Ezekiele 10

Kocheka kwa msumba

1Ndingulereska, ndipo ehe, pa mtambo uwa wenga pachanya pa mitu ya makerubi panguwoneka pachanya pawo chakukozgana ulaka ndi mwa wa satire, mu kaŵiro ka chitengo cha ufumu. 2Wangukamba ndi munthu wakuvwara bafuta yo, wanguti, “Ruta, sere pakati pa mikombelo yo ye pasi pa makerubi; zaza manja ghako ndi maka gha moto gho ghe pakati pa makerubi, ughaparghang'iye pachanya pa msumba.” Ndingumuwona wachiseremo. 3Sono makerubi ghanguma kuchiri ku malaŵi kwa nyumba po munthu waserengamo, mtambo unguzaza luluwa lamukati. 4Ndipo unkhankhu wa Ambuya ungukwera kutuwa pa makerubi kuza pa chiwundu cha nyumba; mtambo unguzaza nyumba, sono luluwa linguzazika ndi kugadima kwa unkhankhu wa Ambuya. 5Kugunda kwa mapapa gha makerubi kunguvwika mpaka ku luluwa la kubwaro, ulaka ndi mazu ghaku Chiuta Wanthazizose pa warongoro. 6Ndipo po wanguti walanguliya munthu wakuvwara bafuta yuwa kuti, “To moto pakati pa mikombelo, pakati pa makerubi,” wangusere ndi kuma pafupi ndi mkombelo. 7Kerubi pakati pa makerubi, wangunyoroske janja lake ku moto wo wenga pakati pa makerubi, wangutopo unyake wanguŵika mu manja gha munthu wakuvwara bafuta, wanguti waronde wangutuwa. 8Makerubi ghanguwoneka kuŵa ndi kawonekero ka janja la munthu kusi ku mapapa ghawo.

9Ndingulereska, ehe, pafupi ndi makerubi penga mikombelo yinayi, umoza pa kerubi we yose; kawonekero ka mikombelo kenga ulaka ndi mwa wa Krisolite wa kujeduka. 10Mukawonekero kawo, yose yinayi yenga yakuyana, ulaka nge mkombelo wenga mukati mu mkombelo. 11Yichiruta, yingwende mu vigaŵa vyawo vyose vinayi, kwambura kung'anamuka pakwenda, kweni kose ko mkombelo wa paurongo ungurazga yose yingurazga kweniko, kwambura kung'anamuka pakwenda. 12Ndipo vizinga vyawo, ndi tuvisulu twawo tumana tumana twakukhozge, ndi mikombelo viyo yenga yakuzaza maso zingirizgi mikombelo yo ŵanayi wo ŵenga nayo.

13Mikombelo yo, mukuvwa kwangu, yingudanika mikombelo yakugadabuwa. 14Ndipo we wose wenga ndi visku vinayi: chisku cha kudanga chenga chisku cha kerubi, chisku cha chiŵi chenga chisku cha munthu, chisku cha chitatu chenga cha nkharamu, ndipo chisku cha chinayi chenga cha nombo. 15Makerubi ghangukwera. Ivi vyenga vyamoyo vyo ndinguwona ku msinji wa Kebara. 16Ndipo po makerubi gharutanga, mikombelo yingwenda pamoza nagho; po makerubi ghangusoska mapapa ghawo kuti ghaphururuke kutuwa kucharu, mikombelo kuti yingutuwako cha. 17Po makerubi ghangume chisisi, iyi nayo yinguma chisisi, po ghangukwera, iyi nayo yingukwera pamoza nagho; pakuti mzimu wa vyamoyo vyo wenga mwaku yo. 18Sono unkhankhu wa Ambuya unguruta kutuwa pa chiwundu cha nyumba, ndi unguma pachanya pa makerubi. 19Ndipo makerubi ghangusoska mapapa ghawo kutuwa ku charu, ndingughawona ndi maso ghangu ghachiruta, ndi mikombelo pamoza nagho; ndipo ghanguma pa khomo la likomo lakuvuma la nyumba ya Ambuya; ndipo unkhankhu waku Chiuta waku Yisraele wenga pachanya pawo. 20Ivi vyenga vyamoyo vyo ndinguwona pasi paku Chiuta waku Yisraele pa msinji Kebara; ndipo ndinguziŵa kuti ghenga makerubi. 21Yose wenga ndi visku vinayi, mapapa ghanayi, ndipo kusi ku mapapa ghawo kwenga kawonekero ka manja gha munthu. 22Chikozgu cha visku vyawo vyenga nadi visku vyo kawonekero kake ndinguviwona pa msinji Kebara. Vyose vingwenda nyoronyoro kurazga kunthazi.

Currently Selected:

Ezekiele 10: TongaMw

Highlight

Copy

Compare