Ezekiele 33

Nchitu ya mlonda

(Ezekiele 3.16-21)

1Mazu gha Ambuya ghanguza kwaku ine: 2“Mwana wa munthu, kamba ndi ŵanthu ŵako uŵanene kuti, Asani ndituza ndi lipanga pa charu, ndipo ŵeni-charu ŵato munthu mukati mwawo, ndi kumuŵika nge ndi mlonda wawo; 3ndipo asani wawona lipanga lituza pa charu, watumba mbata ndi kuŵacheŵeska ŵanthu; 4sono asani munyake yo watuvwa kumba kwa mbata muti waronda kucheŵeskeka cha, ndipo lipanga lituza ndi kumutuzgapo, ndopa zake zikaŵanga pa mutu wa mweneko. 5Wanguvwa kumba kwa mbata, ndipo kuti wanguphwere kucheŵeskeka cha; ndopa zake zikaŵanga pa mweneko. Chifukwa asani wanguphwere kucheŵeskeka; mphanyi wangutaska umoyo wake. 6Kweni asani mlonda wawona lipanga lituza ndipo kuti watumba mbata cha, ndi kuti ŵanthu kuti ŵacheŵeskeka cha, sono lipanga lituza, ndi kutuzgamo yumoza mukati mwawo; munthu yuwa watuzgikamo ndi uheni wake, kweni ndopa zake ndikazifumbanga pa janja la mlonda.

7“Viyo iwe, mwana wamunthu, ndakuŵika mlonda pa nyumba yaku Yisraele; penipo pose utuvwa mazu kutuwa ku mlomo wangu, uŵacheŵeske mwaku ine. 8Asani ndikamba ku muheni, Owe muheni we, nadi ukafwanga, ndipo iwe ureka kumunene kumucheŵeska muheni kuti waweko ku nthowa yake, muheni yuwa wakafwanga mu uheni wake, kweni ndopa zake ndikazifumbanga pa janja lako. 9Kweni asani wamucheŵeska muheni kuti wareke nthowa yake, ndipo iyo kuti waweko ku nthowa yake cha; wakafwanga mu kwananga kwake, kweni iwe wataska umoyo wako.

10“Iwe, mwana wa munthu, kamba ku ŵaYisraele, Imwe mukamba kuti: ‘Mamphuru ghidu ndi vyakwananga vidu vye paku ifwe, ndipo tawonda navyo liwondi-wondi; na tingaŵa uli ndi umoyo?’ 11Uŵanene kuti. Mo ndiliri wamoyo, atiti Ambuya Chiuta, ndilivi likondwa mu nyifwa ya muheni, kweni kuti muheni waweko ku nthowa yake, waŵe ndi umoyo; weniko, weniko ku nthowa zinu ziheni; kumbi mufwiyengenji, mwa ŵa nyumba yaku Yisraele? 12Ndipo iwe, mwana wa munthu, kamba ndi ŵanthu ŵako, urunji wa wakurunjika kuti ukamtaskanga cha asani walakwa; nge mbuheni wa muheni kuti ukambayanga cha asani waweko ku uheni wake; ndipo murunji kuti wangaja ndi umoyo cha chifukwa cha urunji wake asani walakwa. 13Chingana ndingakamba ku murunji kuti nadi wakaŵanga ndi umoyo, ndipo uli asani wagomekezga mu urunji wake ndi wachita uheni, palivi milimo yake yakurunjika yo yikakumbukikanga; kweni mu chifukwa cha uheni wo wachita wakafwanga. 14Ndipo so, nanga ndingakamba ku muheni, ‘Nadi ukafwanga,’ Kweni ndipuuli asani waweko ku uheni wake ndi wachita cho nchakwenere ndi chakurunjika, 15asani muheni wawezga ngongoli, wawezga cho wanguba, ndi watenda mu marangu gha umoyo, kuti walakwa cha; kwakuneneska wakaŵanga ndi umoyo, kuti wakafwanga cha. 16Palivi nanga ngumoza wa mauheni gho wakuchita ghakakumbukikanga paku iyo; wachita cho nchakwenere ndi chakurunjika, nadi wakaŵanga ndi umoyo.

17“Kweni ndi kweni ŵanthu ŵako ŵatiti, ‘Nthowa ya Ambuya kuti njakurunjika cha’; penipo nthowa yaku iwo ŵeneko ndiyo yiheni. 18Asani murunji watuwako ku urunji wake, wachita uheni, wakafwanga nawo. 19Ndipo asani muheni watuwako ku uheni wake, wachita cho mchakwenere ndi chirunji, nadi wakaŵanga ndi umoyo. 20Kweni ndipuuli imwe mutiti, ‘Nthowa ya Ambuya kuti njakurunjika cha.’ Awe, nyumba yaku Yisraele, ndikamweruzganga yumoza ndi yumoza waku imwe kwakulingana ndi nthowa zake.”

Kubwanganduka kwa Yerusalemu

21Pa zuŵa la chinkhonde la mwezi wa chumi, mu chirimika cha chumi ndi viŵi cha uŵanda widu, munthu yo wanguthaŵa ku Yerusalemu wanguza kwaku ine, wanguti, “Msumba wawa.” 22Kweni janja la Ambuya linguŵa paku ine mazulo gha zana wenga wandafike wakuthaŵa yo; ndipo angujura mlomo wangu pa nyengo yo munthu uyu waziyanga kwangu ndi mlenji; viyo mlomo wangu ungujurika, kuti ndinguŵa so mbuwu cha.

23Ghangundiziya mazu gha Ambuya: 24“Mwana wa munthu ŵakuja mu malo gha mapopa agha mu charu cha Yisraele, ŵeche kukamba kuti, ‘Abrahamu wenga munthu yumoza pe, ndipuuli wanguchihara charu ichi; kweni ifwe te ŵanandi, charu ichi nadi chikupaskika kwaku ifwe ku chihara.’ 25Chifukwa cho uŵanene kuti, Viyo atiti Ambuya Chiuta: Muturgha nyama ndi ndopa, ndipo muyinuskiya maso ghinu ku ŵangoza, ndi kudiska ndopa, kumbi mungahara charu viyo? 26Munyamuwa lipanga, muchita maunyakazi, ndipo yumoza ndi yumoza waku imwe walakwa ndi muoli wa mwanasi wake; kumbi mungaziŵa kuchihara charu viyo? 27Uŵanene ichi, viyo atiti Ambuya Chiuta: Mo ndiliri wamoyo, kwakuneneska wo ŵe mu malo gha mapopa ŵakabayikanga ndi lipanga: ndipo yo we mudondo ndikamuperekanga ku vikoko kuti vimuparuwe, ndipo woŵe mulinga lakukho ndimuzimphanji ŵakafwanga ndi chideru. 28Ndipo ndikachitanga charu kuti chiŵe phasulu ndi mapopa; kujikuzga kwake kwa nthazi kukamaranga; ndipo mapiri mu Yisraele ghakaŵanga nadi phasulu mwakuti kuwulengevi yumoza wakuporotamo. 29Penipo ndipo ŵakaziŵanga kuti Ine ndine Ambuya, asani ndasanduska charu kuti chiŵe phasulu ndi mapopa chifukwa cha maunyakazi ghawo ghose gho ŵachita.

30“Ndipo nge nkhwaku iwe, mwana wa munthu, ŵanthu ŵako wo ŵakambiskana gha paku iwe mu malinga ndimu makhomo gha zinyumba, wo ŵatiti yumoza ku munyake, uyu ku mubali wake, ‘Zaninga tivwe ndi, mazu uli gho ghatuwa ku Ambuya.’ 31Ŵatuza kwaku iwe nge ndimo ŵanthu ŵaziya, ndipo ŵaja paurongo pako nge mbanthu wangu, ŵatuvwa vyo iwe ukamba, kweni kuti ŵakavichitanga cha; pakuti ndi milomo yawo ŵarongo chanju chikuru, kweni mitima yawo yikukho mu chanduwu chawo. 32Ndipo, awona, ine kwaku iwo ulingana ndi munthu yo watumba sumu za chanju ndimazu ghakunozga ukongwa ndipo watumba umampha pa bangwi, chifukwa watuvwa cho ukamba, kweni kuti wakachichitanga cha. 33Asani ichi chafikapo, nadidi chikazanga. Sono ndipo ŵakaziŵanga kuti mchimi wengamu mukati mwawo.”

Currently Selected:

Ezekiele 33: TongaMw

Highlight

Copy

Compare