Ezekiele 11

Wakupatika ndi Chiuta

1Mzimu ungundinyamuliya pachanya, ungunditore ku likomo la kuvuma la nyumba ya Ambuya, lo lilereska kuvuma. Ndipo wonani, pa likomo lapa khomo penga ŵanthu machumi ghaŵi ndi ŵankhonde; mukati mwawo ndinguwona Yazaniya mwana waku Azuru, ndi Pelatiya mwana waku Benaya, mafumu gha ŵanthu. 2Ndipo wangunena nane, “Mwana wa munthu, yaŵa mbanthu wo ŵaghanaghana utimbanizi ndi kupereka fundu ziheni mu msumba uwu; 3wo ŵatiti, ‘Nyengo kuti yaŵandika cha yakuzenge zinyumba; msumba uwu nchiŵiya, ndipo ifwe te nyama.’ 4Mu chifukwa cho uŵachimiye iwo, chima A! Mwana wa munthu.”

5Ndipo Mzimu wa Ambuya unguza paku ine, ungunena nane, “Kamba, Viyo atiti Ambuya: ndimo mughanaghaniya, owe nyumba yaku Yisraele; pakuti ndiziŵa vinthu vyo vituza mu mtima winu. 6Imwe mwandaniska ŵakubayika ŵinu mu msumba uwu, ndipo mu ŵagurwi mwazaza ndi ŵakubayika. 7Chifukwa cho Ambuya Chiuta, atiti; Ŵakubayika ŵinu wo mwagoneka Mukati mwake, ndiwo nyama, msumba uwu nchiŵiya; kweni imwe mukatuzgikanga mukati mwake. 8Mwawopa lipanga; ine ndikatoriyanga lipanga paku imwe, atiti Ambuya chiuta. 9Ndipo ndikakutuzganinga mukati mwake, ndi kukuperekani mu manja gha ŵalendo, nderuzgenge paku imwe. 10Mukawanga ndi lipanga; ndikweruzgeninga mu mphaka ya Yisraele; ndipo mukaziŵanga kuti ine ndine Ambuya. 11Msumba uwu kuti ukaŵanga chiŵiya chinu cha, nanga ndimwe kuti mukaŵanga nyama mukati mwake cha; ndikweruzgeninga mu mphaka ya Yisraele; 12ndipo mukaziŵanga kuti Ine ndine Ambuya; Chifukwa kuti mwenda mu virunguchizgu vyangu, nanga nkhuchita malangulu ghangu cha, kweni mwachita kwakiyana ndi malangulu gha mitundu yo yamuzingirizgani.”

13Ndipo kunguŵa kuti, po ndachimanga, kuti Peletiya mwana waku Benaya wakufwa. Ndinguwa kavunama, ndinguliya kwakubangula, kuti, “Owe Ambuya Chiuta! Kumbi mukamaliyanga limu tetete ŵakujapo ŵa ŵaYisraele?”

Phanganu laku Chiuta kwaku wo ŵatoleke mu uŵanda

14Mazu gha Ambuya ghanguza kwaku ine: 15“Mwana wa munthu, ŵana ŵanyako, inya ŵana ŵanyako, ŵamikoli ŵanyako, nyumba yose yaku Yisraele, inya wose, ndiwo pakuŵeniwo ŵakuja mu Yerusalemu ŵakamba kuti, ‘Wakuruta kutali kutuwako ku Ambuya; charu ichi chapaskika kwaku ifwe kuŵa chihara.’ 16Chifukwa cho unene kuti, ‘Viyo atiti Ambuya Chiuta: Nanga ndikuŵadikiskiya kutali mukati mu mitundu, nanga ndikuŵambiniska mukati mu vyaru, kweni ndipuuli kwaku iwo ndaŵa malo ghakupaturika kwa nyengo yimanavi mu vyaru mo ŵakuya.’ 17Chifukwa ichi unene kuti, ‘Viyo atiti Ambuya Chiuta: Ndikawunjikanga imwe kutuwa mu ŵanthu, ndi kuwungang'iska imwe kutuwa mu vyaru vyo mungumbininikyamo, ndipo ndikakupaskaninga charu cha Yisraele.’ 18Ndipo ŵatakuti ŵaza muwa ŵakatuzgangamo ukazuzi wake wose ndi maunyakazi ghake. 19Ndiŵapaskenge mtima umoza, mukati mwawo ndiŵikenge mzimu ufya; ndituzgengemo mtima wa mwa mu liŵavu lawo ndi kuŵapaska mtima wa munofu, 20mwakuti ŵendenge mu virunguchizgu vyangu, kusunga ndi kuvwiya malangulu ghangu; ŵakaŵanga ŵanthu ŵangu, ndipo ine ndikaŵanga Chiuta wawo. 21Kweni kwaku ŵeniwo mitima yawo yitunthwiya mu maukazuzi ndi maunyakazi ghawo, ndiwezgiyenge nchitu zawo pa mitu ya ŵeneko, atiti Ambuya Chiuta.”

22Sono makerubi ghangusoska mapapa ghawo, ndi mikombelo pamoza nagho; ndipo unkhankhu waku Chiuta waku Yisraele wenga pachanya pawo. 23Unkhankhu wa Ambuya unguruta kutuwa mukati mu msumba, unguma pachanya pa phiri lo le kuchiri kuvuma kwa msumba. 24Mzimu ungundisoska unguditore mu chiwona ndi Mzimu waku Chiuta ku Kaldiya, ku ŵamikoli. Ndipo chiwona cho ndinguwona chingukwera kutuwako kwangu. 25Ŵamikoli ndinguŵakonkhome vinthu vyose vyo Ambuya angundirongo.

Currently Selected:

Ezekiele 11: TongaMw

Highlight

Copy

Compare