Marangu 19

Mizi yakutaskikiyamo

(Maŵerengedu 35.9-28; Yoswa 20.1-9)

1“Penipo Ambuya Chiuta winu wamumara mitundu yeniyo, charu chawo Ambuya Chiuta winu wampaska imwe, ndipo imwe mwakuŵakwamphuwa ndi mwamuja mu misumba yawo ndi mu nyumba zawo, 2mwakujipatuliya pade misumba yitatu, kujipatuliya mu charu chenicho Ambuya Chiuta winu watukupaskani kuŵa chinu. 3Mukalongosonga miseu, ndi kugaŵa vigaŵa vitatu charu chenicho Ambuya Chiuta winu watukupaskani nge nchinu, mwakuti yose wakubaya munthu wangathaŵiyako.

4“Uku nkhulongosole mubaya munthu, mweniyo pakuthaŵiya kwenikuwa wangataska umoyo wake. Asani we yose wabaya muzengezgani wake kwambura kumufinga, pakuwura kuŵa nayo ndi mawongo kale. 5Uli ndimo munthu warutiya ku dondo kwachitema chimuti, ndipo janja lake lizungung'a mbavi kuti wateme pasi chimuti, ndipo mbavi yikhweruka mu chaka ndi kutema muzengezgani wake, ndi watufwa. Yo munthu wangaziŵa kuthaŵiya ku umoza wa misumba iyi ndi kutaska umoyo wake, 6vinu wakutaya thayu la ndopa, mu ukari wa ufyu, wandondoloskenge yuwa mubaya munthu, ndi kumusaniya pakuti nthowa njitali, ndi kumubaya. Kweni yuwa mubaya munthu wangwenere nyifwa cha, pakuti wangutinkhana nayo cha muzengezgani wake mu nyengo ya kale. 7Chifukwa cho nditumulanguliyani, mukapatuliyanga misumba yitatu pade. 8Ndipo asani Ambuya Chiuta wakuzgiyako mphaka yinu uli ndimo wangurapiya ku auskemwe, ndipo watukupaskani charu chose chenicho wangupangana kuchipaska ku auskemwe, 9sono po mukasazgiyangako misumba yinyake kwaku iyi yitatu. Ambuya ndiwo akachitanga viyo, asani mukasunganga dangu lawo lose ili lenilo nditumulanguliyani msana wale, pakwanja Ambuya Chiuta winu ndi kwenda nyengo zose mu nthowa zake. 10Wapatuwa misumba yo, vinu ndopa zambura kalema zingadika mu charu chinu chenicho Ambuya Chiuta winu watukupaskani kuŵa chihara mwakuti kususkika chifukwa cha ndopa kungaŵa paku imwe.

11“Kweni asani munthu we yose watinkha muzengezgani wake, ndipo watimuŵeramiya, ndi watimutema ndi watufwa ndipo munthu yo wathaŵiya ku umoza wa misumba iyi, 12sono ŵara-ŵara ŵa mu msumba wake wakatumanga kwachimuto kwenikuwa, ndi kumupereka ku ŵakutaya thayu la ndopa, alinga kuti wafwe. 13Jiso linu lingamufwiyanga lisungu cha, kweni mupeyenge kulakwa kwa ndopa zambura kalema mu Yisraele, alinga kuti kumuŵiyeni kwamampha imwe.

14“Mu chihara chenicho mukaŵanga nacho mu charu chenicho Ambuya Chiuta winu watukupaskani kuŵa chinu, kuti mukanderezganga chichiri cha mphaka ya charu cha, chenicho ŵara ŵakale ŵangujintha.

15“Kaboni yumoza pe kuti wakaruskanga pa mrandu we wose wa munthu cha, pamwenga pa kuchimwa kwe kose wangachita; kweni pa ukaboni wa ŵakaboni ŵaŵi pamwenga wa ŵakaboni ŵatatu, po ndipo mrandu ukazomerezgekanga. 16Asani kaboni mutesi wayukiya pa munthu we yose kumusimika pa kuchita kwakunanga, 17po ndipo ŵakumikisirana wose ŵaŵi mu mphindanu yo ŵakazanga paurongo pa Ambuya, paurongo pa ŵazukuru ndi ŵeruzgi ŵeniwo ŵe pa nchitu yo mu mazuŵa ghenigho. 18Ŵeruzgi ŵakafumbiliyanga kwalwana, ndipo asani kaboni yo ndi kaboni mutesi ndipo watundura mwana munyake kwa utesi, 19penipo mukamuchitiyanga iyo uli ndimo wakhumbiyanga iyo kuchitiya mwana munyake. Viyo mukapeyanga uheni mukati mwinu. 20Ndipo wose ŵakavwanga, ndi kopa, ndipo kuti wawerezgengepo so cha, kuchita uheni wa viyo mukati mwinu. 21Jiso linu kuti lingachitanga lisungu cha; chiŵenge umoyo ku umoyo, jiso ku jiso, jinu ku jinu, lundi ku lundi, janja ku janja.

Currently Selected:

Marangu 19: TongaMw

Highlight

Copy

Compare