Wakutaula 3
3
Vyose vye ndi nyengo yake, Chiuta ndiyo wakuviŵika vyose
1Kanthu kose kendi nyengo yake, ndi nyengo ya kafukwa ke kose pasi pa charu:
2nyengo yakupapikiya, ndi nyengo yakufwiya;
nyengo yakupandiya, ndi nyengo yakuzuliya cho chingupandika;
3nyengo yakubayiya, ndi nyengo yakuchizgiya;
nyengo yakubwanganduliya pasi, ndi nyengo yakuzenge;
4nyengo yakuliriya, ndi nyengo yakuseke;
nyengo yakutenjere, ndi nyengo yakuviniya;
5nyengo ya kutaya mya, ndi nyengo yakuwunjika mya pamoza;
nyengo yakupakata, ndi nyengo yakureka kupakata;
6nyengo yakupenje, ndi nyengo yakutayiya;
nyengo yakusunga, ndi nyengo yakupong'a;
7nyengo yakuparuliya, ndi nyengo yakusone;
nyengo yakuja chisisi, ndi nyengo yakurongoro;
8nyengo yakwanja, ndi nyengo yakutinkha;
nyengo ya nkhondo, ndi nyengo ya chimangu.
9Nchine chanduwu cha wanchitu mu kutakataka kwake?
10Ndawona suzgu yo Chiuta wapaska ku ŵana ŵa ŵanthu kuti ŵasuzgike nayo. 11Wachita vinthu vyose kuŵa vyakutowa mu nyengo yake; waŵika so umuyaya mu mtima wa munthu kweni ndipuuli palivi yo waziŵiska cho Chiuta wachita kutuliya ku kwamba mpaka ku umari. 12Ndiziŵa kuti kulivi kamampha kwaku iwo kwakuruska kukondwa ndi kusekere mwaku iwo ŵija po ŵeche ndi umoyo; 13ndipo so nchawezi chaku Chiuta ku munthu kuti yose warghe ndi kumwa ndi kukondwere mu nchitu zake zose. 14Ndiziŵa kuti chose cho Chiuta wachita chikajaririyanga muyaya; kuti kakasazgikiyangako kanyake nanga nkhutuzgapo kanthu kanyake kwaku cho cha; Chiuta wachichita ichi mwakuti ŵanthu wopenge paurongo pake. 15Cho chiriko chinguŵako ndi kale, cho chikaŵangako chinguŵako kale; ndipo Chiuta wapenja cho chadikiskikiya kutali. 16Ndipo so ndinguwona panu pasi kuti mu malo gha cheruzgu uheni wenga mwenimuwa, ndi mu malo gha urunji, namu so ukazuzi wenga mwenimuwa. 17Ndingunena mu mtima wangu, Chiuta wakeruzganga ŵarunji ndi ŵaheni, pakuti wamika nyengo pa kafukwa ke kose, ndi pa nchitu ye yose. 18Ndingunena mu mtima wangu vya pa ŵana ŵa ŵanthu, kuti, Chiuta watiŵesa, kuŵarongo iwo kuti nkhanthu cha kweni nyama za mu dondo. 19Pakuti cho chiwiya ŵana ŵa ŵanthu ndi cho chiwiya nyama nchimoza; nge ndimo chimoza chifwiya ndimo chinyake nacho chifwiya. Vyose vyendi mvuchi umoza, ndipo munthu kuti waruskako ku vinyama cha; pakuti vyose vyawaka. 20Vyose virata ku malo ghamoza vyose vyakutuliya ku fuvu, ndipo vyose viwere so ku fuvu. 21Ndiyani waziŵa kuti mzimu wa munthu ukwere kuchanya ndi mzimu wa nyama usikiya kusi ku charu? 22Mu chifukwa ichi ndinguwona kuti kulivi kamampha kwakuruska kuti munthu wakondweriyenge nchitu yake, pakuti lenilo ndilo phande lake; ndiyani yo wakamutoriyanga kukuwona vyo vituza pavuli pake?
Bible Society of Malawi