Wakutaula 2
2
Vya umoyo uno visintha kukondweska mtima
1Ndingurongoro mu mtima wangu, “Zanga sono, ndikwesenge ndi likondwa; kondwanga wamweni.” Kweni ehe, ichi nachu so chenga chawaka. 2Ndingukamba za kuseka, “Nkhufuntha,” ndi za likondwa, “Kumbi lendi kanthu uli?” 3Ndingupenja ndi mtima wangu mo ndingasangaruskiya liŵavu langu ndi vinyo, mtima wangu weche kundirongozga mu vinjeru ndimo ndingakore, uzereza, mpaka penipo ndinguwona cho nchamampha ku ŵana ŵa ŵanthu kuchita pasi pa mtambo mu mazuŵa ghamanavi gha umoyo wawo. 4Ndinguchita nchitu zikuru; ndinguzenga zinyumba ndingujipandiya mphereska; 5ndingujilimiya minda ndi malo ghakupumuliyamo, ndipo ndingupandamo miti yose ya vipasi ya mitundu mitundu. 6Ndingujichitiya viziŵi vya maji ghakudiriya lisuwa la miti yakume. 7Ndingugula ŵaŵanda ŵanthurumi ndi ŵanthukazi, ndenga ndi ŵaŵanda ŵakuwiya mu nyumba yangu; ndipo ndenga so ndi usambasi ukuru wa miskambu ndi vyakuŵeta, kuruska wose wo ŵenga mu Yerusalemu ine ndenga ndindaŵeko. 8Ndinguwunjikiya so siliva ndi golide ndi usambasi wa ŵakaronga ndi vigaŵa vya charu ndinguŵa ndi ŵakumba ŵanthurumi ndi ŵanthukazi, ndi mbiligha zinandi, likondwa la munthu. 9Viyo ndinguŵa mukuru kuruska wose wo ŵenga mu Yerusalemu paurongo pangu; ndipo so vinjeru vingujaririya mwangu. 10Ndipo cho chose maso ghangu ghangukhumba kuti ndingughajara cha; ndengavi kukanizga mtima wangu ku likondwa le lose pakuti mtima wangu ungusaniya likondwa mu nchitu zangu zose, ndipo iyi yenga mphoto ya mukutakataka kwangu kose. 11Sono ndingupima vyose vyo manja ghangu ghanguchita ndi nchitu zo ndingusuzghika nazo kuchita, ndipo ehe, chose chenga chawaka ndi suzgu ya mtima, ndipo kwengavi chanduwu pa charu chapasi. 12Viyo ndingung'anamuka kughanaghana vinjeru, kufuntha, ndi uzereza; chifukwa wangachitanji munthu yo watuza pavuli pa karonga? Nchenicho pe wakuchita kale. 13Penipo ndinguwona kuti vinjeru viruska uzereza nge ndimo ukweru uruskiya mdima. 14Maso gha munthu wa vinjeru ghe mu mutu wake, kweni wakupusa watenda mu mdima, ndipuuli ndingupanikizga kuti chinthu chimoza chituziya kwaku wo wose. 15Penipo ndingurongoro mu mtima wangu, “Chenicho chiwiya wakupusa chikawiyanga so ine; nanga chifukwa nchine ine ndaŵa wavinjeru ukongwa?” Ndipo ndingukamba mwaku ndamweni kuti ichi nachu so nchawaka. 16Pakuti wazeru kuti wakumbukika nyengo zose kuruska wakupusa cha pakuwona kuti mu mazuŵa gha ghatuza wose ŵakaluwikanga. Kumbi wa vinjeru watufwa uli nge ngwakupusa? 17Viyo ndinguwutinkha umoyo, chifukwa cho chikuchitika mu charu chapasi nchakundipaska chitima pakuti vyose vyawaka ndipo ndi suzgu ya mtima. 18Ndingutinkha milimu yangu yose yo ndingusuzgika nayo panu pasi, pakuwona kuti nditenere kuyisiliya kwaku mweniyo wakazanga pavuli pangu; 19ndipo ndiyani waziŵa manyi wakawanga wa vinjeru pamwenga muzereza? Ndipuuli wakawusanga pa milimu yangu yose yo ndasuzgika nayo pakuchita vinjeru vyangu. Ichi nachu so nchawaka. 20Viyo ndingung'anamuka ndi kutaya mtima wangu pasuzgu yose ya kutakataka kwangu panu pasi, 21chifukwa panyake munthu yo wachita nchitu mu vinjeru ndi kuwamo ndi ung'ombwa watenere kusiya vyose mwakuti munthu yo walivi kusuzgikiyapo ndiyo wakondwenge navyo. Ichi nachu so nchawaka ndipo mbuheni ukuru. 22Kembi munthu wendi kane pa nchitu zose ndi visuzgu vyake mwaku vyenivyo wasuzgika navyo panu pasi? 23Pakuti mazuŵa ghake ghose ghazaza ndi urwirwi, ndipo nchitu yake ndi vitima; nanga mbusiku mtima wake kuti upumuwa cha. Ichi nachu so nchawaka. 24Kulivi chamampha chakumwenere munthu kwakuruska kuti warghe ndi kumwa ndi kusaniya likondwa mu nchitu yake. Ichi nacho ndinguchiwona, nchakutuliya ku janja laku Chiuta; 25pakuti pade paku Iyo ndiyani wangargha pamwenga ndiyani wangaŵa ndi likondwa? 26Chifukwa ku munthu yo watimukondweska, Chiuta wapaska vinjeru, kuwamo, ndi chimwemwe; kweni ku mulakwi wapaska suzgu ya kuwunjika ndi kuyereka, mwakuti wapereke kwaku mweniyo Chiuta wakondwa nayo. Ichi nachu so nchawaka ndi suzgu ya mtima.
Bible Society of Malawi