Chitenje 5
5
Ŵadandauliya Ambuya pa soka la uŵanda wawo
1Kumbukani, Ambuya cho chatiwiya;
teskani, ndi wonani kulengeskeka kwidu!
2Chihara chidu chang'anamulikiya ku ŵalendo,
nyumba zidu ku ŵamwenda nthowa.
3Taŵa ŵana ŵaranda, ŵamburawuskeu,
ŵanyinafwe ŵenge ndi vyoko.
4Tilipila maji ghenigho titumwa,
nkhuni zo tideŵa tigula.
5Tidikiskika ukongwa ndi gori pa makhosi ghidu
tavuka tilivi kupumuzgika.
6Tichita kuko rundi ku ŵaEgipiti ndiku Asiriya,
kuti tiŵe ndi kurgha kwakuguta.
7Auskefwe ndiwo ŵangulakwa,
ndipo sono kuti mbamoyo cha
kweni ifwe tinyamuwa uheni wawo.
8Ŵaŵanda ndiwo ŵatitiusa;
palivi nanga njumoza wakutiwombo ifwe ku janja lawo.
9Tisaniya kurgha kwidu muunonono wa nyifwa,
chifukwa cha lipanga mu bozwa.
10Khungu lidu ndamoto nge mpha chipa,
chifukwa chakuŵaŵa kwa nja.
11Ŵanthukazi ŵati ŵakwala mu Zioni,
ŵamwali mu misumba yaku Yuda.
12Ŵana ŵa mafumu ŵati ŵapayika ndi manja ghawo;
ulemu kuti ulongoreka cha ku ŵaraŵara.
13Ŵanyamata ŵachichizgika kupera pa mphe;
ndipo ŵana ŵahurwa ŵazendazenda ndi mitolo ya nkhuni.
14Madoda ghareka kuja pachipata chamsumba
ŵanyamata ŵareka kumba sumu zawo.
15Likondwa la mitima yidu lamara;
kuvina kwidu kwasanduka chitenje.
16Chifuku cha ufumu chambotokako ku mutu widu;
Owe! Soka ifwe, pakuti talakwa!
17Chifukwa chaku ichi mtima widu watama
chifukwa cha vinthu ivi maso ghidu ghachita ndandi.
18Chifukwa cha phiri Zioni lo ndauyiku;
ŵakambwe ŵatendatenda paku lo.
19Kweni imwe, Ambuya, muwusa muyaya;
chitengo chinu chikiyakiya ku migonezi yose.
20Chifukwa chine mutitiruwa muyaya,
chifukwa chine mwatijowo nyengo yitali?
21Tiwezgiyeni kwaku mwaŵeni Ambuya, alinga kuti tiwezgeke!
Nozgani so mazuŵa ghidu nge ndimo ghanguŵiya kale!
22Pamwenga kumbi mwatipatiya limu?
Kumbi mwakaripiya limu paku ifwe?
Currently Selected:
Chitenje 5: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
