Ezekiele 1

Chiwona chaku Ezekiele

1Pa zuŵa la chinkhonde, mwezi wa chinayi, mu chirimika cha chumi ndi vitatu, penipo ndenga mukati mu ŵamikoli ku msinji Kebara, machanya ghangujurika, ndipo ndinguwona viwona vyaku Chiuta. 2Pa zuŵa la chinkhonde la mwezi (chenga chirimika cha chinkhonde cha karonga Yehoyakini ku umkoli), 3mazu gha Ambuya ghanguza kwaku Ezekiele mzukuru, mwana waku Buzi, mu charu cha ŵaKaldiya ku msinji Kebara; ndipo janja la Ambuya linguŵa nayo kwenikuwa.

4Po ndingulereska, awonani, mphepo ya Kavuru-vuru yinguza kutuliya ku nkhonde, ndi bingu likuru, ndi ukweru wakulizunguliya, ndi moto walipukanga rutaruta, mukati mwa moto mwenga dangalira la mkuŵa. 5Ndipo mukati mwake mungutuwa vikozgu vya vyamoyo vinayi. Kawonekero kaku vyo kenga viyo: vyenga ndi kawonekero ka ŵanthu, 6kweni chimoza ndi chimoza chenga ndi visku vinayi, ndi mapapa ghanayi. 7Marundi ghawo ghenga ghakunyoroka, ndipo vikandiro vyamarundi ghawo vingukozgana ndi vikandiro vya thole; ndipo vyagadimanga nge ndi mkuŵa wakugadima. 8Vyenga so ndi manja gha munthu kusi kumapapa ghawo mu mbegheka zawo zinayi. Ndipo vinayi vyenga ndi visku vyawo ndi mapapa ghawo: 9Mapapa ghawo ghangukorana limoza ku linyake; vyose vyendanga kwakunyoroka kurazga ku nthazi, kwambura kung'anamuka pa kwenda. 10Chikozgu cha visku vyawo chenga viyo, chimoza ndi chimoza chenga ndi chisku cha munthu ku nthazi; chisku cha nkharamu kuchiri kumarghe, chisku cha ng'ombe kuchiri ku maze, ndi chisku cha nombo kuchiri ku msana. 11Viyo ndimu vinguŵiya visku vyawo. Mapapa ghawo ghangutambasukiya kuchanya; chamoyo chose chenga ndi mapapa ghaŵi, limoza laku gho ghaŵi lingukorana ndi phapa linyake, po ghaŵi ghangubenekere maliŵavu ghawo. 12Chose chingwenda kwakunyoroka kurazga ku nthazi; kweniko kose mzimu ungurazga, vinguruta kweniko, kwambura kung'anamuka pakwenda. 13Mukati mu vyamoyo vyo mwenga chinthu chinyake cho chinguwoneka ulaka ndi maka ghakunyeka gha moto, nge ndi malumbuni ghakwenda uku ndi uku mukati mu vyamoyo vyo; ndipo moto wakolenga, limphezi lingutuwa mukati mu moto. 14Ndipo vyamoyo vyo vyandwandwanthanga kunu ndi kuwa, nge nkhumwetuka kwa limphezi.

15Sono po ndinguti ndalereska pa vyamoyo, ndinguwona mkombelo pa charu pafupi ndi vyamoyo vyo, umoza pa chamoyo che chose. 16Kawonekero ka mikombelo ndi kanozgekero kake: kawonekero kake kenga nge nkhugadima kwa mwa wa Krisolite; ndipo yose yinayi yenga ndi kawonekero kakukozgana, kapangikiro kake kenga mkombelo mukati mu mkombelo. 17Pa kuruta, yayendiyanga mu vigaŵa vyawo vyose vinayi kwambura kung'anamuka pakwenda. 18Mikombelo yinayi yenga ndi vizinga ndi tuvisulu, tumana tumana twakukhozge; vizinga vyawo vinguzingirizgika ndi maso. 19Ndipo penipo vyamoyo vyo vyayendanga, mikombelo yingwenda pamoza navyo; po vyamoyo vingunyamuka kutuwa pasi mikombelo nayo yingunyamuka. 20Kweniko kose mzimu ungurata, navyo vingurata kweniko, ndipo mikombelo yingusoka pamoza navyo; pakuti mzimu wa vyamoyo vyo wenga mu mikombelo. 21Po viya vingwenda, iyo nayo yingwenda; ndipo po viya vinguma, iyo nayo so yinguma; po viya vingusoka kutuwa pasi mikombelo yingusoka pamoza navyo; chifukwa mzimu wa vyamoyo vyo wenga mu mikombelo. 22Pachanya pa mitu ya vyamoyo panguŵa chakukozgana ndi mtambo, chakuŵala nge ndi mwa wa sangalawe, chakutambalurikiya pachanya pa mitu yawo. 23Ndipo mapapa ghawo ghangunyoroskeke kusi ku mtambo, limoza kurazga ku linyake; chamoyo chose chenga ndi mapapa ghaŵi kubenekere liŵavu lake. 24Ndipo po vyarutanga, ndinguvwa kamphomezi nge nkhamphomezi ka maji ghanandi, nge nkhundiririska kwa Wanthazizose, kamphomezi kakofya nge nkhamphomezi ka mzinda; po vinguma jo vingusiskiyapasi mapapa ghawo. 25Ndipo kungutuwa mazu kuchanya ku mtambo wapa mitu yawo; po vinguma chisisi, vingusiskiya pasimapapa ghawo.

26Ndipo pachanya pa mtambo wapa mitu yawo penga chikozgu cha chitengo, cha kawonekedu ulaka ndi mwa wa satire; ndipo wakuja pachanya pa chikozgu cha chitengo cho wangukozgana ulaka ndi munthu. 27Ndipo kutuwa paku cho chinguwoneka ulaka nchiwunu chake kukwere kuchanya ndinguwona ulaka nkhugadima kwa mkuŵa, nge nkhawonekero ka moto zingirizgi; ndipo kutuwa pakucho chenga ndi kawonekero ka chiwunu chake kusikiya pasi ndinguwona kawonekero ka moto, ndipo panguŵa ukweru kwakumuzunguliya. 28Nge nkhawonekero ka chiŵinga-vuwa mu mtambo pa zuŵa la vuwa, ndimo ukweru wakuzunguliya pa unguwoneke.

Agha ndigho ghenga mawonekero gha chikozgu cha unkhankhu wa Ambuya. Po ndinguchiwona ichi, ndinguwa kavunama, ndipo ndinguvwa mazu gha yumoza kurongoro.

Currently Selected:

Ezekiele 1: TongaMw

Highlight

Copy

Compare