Marangu 20

Marangu gha nkhondo

1“Muchiya ku nkhondo kwachimikana ndi ŵakupindikana ŵinu, ndi muchiwona ŵakavalo ndi magareta, ndi liŵanja la nkhondo likuru kwakuruska linu, mungaŵawopanga cha; pakuti Ambuya Chiuta winu we namwe pamoza, mweniyo wangukutoleni kuno kutuwa mu Egipiti. 2Ndipo penipo mwamundere kufupi ku nkhondo, mzukuru wakazanga kunthazi ndi kukamba ndi ŵanthu, 3ndipo wakambenge kwaku wo, ‘Avwani, ŵaYisraele mwe, msana wale mundere kufupi kukurwana ndi ŵarwani ŵinu: mtima winu ungafipanga cha. Mungawopanga cha, chingana nkhunjenjeme, pamwenga kutenthema chifukwa chaku wo. 4Pakuti Ambuya Chiuta winu ndiyo waruta namwe pamoza, kwachimurwiyani kumikana ndi ŵakupindikana ŵinu kumupaskani imwe chirewa.’ 5Sono ŵarongozgi ŵakakambanga ku ŵanthu kuti, ‘Munthu njani yo wakuzenga nyumba yifwa ndipo walivi kuyipatuwa? Wa viyo wawere ku nyumba yake, vinu wangafwa mu nkhondo ndipo munyake ndiyo wayipatuwenge. 6Ndipo ndi munthu nuyu yo wapanda munda wa mphereska ndipo wandamwepo chipasi chake? Wa viyo wawere ku nyumba yake, vinu wangafwa mu nkhondo ndi munthu munyake wangakondwa ndi chipasi chake. 7Ndipo ndi munthu nuyu mweniyo wakufumba munthukazi ndipo wenga wandamuto? Wa viyo wawere ku nyumba yake, vinu wangafwa mu nkhondo ndipo munthu munyake watonge munthukazi yo.’ 8Ndipo ŵarongozgi ŵakarutirizganga kukamba ku ŵanthu, ndi kunena kuti, ‘Njani munthu mweniyo watopa ndi wafipa mtima? Wa viyo wawere ku nyumba yake, vinu mtima wa ŵanyake ungasongonoka uli ndi mtima wake.’ 9Ndipo penipo ŵarongozgi ŵamarizga kukamba ku ŵanthu, sono ŵakulangula ŵakatondorekanga kuŵa mitu ya ŵanthu.

10“Penipo mwamundere kufupi ku msumba kwachirwana nawo, upaskeni makani gha chimangu. 11Ndipo asani kwamuka kwake kwaku imwe nkhwa chimangu ndipo utikujuliyani, sono ŵanthu wose ŵeniwo ŵasanirikengemo mwaku wo ŵakachitanga nchitu yakuchichizgika ndipo ŵakamteŵetiyaninga. 12Kweni asani kuti uchita namwe chimangu cha, kweni uchita manwe nkhondo, sono mukauzinganga. 13Penipo Ambuya Chiuta winu watiupereka mu janja linu, mukabayanga ŵanthurumi wose ndi lipanga. 14Kweni ŵanthukazi ndi ŵana, ng'ombe ndi chinthu chose chinyake mu msumba, miskowo yake yose, mukatonga kuŵa vyakuyoreka vinu, ndipo mukasakatanga miskowo ya ŵakupindikana ŵinu, yeniyo Ambuya Chiuta winu wakupaskani. 15Viyo ndimo mukachitiyanga ku misumba yose yeniyo yekutali ukongwa ndi imwe, yeniyo kuti ndi misumba ya mitundu ye kunu cha. 16Kweni mu misumba ya ŵanthu yaŵa yeniyo Ambuya Chiuta watumupaskani kuŵa chihara. Mungapozomoskanga cha chamoyo che chose chenicho nchakututa, 17kweni mukamaliyanga limu teteti, ŵaHiti, ŵaAmori, ŵaKanani, ŵaPerizi, ŵaHivi, ndi ŵaYebusi, uli ndi mwenimo Ambuya Chiuta winu walanguliya, 18alinga kuti ŵareke kumusambizgani kuchita kwakuyana ndi machitidu ghawo ghose ghakazuzu ghenigho ŵachitanga kukuteŵete ŵachiuta ŵawo, kuti imwe mulakwiye Ambuya Chiuta winu.

19“Penipo mugoŵa msumba kwa nyengo yitali, kurwana nawo nkhondo kuti muwuto, mureka kuteme pasi miti ndi mbavi; chifukwa mukarghanga vipasi vyake, mungavitemiyanga pasi cha. Kumbi vimiti vyamu dondo navyo mbanthu kuti murwani navyo? 20Mungatema miti yo kuti vipasi vyake virghika cha mwakuti mukachitiye nchitu yakugoŵe msumba wo umikana namwe mpaka ubwangandurike.

Currently Selected:

Marangu 20: TongaMw

Highlight

Copy

Compare