2 ŴaKorinte 8

Kaperekedu ka vyawanangwa ka ŵaKristu

1Kweni mwa ŵabali, timziŵiskani wezi waku Chiuta wakupaskikiya mu mipingu yaku Makedonia. 2Mwakuti, mu kweseka kukuru kwa suzgu, uzariwa chimwemwe chawo mu ukavu weniukuru wafurwiya mu usambasi wa wanangwa wawo. 3Pakuti ndisimikizga kuti kwakuyana ndi nthazi yawo, ndipo nadi kwakuruska nthazi yawo, mu wanangwa wawo, 4ŵangutiŵeyere weniukongwa milinweka la mtima kuti ŵawovyeko ku uteŵeti wa ŵakupaturika wo; 5ndipo so kupereka kwawo kunguruska mo ifwe tingugomekezge, kweni chifukwa nchakuti ŵangujipaska danga iwo ŵeneko ku Ambuya, ndi kwaku ifwe mu khumbo laku Chiuta. 6Ndiviyo tinguchichizga Tito, kuti uli ndimo wangwandiya kali, viyo so wafiskiye mwinu wezi uwu nawo. 7Kweni ulaka ndipo mufurwiya mu chinthu chose, mu chivwanu, ndi mu mazu, ndi mu mziŵiru, ndi mu phamphu lose, ndi mu chanju chinu chakwaku ifwe, furwiyani so mu nchitu yakuzirwa iyi. 8Kuti ndikamba nge ndi langulu cha, kweni uli nkhweruzgiyapo mu phamphu la ŵanyake kurongo uneneska wa chanju chinu. 9Chifukwa muziŵa wezi wo wa Ambuyafwe Yesu Kristu, kuti, pakuŵa msambasi, pa chifukwa chinu wangukavuka, alinga kuti imwe ndi ukavu wake musambaskike. 10Ndipo mwaku ichi sono ndipaska cheruzgu changu: chifukwa nchamampha kwaku imwe, mwaŵakwandiya chirimika charuta kwachichita pe cha, kweni kuŵa ndi linweka la kukhumba kuchita. 11Kweni sono mufiske kuchita nako; viyo kuti, ulaka ndimo unguŵiya upusu wakukhumbiya viyo so kuŵepo kufiska, kwakulingana ndi kusakata kwinu. 12Chifukwa asani upusuwo ulipo, mpasku ngwamarondeka uli ndimo munthu waliri nacho, uli ndimo wauriyavi cha. 13Kuti nding'anamuwa kuti ŵanyake ŵayuyuke, imwe musuzgike cha; 14kweni nge khuyaniskana waka ufurwi winu pa nyengo ya sono wovyeko ku upereŵezi wawo, alinga kuti ufurwi wawo nawo wovyeko ku upereŵezi winu; viyo kuti kuŵepo kuyanana. 15Uli ndimo kwalembeke, “Mweniyo wanguwunjika chinandi, wengavi uzari wakujapo; ndipo yo wanguwunjika kamanavi, wengavi kupereŵepo.”

Tito ndi ŵakusungana nawo

16Kweni wawongeke Chiuta, yo waŵikamu mtima waku Tito linweka lenilo pe lapa chifwa chaku imwe. 17Pakuti wangurondedi uchichizgu widu pe so cha, kweni pakunweka ukongwa iyo mweneko, mu khumbo lake watuza ko kwinu. 18Ndipo tatumiya pamoza nayo mbali yo laku mweniyo rumbu la evangeli mu chitaula chake lawandiya mu mipingu yose; 19ndipo po pe cha, kweni so ndiyo wangutondoleka ndi mipingu yo kwenda nafwe mu nchitu yakuzirwa iyi yo titakatakiya ku unkhankhuwa Ambuya, kwakulingana ndi linweka lidu. 20Pakuphwere chenichi chakuti paurevi yumoza yo wangatisuska mu chawanangwa chakuteŵeteka ndi ifwe; 21chifukwa tidunjika paku vyo vyakurumbika mu maso gha Ambuya pe cha, kweni so mu maso gha ŵanthu. 22Ndipo tatumiya pamoza nawo mbali widu, mweniyo panandi tamsimika kuŵa mpusu mu vinthu vinandi, ndipo sono waŵa wakupusumpha ukongwa limu, chifukwa cha chigomekezgu chikuru, cho we nacho kuchiri kwinu. 23Nge nkhuchiri kwaku Tito, ndiyo msangazi munyangu ndi mteŵeti munyangu kuchiri kwinu; pamwenga nge nkhu ŵabali ŵidu, wo ndi mathenga gha mipingu, unkhankhu waku Kristu. 24Viyo ŵarongoni, chisimisimi cha chanju chinu, ndi cha kujikuzga kwidu kwa pa chifwa chinu pa maso pa mipingu.

Currently Selected:

2 ŴaKorinte 8: TongaMw

Highlight

Copy

Compare