3chifukwa cho, chima, unene kuti, viyo atiti Ambuya Chiuta: Chifukwa, inya chifukwa chakuti ŵangukuchitani phasulu, ŵangukubwanganduwani kose kose, mwakuti mungusanduka chihara cha ŵamitundu wo ŵakujako, ndipo munguŵa mu mlomo ndi kunyozeka kuheni ndi ŵanthu, 4chifukwa cho, mwa mapiri gha Yisraele, vwani mazu gha Ambuya Chiuta; Ambuya Chiuta atiti ku mapiri ndi mitunthu, vinkhwawu ndi madambo, ku phasulu la mapopa ndi misumba yakusiyika yo yasanduka chakuliwa ndi chakusekeska ku mitundu ya kujako yakuzingirizga; 5chifukwa cho Ambuya Chiuta atiti: Mu kufya kwa sanji yangu ndirongoro, kumikana ndi ŵakujako ŵa ŵamitundu ndi Edomu yose, wo ŵangujipaska charu changu nge nchihara mu likondwa lose ndi mtima wakuyuyuwa, mwakuti chiŵi chihara chawo ndi kuchiskowa. 6Chifukwa cho uchime ghapa charu cha Yisraele, ughanene mapiri ndi mithunthu, vinkhwawu ndi madambo, viyo atiti Ambuya Chiuta: Awonani, ndirongoro mu sanji yangu ya ukari, pakuti mwanyamuwa tozo la ŵamitundu; 7chifukwa cho atiti Ambuya Chiuta: Ndarapa umoyo, kuti, mitundu yo yakuzingirizgani ndiyo yikatombozgekanga.

8“Kweni imwe, mapiri gha Yisraele, mphanda zinu zikasundanga, ndi kuŵapasiya vipasi vinu ŵanthu ŵangu ŵaYisraele; chifukwa ŵepafupi kuza ku muzi. 9Pakuti, awonani, ine nde pamoza namwe, ndipo ndizenge kwaku imwe, ndipo mukalimikanga ndi kupandika; 10ndikandaniskanga ŵanthu pachanya pinu, nyumba yose yaku Yisraele, yose pamoza; misumba yikaŵanga ndiŵakujamo ndipo malo gha mapopa ghakazengekanga so; 11ndipo ndikandaniskanga paku imwe munthu ndi chakuŵeta; vyandanenge ndi kupapana; ndikamuzenganinga nge ndi munyengo zinu za kali, ndimuchitiyeninga umampha ukongwa kuruska pakudanga. Penipo ndipo mukaziŵanga kuti Ine ndine Ambuya. 12Inya, ndizomerezgenge ŵanthu, ŵanthu ŵangu ŵaYisraele, kuti ŵendenge so munthowa zinu; ŵakajanga mwaku imwe, imwe mukaŵanga chihara chawo, ndipo kuti mwazamukuŵaphanga so ŵana ŵawo cha. 13Viyo atiti Ambuya Chiuta: Pakuti ŵanthu ŵatiti, ‘Muturgha ŵanthu, ndi kuphanga ŵana ŵa mtundu winu,’ 14chifukwa cho kuti mukarghanga so ŵanthu cha nanga nkhuti mukayungwiskanga so ŵana ŵa mtundu winu cha, atiti Ambuya Chiuta; 15kuti ndikazomerezganga so cha kuti muvwenge kutombozga kwa ŵa mitundu, ndipo kuti mukanyamuwanga so kulengeskeka kwa ŵanthu cha chingana nkhuti mukaguŵiskanga so mtundu winu nako cha atiti Ambuya Chiuta.”

Kutozgeka so kwa ŵaYisraele

16Ghangundiziya mazu gha Ambuya: 17“Mwana wa munthu po ŵaYisraele ŵajanga mu charu chawo, ŵanguchikazuzga chifukwa cha nthowa zawo ndi nchitu zawo; majaridu ghawo paurongo pangu ghanguŵa nge nkhufipiskika kwa munthukazi yo we mu masambi. 18Viyo ndinguŵapunguliya ukari wangu chifukwa cha ndopa zo ŵangudiska, ndi chifukwa cha ŵangoza ŵawo wo ŵangukazuzga nawo charu. 19Ndinguŵambininiskiya mukati zu mitundu, ŵanguparghang'ikiya mu vyaru; kwakuyana ndi majaridu ghawo ndi ndi nchitu zawo ndinguŵeruzga. 20Kweni po ŵanguti ŵasere mu ŵamitundu, ko kose ŵanguya, ŵangufipiska zina langu lituŵa, mwakuti ŵanthu pakuŵakamba ŵatinge, ‘Yaŵa mbanthu ŵa Ambuya, wo ŵakudikiskika mu charu chake.’ 21Kweni ndingwenjerwa chifukwa cha zina langu lituŵa, lo ŵaYisraele ŵangufipiska mukati mu mitundu moŵangusere.

22“Chifukwa cho kamba ku nyumba yaku Yisraele, Viyo atiti Ambuya Chiuta: kuti ndichita ichi pa chifukwa chaku imwe cha, mwa nyumba yaku Yisraele, kweni pa chifukwa cha zina langu lituŵa, lo imwe mwakazuzga mukati mu mitundu mo munguya. 23Ndikarunjiskanga utuŵa wa zina langu likuru, lo lakazuzgika mukati mu ŵamitundu, lo imwe mwafipiska mukati mwawo; ndipo mitundu yikaziŵanga kuti ine ndine Ambuya, atiti Ambuya Chiuta, penipo ndirunjiska utuŵa wangu mwaku imwe pa maso pa wo. 24Chifukwa ndimutoninga kutuwa mu mitundu, ndi kumuwunjikani kutuwa mu vyaru vyose, kuza namwe mu charu chaku mwaŵeni. 25Ndikamijanga maji gha kutowa paku imwe, ndipo mukatowanga ku kufipirwa kwinu kose ndikakutoweskaninga ku ŵangoza ŵinu wose. 26Ndikupaskeninga mtima ufya, ndipo mzimu ufya ndiŵikenge mukati mwinu, ndituzgenge muliŵavu linu mtima wa mwa ndikumupaskani mtima wamnofu. 27Ndiŵikenge mzimu wangu mukati mwinu, ndi kumwendeskani mu virunguchizgu vyangu ndi kuti muphwerenge kusunga malangulu ghangu. 28Mukajanga mu charu cho ndingupaska auskemwe, mukaŵanga ŵanthu wangu ndipo ine ndikaŵanga Chiuta winu. 29Ndimutaskeninga ku kufipirwa kwinu kose, ndikadananga mbeu kuti ndizandaniske ndipo chilala kuti chikaŵanga paku imwe cha. 30Ndikandaniskanga vipasi vya miti ndi mbeu yamu munda, mwakuti mureke kuŵa so ndi suzgu ya chilengesku cha chilala mukati mu mitundu. 31Penipo ndipo mukakumbukanga nthowa zinu, ndi nchitu zinu kuti zenga ziheni, sono mukajitinthanga mwaŵeni chifukwa cha maukazuzi ndi milimu ya maunyakazi ghinu. 32Kuti ndikachitanga ichi chifukwa chinu cha, atiti Ambuya Chiuta, ichi chiziŵikwe kwaku imwe. Muŵe ŵa soni ndi ŵachitima chifukwa cha nthowa zinu, imwe nyumba yaku Yisraele.

33“Viyo atiti Ambuya Chiuta: Pa zuŵa lo ndikakuphotoninga, ku maukazuzi ghinu ghose, ndimujarikeninge mu misumba ndipo malo gha mapopa ghakazengekanga so. 34Charu cho chenga phasulu chikalimikanga, nanga mu maso ghaku wose wo ŵajumphangapo chinguwoneka kuŵa phasulu. 35Ndipo ŵakatinge, ‘Charu ichi cho chenga phasulu chasanduka ulaka ndi munda wa Edeni; ehe mizi ya mapopa ya phasulu ndi yakubwanganduka sono nja malinga ndipo yendi ŵanthu ŵakujamo.’ 36Penipo ndipo ŵa mitundu wo ŵakusiyika kuzingirizga imwe ŵakaziŵanga kuti ine, Ambuya, ndazenga malo ghakubwanganduka, ndapanda so gho ghanguŵa phasulu; ine, Ambuya, ndakamba, ndipo ndikachichitanga.

37“Viyo atiti Ambuya Chiuta; Ichi nacho so ndikazomerezganga kuti nyumba yaku Yisraele ŵandipemphe cho ndingaŵachitiya: kwandaniska ŵanthu ŵawo nge ndi mskambu. 38Nge ndi mskambu wakuchitiya sembe, nge ndi mskambu ku Yerusalemu mu nyengo zakutemeka za madghera, ndimo misumba ya mapopa yikazaziyanga ndi miskambu ya ŵanthu. Sono penipo ndipo ŵakaziŵanga kuti ine ndine Ambuya.”

Currently Selected:

Ezekiele 36: TongaMw

Highlight

Copy

Compare