Ezekiele 31

Ukuru waku Farao

1Pa zuŵa lakudanga, mwezi wa chitatu, mu chirimika cha chumi ndi chimoza, mazu gha Ambuya ghanguza kwaku ine: 2“Mwana wa munthu, munene Farao karonga wa Egipiti ndi ku wumba wake:

Uyana ndi yani mu ukuru wako?

3Ehe, ndikulinganizgenge ndi sidaramu Lebanoni,

ndi mphanda zamampha ndi mduzi wa mulisuwa,

wa msinkhu utali,

kusongo kwake kwe mukati mu mitambo.

4Maji ghanguwupaska kurgha, ndimba yinguwukuliska

misinji yake yendanga umamphavi

kuzingirizga malo gho ukupandikapo,

utumizga mphalika zake ziruta

ku miti yose ya mulisuwa.

5Viyo ungukuliya pachanya pachanya pa miti yose ya mulisuwa,

mphanda zake zenga zinandi ndipo zingukuwa ukongwa,

pakuti unguŵa ndi maji ghanandi mu misisi yake.

6Viyuni vyose vya mude vinguzenga vivimbu vyawo mumphanda zake;

musina mu mphanda zake ndimu nyama

za mudondo zapapiyanga ŵana ŵawo;

ndipo mu mduzi wake ndimo mwajanga mitundu yose yikuru ya ŵanthu.

7Ungunozga ukongwa mu ukuru wake,

mu kutambara kwa mphanda zake;

pakuti musisi yake yingusere pasi po penga maji ghanandi.

8Ma sidara gha mu munda waku Chiuta kuti ghanguwubenekere cha,

chingana ndi miti ya mlombwa kuti yiyana ndi mphanda zake cha;

miti yose yinyake kuti yinguwoneka nge nkhanthu

cha pa kulinganizgana ndi mphanda zake;

mwengavi muti mu munda waku Chiuta

wo unguyana nawo kutowa.

9Ndinguwutoweska ndine mu unandi wa mphanda zake,

ndipo miti yose yamu Edeni yinguchita nawo sanji,

yo yinguŵa mu munda waku Chiuta.

10“Viyo atiti Ambuya Chiuta: Chifukwa chakuti ungukwera ukongwa ndi kujarika songo yake mukati mu mitambo, ndikuti mtima wake ungujikuzga chifukwa cha utali wake, 11ndikawuperekanga mu janja la wanthazi wa mu mitundu; kwakuneneska wakachitanga nawo kwakuyana ndi uheni wake. Ine ndawutaya. 12Ŵalendo, ŵakofya kwakuruska mu mitundu ŵakawudumuliyanga pasi ndi kuwusiya penipo. Mphanda zake zikawanga pa mapiri ndi mu vinkhwawo vyose, zikafyokanga ndi kugona mu misisi yose ya maji mu charu; ndipo mitundu yose mu charu chapasi yikatuwangamo ndi kujowo mduzi wake. 13Pa phasulu lake ndipo pakajanga viyuni vyose vya mude, ndipo pachanya pa mphanda zake ndipo pakaŵanga nyama zose za mudondo. 14Chose ichi chaŵapo mwakuti miti yose ya pafupi ndi maji yireke kukuwa ukongwa viyo, pamwenga kujarika songo zake mu mitambo, ndi kuti miti yose yo yitumwa maji yireke kujikwezga kwakuruska mwaku iyo yeneko; pakuti yose yikuperekeka ku nyifwa, kusi kwa charu chapasi mukati mu ŵanthu ŵakufwa, pamoza ndiwo ŵasikiya ku Zenje.

15“Viyo atiti Ambuya Chiuta: Uchisikiya ku muunda ndikachitiskanga ndimba kuti yiwutenjere, ndi kujara misinji yake, ndipo maji ghanandi ghakarekanga kwenda; Lebanoni ndikamuvwarikanga mdima, ndipo miti yose ya mudondo yifwenge chipoyo chifukwa chaku iwo. 16Ndikambwambwanthiskanga mitundu ndi muswayo wakuwa kwake, pakuwupong'a ku Sheole pamoza ndiwo ŵaruta kusikiya ku Zenje, ndipo miti yose yamu Edeni, yakusankhika ndi yakuruska mu Lebanoni, yose yo yitumwa maji, yikasangaruskikanga kusi kwa charu chapasi. 17Iyo nayo yikasikiyanga ku Sheole pamoza nawo, kwaku ŵeniwo ŵakubayika ndi lipanga; inya, wose wo ŵanguja mu mduzi wake mukati mu mitundu ŵakamaranga. 18Kumbi iwe ukozgana ndiyani mu unkhankhu ndi ukuru mukati mu miti yamu Edeni? Ukasiskikiyanga pasi pamoza ndi miti yamu Edeni kusi kwa charu chapasi; ukagonanga mukati mu ŵambura kuchinjika, pamoza ndiwo ŵakubayika ndi lipanga.

“Uyu ndi Farao ndi umba wake wose, atiti Ambuya Chiuta.”

Currently Selected:

Ezekiele 31: TongaMw

Highlight

Copy

Compare