Ezekiele 15

Yerusalemu ndi mphereska vambura kupasa vipasi

1Mazu gha Ambuya ghanguza kwaku ine, 2“Mwana wa munthu, Kumbi muti wa mphereska uruska uli miti yose yinyake, mphanda ya mphereska yo ye mukati mu miti yamu lisuwa? 3Kumbi ŵatoko nkhuni kwaku wo ndi kuchita nawo kanthu ke kose? Kumbi ŵanthu ŵatoko chipharaŵaja ndi kupayikapo chiyaŵi die chose? 4Awona, chipong'eka ku moto kuti chiŵi nkhuni; sono asani moto wanyekeska uku ndi uku, ndi pakati viyo, kumbi chingaŵa ndi nchitu ye yose? 5Ehe, po chenga cha msuma, kuti chinguŵa ndi nchitu ye yose cha; ndi uli ukongwako asani moto wanyekeska ndi kupirizga, kumbi chingaŵa so ndi nchitu ye yose! 6Chifukwa cho atiti Ambuya Chiuta: Nge ndi nkhuni ya mphereska mukati mu miti yamu lisuwa yo ndapereka ku moto, viyo so ndimu ndiperekiyenge ŵakuja mu Yerusalemu. 7Ndikarazganga chisku changukumikana nawo; nanga ŵangapozomoka ku moto, kweni ndipuuli moto ukaŵarghanga; ndipo mukaziŵanga kuti ine ndine Ambuya, po ndirazga chisku changu kumikana nawo. 8Ndipo ndichitiskenge charu chiŵe mapopa, chifukwa ŵachita kwambura magomezgeka, atiti Ambuya Chiuta.”

Currently Selected:

Ezekiele 15: TongaMw

Highlight

Copy

Compare