Ezekiele 30

Kupasuka kwa Egipiti

1Ghangundiziya mazu gha Ambuya: 2“Mwana wamunthu, chima, ukambe kuti, Viyo atiti Ambuya Chiuta:

Liya ukongwa, ‘Owe zuŵa lo!’

3Pakuti zuŵa laŵandika,

zuŵa la Ambuya laŵandika;

likaŵanga zuŵa la mitambo,

nyengo ya soka ku mitundu.

4Lipanga likazanga pa Egipiti,

urwirwi ukaŵanga mu Etiopia,

penipo ŵakubayika ŵawa mu Egipiti,

po usambasi wake wayoreka,

ndipo viŵanja vyake vyawiskika pasi.

5Etiopia, Puti, Ludi, wose ŵa Arabia, ndi Libiya ndi ŵanthu ŵamu vyaru vyo ŵazomerezgana navyo, ŵakabayikiyanga pamoza nawo ndi lipanga.

6“Viyo atiti Ambuya:

Wo ŵazomerezgana ndi Egipiti ŵakawanga,

ndipo kujikuzga kwake kwa nthazi kukasiskikiyanga pasi;

kutuwa ku Migdolo mpaka ku Siyene

ŵakawanga ndi lipanga mukati mwake,

atiti Ambuya Chiuta.

7Ndipo wakaŵanga phasulu mukati mu vyaru vya phasulu

mizi yake yikaŵanga mapopa mukati mu mizi ya mapopa.

8Sono ndipo ŵakaziŵanga kuti ndine Ambuya,

asani ndapemba moto pa Egipiti,

ndikuti wose ŵakumovya ŵabwanganduka.

9“Mu zuŵaliya mathenga gha mankharo ghakarutanga kutuwa kwaku ine kwachiŵawofya ŵa Etiopia ŵambura kuphwereko; ndipo pa zuŵa la soka la Egipiti urwirwi ukazanga paku iwo; pakuti, ehe, lituza!

10“Viyo atiti Ambuya Chiuta:

Ndimarizgenge usambasi wa Egipiti,

ndi janja laku Nebukadanezara karonga waku Babiloni.

11Iyo ndi ŵanthu ŵake pamoza nayo,

mtundu wakofya kwakuruska,

ŵakazanga kuzachiparghang'a charu;

ndipo ŵakawe wepuwanga malipanga ghawo kumikana ndi Egipiti,

charu chikazazanga ŵakubayika.

12Ndikamuskenge Nile,

ndikuguliska charu mu manja gha ŵanthu ŵa mphurupuru;

ndizenge ndi phasulu mu charu ndi paku chose cho chirimo,

ndi janja la ŵalendo;

ine, Ambuya, ndarongoro.

13“Viyo atiti Ambuya Chiuta:

Ndiparghang'enge ŵangoza,

ndikurekeska vikozgo mu Mefisi;

kuti mukaŵanga so fumu cha mu charu cha Egipiti

inya ndiŵikengemo mantha mu Egipiti.

14Patrosi ndikamusanduskanga phasulu,

ndi kupong'a moto ku Zoani,

ndipo ndikafiskanga nchitu za cheruzgu pa Tebesi.

15Ndipo ndikapunguliyanga ukari wangu pa Pelusimu,

linga lakukho la Egipiti,

ndi kudumuwako mzinda wa Tebesi.

16Ndipembenge moto mu Egipiti;

Pelusimu wakaŵanga mu soka likuru;

Tebesi wakabwangandukanga,

malinga ghake ghakawiskikanga.

17Ŵanyamata ŵamu Ono ndi ŵamu Pibeseti ŵakabayikanga ndi lipanga;

ŵanthukazi ŵakarutanga ku umkoli.

18Pa Tehafenesi lumwi likaŵanga mdima,

po ndiphwanya ufumu wa Egipiti kwenikuwa,

ndipo nthazi ya kujikuzga kwake yikamaranga;

wakabenekerekanga ndi mtambo,

ŵana ŵake ŵanthukazi ŵakarutanga ku umkoli.

19Viyo ndimu ndikafiskiyanga nchituza cheruzgu pa Egipiti.

Penipo ndipo ŵakaziŵanga kuti ine ndine Ambuya.”

20Pa zuŵa la chinkhonde ndi chiŵi, mwezi wakudanga, mu chirimika cha chumi ndi chimoza, ghangundiziya mazu gha Ambuya: 21“Mwana wa munthu, ndafyo janja laku Farao karonga wa Egipiti; sono awona, kuti lamangika cha mwakuti lipo, kulimanga ndi bandeje, alinga kuti liŵi lanthazi pakuko lipanga. 22Chifukwa cho atiti Ambuya Chiuta: Awona, ndimikana ndi Farao, karonga wa Egipiti, ndikaphwanyanga manja ghake ghose ghaŵi, lanthazi ndiliya lakufyoka kali; ndipo ndiwiskiyenge pasi lipanga la mujanja lake. 23Ndikambininiskiyanga ŵaEgipiti mu mitundu, ndi kuŵaparghang'iya mu vyaru. 24Ndikalimbiskanga manja gha karonga waku Babiloni, ndiŵikenge lipanga langu mu janja lake; kweni manja ghaku Farao ndikafyonga, ndipo wakatamanthanga nge ndi munthu yo walasika kwa nyifwa. 25Ndikakhozganga manja gha karonga waku Babiloni, kweni manja ghaku Farao ghakawanga; ndipo ŵakaziŵanga kuti ndine Ambuya. Penipo ndikaperekanga lipanga langu mu janja la karonga waku Babiloni, wakalinyoroskiyanga pa charu cha Egipiti; 26ndikaparghang'iyanga ŵaEgipiti mu mitundu ndi kuŵambininiskiya mu vyaru. Sono ndipo ŵakaziŵanga kuti ine ndine Ambuya.”

Currently Selected:

Ezekiele 30: TongaMw

Highlight

Copy

Compare