Ezekiele 27
27
Chitenje cha paku Turo
1Mazu gha Ambuya ghanguza kwaku ine: 2“Sono iwe, mwana wa munthu, buska chitenje paku Turo, 3munene Turo, yo waja pakuserere ku nyanja, wa maronda wa ŵanthu ŵamu malikumba ghanandi gha nyanja, viyo atiti Ambuya Chiuta:
Awe Turo, wakamba kuti,
‘Ine nde wakutowa kwakufikapo.’
4Mphaka zako ze mukati imo mwazinyanja;
ŵazengi ŵako ŵakukuzenga wakunozga.
5Ŵangucheka mathabwa ghako ghose
gha milombwa yaku Seniri;
ŵanguto sidara kutuwa ku Lebanoni kukuchitiya mlongoti.
6Miti ya mung'ona yaku Bashani ndiyo ŵangukuseme zinkhafu;
malo ghako ghakujapo ghapachanya
ŵangughakhoma ndi mathabwa gha muŵaŵa
ghakutuwa ku malikumba ghaku Kupro,
ghakunozgeka ndi tuminyanga twa njovu.
7Saru za bafuta za kujeduka zaku Egipiti,
ndizu zenga mathanga ghako,
zachitanga nge ndi mbendera yako;
za bulu ndi zakufyuŵara zakutuwa
kumalikumba ghaku Elisha ndizu zenga chivwinkhu chako.
8Ŵakuja mu Sidoni ndi Arvada
ndiwo ŵenga ŵamlima nyanja;
ŵanthu ŵazeru ŵaku Zemere ŵenga mwaku iwe,
ndiwo ŵenga ŵakwendeska zingaraŵa.
9Ŵara-ŵara ŵaku Gebala ndi ŵanthu
ŵawo ŵazeru ŵenga mwaku iwe,
ŵenga ŵakusindiya marunga gha ngaraŵa;
ngaraŵa zose za mu nyanja pamoza ndi
ŵakuteŵeta ŵawo ŵenga mwaku iwe,
kugulana maronda ghako.
10“Perese, Ludi ndi Puti ŵenga mu nkhondo yako ngembanthu ŵakurwa nkhondo; ŵangupayika nguru ndi chisoti mwaku iwe; ŵangukupaska lumbiri. 11Ŵanthu ŵaku Arvada ndi Heleki ndiwo ŵanguzingirizga malinga ghako ndipo ŵanthu ŵaku Gamada ŵenga mu vitanthali vyako; ŵangukoroŵeka nguru zawo kuzingirizga malinga ghako; ŵangukutoweska kwakufikapo.
12“Tarshishi wanguchita nawe maronda chifukwa cha usambasi wako unandi wa mtundu mtundu; siliva, chisulo, tini, ndi muthovu wo ŵangusinthiskana ndi maronda ghako. 13Javani, Tubala, ndi Mesheke ŵanguchita nawe maronda; ŵanguguliskana ŵanthu ndi viyaŵi vya mkuŵa mu maronda ghako. 14Bete-togarma wanguguliskana maronda ndi iwe ndi ŵakavalo, ŵakavalo ŵankhondo, ndi nyulu. 15Ŵanthu ŵakuRodo ŵanguchita nawe maronda; malikumba ghanandi gha nyanja ghenga misika yako yakuziŵikwa, pakuzachikulipa iwe ŵangukupingiya minyanga ya njovu ndi miti ya mbawa. 16Edomu wanguchita nawe maronda chifukwa cha vyamampha vyako vinandi; wangugulana nawe mya yakuzirwa, vyakufyuŵara, vya maŵanga-maŵanga bafuta wakutowa, malikorombe, ndimya yiyera yakuzirwa. 17Yuda ndi Yisraele ŵanguchita nawe maronda; ŵangugulana nawe trigu, ma olive ndi nkhuyu za mruwuku, uchi, mafuta, ndi mankhwala ghakuchizgiya. 18Damasko wanguchita nawe maronda chifukwa cha usambasi wako ukuru mu vinthu vyose; vinyo waku Helboni, ndi weya utuŵa, 19vinyo waku Uzala ŵangusinthiskana ndi maronda ghako; visulo vya kusula, kasia, ndi Kalamusi ndivyo vyenga vyakugulana mu maronda ghako. 20Dedani wangugulana nawe maronda mu vyakuvwara vyakuŵika pa vyakugarapo. 21Arabia ndi mafumu ghose ghaku Kedara ndiwo ŵenga ŵa maronda ŵakukhumbikwa ukongwa chifukwa cha mberere, ŵabira, ndi mbuzi; mwaku ivi ndimo ŵanguchita nawe maronda. 22Ŵa maronda ŵaku Sheba ndi Rama ŵangugulana nawe; ŵangusinthiskana nawe ndi vyakuzirwa vyakununkhira vya mtundu mtundu, ndi vya mya yose yakuzirwa, ndi golide. 23Harani, Kane, Edeni, Ashuru ndi Kilmada ŵanguchita nawe maronda. 24Aŵa ŵangugulana ndi iwe mu vyakuvwara vyakusankhika, mu saru za bulu ndi za maŵanga-maŵanga, ndi mikeka ya milala ya mitundumitundu, yakukurungika ndi vingwe vyakukhozge mumphepete; mwaku ivi ndimo ŵanguchita nawe maronda. 25Ngaraŵa zaku Tarshishi zingukwende chifukwa cha maronda ndi iwe.
Viyo unguzazika ndi katundu munandi mukati mu zinyanja.
26Ŵamlima nyanja ŵako ŵangukutore iwe mu nyanja zikuru.
Mphepo yaku vuma yakufyore mukati mu zinyanja.
27Usambasi wako, vyuma vyako, ndi maronda ghako gha vyakugulana,
ŵakwendeska ndi ŵarongozgi ŵa ngaraŵa,
ŵakusindiya ngaraŵa, ŵakugula maronda ghako,
ŵanthu ŵako wose ŵankhondo wo ŵe ndi iwe,
pamoza ndi mzinda wose wo we mukati mwako,
mudodome mukati mu zinyanja pa zuŵa la kupasuka kwako.
28Pa chibumuzi cha kuliya kwa ŵarongozgi ŵa ngaraŵa
charu chisukunika,
29kutuliya pasi pa ngaraŵa zawo
wose ŵakuvuŵa nkhafu.
Ŵakwendeska pamoza ndi wose ŵakurongozga ngaraŵa mu nyanja
ŵaza ŵama pa likumba.
30Ŵatenje kwakubongo paku iwe, kuliya kwakuŵaŵa mtima.
Kudira fuvu ku mitu yawo ndi kugadabuka mu vyoto;
31ŵajimeta maphara chifukwa chaku iwe,
kujivwarika vigudulu,
ŵaliriya paku iwe mwakuŵaŵa kwa mtima,
ndi kutenje kwa kupweteka.
32Mukukunkhuruka kwawo ŵasoka chitenje paku iwe,
watenjere iwe:
‘Njani yo wakupasukapo kali nge ndi Turo
mukati mu nyanja?
33Ghachiza maronda ghako kutuwa mu zinyanja,
ungugutiska ŵanthu ŵanandi ukongwa;
ndi uzali wa usambasi wako ndi maronda ghako
ungusambasiska ŵakaronga ŵa charu.
34Sono wasweke mu nyanja,
mu zindimba za maji;
ŵamaronda ndi ŵamlima Nyanja wose ŵaliriya pamoza nawe.
35Wose ŵakuja mu malikumba gha nyanja ŵazizwa paku iwe;
ndipo ŵakaronga ŵawo ŵe mu mantha ghakuru,
visku vyawo vyang'anamuka.
36Ŵamaronda woŵe mukati mu ŵanthu ŵatukumbiya twa kayuzi;
wafika ku umari wakofya
ndipo kuti ukaŵangapo so cha muyaya.’ ”
Currently Selected:
Ezekiele 27: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
