Ezekiele 28

Karonga waku Turo

1Mazu gha Ambuya ghanguza kwaku ine: 2“Mwana wa munthu, kamba ndi karonga waku Turo, Viyo atiti Ambuya Chiuta:

Chifukwa cha kujikuzga kwa mtima wako,

ndipo wakamba kuti ‘Ndine chiuta,

ndija pa chitengo cha ŵachiuta,

mukati mu zinyanja,’

kweni ndiwe munthu, kuti we chiuta cha,

nanga wamweni utijipima kuŵa wazeru nge ndi chiuta.

3Inya wendi zeru nadi kuruska Danyele;

kulivi kakubisika kwaku iwe;

4mu zeru yako ndipo ndi mukuwamo kwako

wajisambasiska wamweni,

waunjika golide ndi siliva mu

vyakusungamo vyuma;

5ndi chinjeru chako chikuru mumaronda

wandaniska mausambasi ghako,

viyo mtima wako waŵa wakujikuzga mu usambasi wako;

6viyo atiti Ambuya Chiuta:

Pakuti utijighanaghana kuŵa wazeru nge ndi chiuta:

7chifukwa cho, ehe, ndizenge ndi ŵalendo paku iwe,

ŵakofya ukongwa mu mitundu;

ŵakawewepuwanga malipanga ghawo kumikana ndi unozgi wa zeru yako

ndipo ŵakafipiskanga kugadima kwako.

8Ŵakakusiskiyanga pasi pa Zenje,

ndipo ukafwanga nyifwa yaŵakubayika

mukatikati mu zinyanja.

9Kumbi ukakambanga mbwenu kuti, ‘Ndine chiuta,’

mu maso gha ŵakukubaya wo,

po iwe munthu ŵaka, kuti we chiuta cha,

mu manja ghaku wo ŵatukupweteka?

10Ukafwanga nyifwa ya ŵambura kuchinjika

ndi janja la ŵalendo, pakuti ndarongoro,

atiti Ambuya Chiuta.”

11Ndipo so mazu gha Ambuya ghanguza kwaku ine, 12“Mwana wa munthu, buska chitenje pa karonga waku Turo, umunene kuti, Viyo atiti Ambuya Chiuta,

‘Iwe unguzighirika chifukwa cha umampha wakufikapo,

wakuzala vinjeru

wakutowa mu utozi.

13Unguŵa mu Edeni, mu munda waku Chiuta;

mya yose yakuzirwa yenga chakuvwinkha chako,

karneliani, topazi, jaspere,

krusolite, berulo, ndi onike,

safire, karbanike, ndi emaraldi;

vyakujarika ndi vyakuchita kuzganga

vinguchitika ndi golide.

Pa zuŵa lo iwe ungulengeke

ivi vingurongosoleke.

14Pamoza ndi kerubi mlinda wakupakika, ndingukuŵika iwe,

iwe wenga pa phiri lituŵa laku Chiuta,

ungwenda mukati mu mya ya moto.

15Unguŵa wambura kalema munthowa zako

kutuwa muzuŵa lo ungulengeke,

mpaka po kulakwa kungusanirikiya mwaku iwe.

16Mukwandana kwa maronda

ghako unguzazika ndi nkhaza, reka ungulakwa;

chifukwa cho ndingukutaya nge nchinthu chakukazuzgika

kutuwapo pa phiri laku Chiuta,

ndipo kerubi mlinda yo wangukudikiska

kukutuzga mukati mu mya ya moto.

17Chifukwa cha kutowa kwako mtima wako ungujikuzga;

unguvundiska vinjeru vyako chifukwa cha kugadima kwako.

Ndingukupong'a pasi;

ndingukujarika nkhuli paurongo pa ŵakaronga,

kugutiska maso ghawo paku iwe.

18Pa chifukwa cha unandi wa maubendezi ghako,

kureka kuchita urunji mu maronda ghako

ungukazuzga malo ghako ghakupaturika;

viyo ndingutuzga moto mukati mwako;

wo ungukupirizga,

ndipo ndingukusanduska choto pa charu

mu maso ghaku wose wo ŵangukuwona.

19Wose wo ŵatikuziŵa mukati mu ŵanthu ŵazizwa nawe;

wafika ku umari wakofya

ndipo kuti ukaŵangapo so cha muyaya.’ ”

ŴaSidoni

20Ghangundiziya so mazu gha Ambuya: 21“Mwana wa munthu, razga maso ghako ku Sidoni, ndi chima paku iyo. 22Kamba kuti, Viyo atiti Ambuya Chiuta:

“Ehe, ndimikana nawe, Sidoni,

ndikavumbuwanga unkhankhu wangu mwaku iwe.

Ndipo ŵakaziŵanga kuti ine ndine Ambuya,

po ndifiska vyeruzgu vyangu mukati mwake,

ndi kuvumbuwa utuŵa wangu mwaku iyo;

23chifukwa ndikamutumiyanga chideru,

ndi ndopa mu ŵagurwi ŵake;

ndipo ŵakubayika ŵakawanga mukati mwake,

ndi lipanga lo lamikana nayo mose mose.

Penipo ndipo ŵakaziŵanga kuti ine ndine Ambuya.

24“Ndipo pa nyumba yaku Yisraele kuti pakaŵanga so kankhandi wakulasa pamwenga munga wakuŵapweteka cha mukati muŵa kuzengezgana ŵawo wose wo ŵanguŵayuyuwa. Penipo ndipo ŵakaziŵanga kuti ndine Ambuya.

25“Viyo atiti Ambuya Chiuta: Penipo ndikaunganiskanga nyumba yaku Yisraele kutuwa mukati mu ŵanthu mwaku ŵeniwo akuparghang'ikiyamo, ndikuvumbuwa utuŵa wangu mwaku iwo mu maso gha ŵa mitundu, po ndipo ŵakajanga mu charu chawo ndi chawo cho ndikupaska ku mteŵeti wangu Yakobe. 26Ndipo ŵakajangamo kwakufwasa, ŵakazenganga zinyumba ndi kupanda mphereska. Ŵakajanga kwakufwasavi, po ndifiska vyeruzgu paku wose ŵakuzengezgana ŵawo wo ŵanguŵayuyuwa. Sono penipo ndipo ŵakaziŵanga kuti ine ndine Ambuya Chiuta wawo.”

Currently Selected:

Ezekiele 28: TongaMw

Highlight

Copy

Compare