Ezekiele 35

Uchimi wa paku Edomu

1Mazu gha Ambuya ghanguza kwaku ine: 2“Mwana wa munthu, razga chisku chako pa phiri Seiri uchimi kumikana nalo, 3ukambe kuti, Viyo atiti Ambuya Chiuta: Ehe, wa phiri la Seiri, ndimikana nawe, nditambaluriyenge janja langu paku iwe, ndipo ndikakusanduskanga phasulu ndi mapopa. 4Ndipasuwenge mizi yako, ukaŵanga phasulu, ndipo ukaziŵanga kuti ine ndine Ambuya. 5Chifukwa unguŵa ndi kutinkha kwa muyaya, ungupereka ŵaYisraele ku nthazi ya uyi wa lipanga mu nyengo ya soka lawo, pa nyengo ya kulangika kwawo kwakumariya; 6mu chifukwa cho, mo ndiliri wamoyo, atiti Ambuya Chiuta, ndikakurongosoliyanga ku ndopa, ndopa zikakurondonga; pakuti wasuskika ndi ndopa, chifukwa cho ndopa zikakurondonga. 7Ndilisanduskenge mapopa ndi phasulu phiri la Seiri; ndipo ndikadumuwangako wose wo ŵatuza ndi kuruta. 8Ndizazenge mapiri ghako ndi ŵakubayika, mu mitunthu yako ndimu madambo ghako ndi muvinkhwawu vyako vyose ŵakubayika ndi lipanga ŵakawangamo. 9Ndikakusanduskanga phasulu la muyaya, ndipo misumba yako kuti yikaŵanga ndiŵakujamo cha. Penipo ndipo ukaziŵanga kuti ine ndine Ambuya.

10“Chifukwa iwe unguti, ‘Mitundu iyi yiŵi ndi vyaru ivi viŵi vikaŵanga vyangu, ndikaviharanga’ nanga Ambuya ŵenga kwenikuwa 11chifukwa cho, mo ndiliri wamoyo, atiti Ambuya Chiuta, chifukwa cha ukari ndi sanji yo ungurongo, chifukwa cha tinkhu lako lo unguŵa nalo paku iwo, ine ndikachitanga nawe kwakukozgana, ndikajiziŵiskanga mukati mwako, pakukweruzga. 12Sono po ndipo ukaziŵanga kuti ine, Ambuya, ndavwa kutemba kwako kose ko ungutemba, kuti, ‘Mapiri gha Yisraele ghaŵa phasulu, ndipo ghapaskika kwaku ifwe kuti tigharghe.’ 13Ndipo iwe ungujikwezga paku ine ndi milomo yako, ungwandaniska mazu ghako kumikana nane, ine ndingughavwa. 14Viyo atiti Ambuya Chiuta: Mwakuti charu chose cha pasi chikondwe, ndikakusanduskanga iwe phasulu. 15Nge ndimo iwe ungukondwe pa chihara cha nyumba yaku Yisraele, po yinguŵa phasulu, viyo ndimu ndikachitiyanga nawe; ukaŵanga phasulu, phiri la Seiri, ndi Edomu yose, yose teteti. Penipo ndipo ŵakaziŵanga kuti ine ndine Ambuya.”

Currently Selected:

Ezekiele 35: TongaMw

Highlight

Copy

Compare