2 ŴaKorinte 9

Chovyo ku ŵaKristu ŵanyidu

1Nadidi nkhutaruliya waka kuti ndikulembiyeni ndi uteŵeti wo wapa ŵakupaturika, 2chifukwa ndiziŵa phamphu linu, paku lenilo nditijikuzgiyapo ku ŵaku Makedonia, kunena kuti Akhaia wakujirongoso chirimika charuta; ndipo rwana linu lapamphuska urapasi wa ŵanandi. 3Kweni ndatuma ŵabali wo, alinga kuti chitumbwa chidu chapa chifwa chaku imwe chingawayuka cha mu nkhani yeniyi; mwakuti uli ndimo ndingunene, muŵe ŵakurongosoleka; 4vinu kokuli, asani ŵangaza ŵaku Makedonia pamoza nane, ndi ku musaniyani mwaŵambura kurongosoleka, tingakanyara ifwe potikaŵangavi chakurongoro namwe, kwakulingana ndi chigomezgu cho tenacho mwaku imwe. 5Viyo ndingupima kuti kwenga kwamakhumbikwa kuŵapemberezga ŵabali wo, kuti ŵadanjiyeko kwinu, ndi kuti ŵarongoso chawanangwa chidu chakupangizgikiya limu, chiŵe chakurongosoleka, nge nkhuti mwenga ndi mwamphu kali waku pereke kwambura kuti ulaka ndachita kumuchichizgani. 6Kweni chinichi kumbukani, yo wamija kwakudumbika-dumbika, kwakudumbika so wamvuna; ndipo yo wamija kwawanangwa, kwawanangwa so wamvuna. 7Munthu yose wapaske uli ndimo wajiteme mu mtima wake; kwachigwinini cha, pamwenga kwakukakamizgika cha; chifukwa Chiuta watanja mpaski wamasangu. 8Ndipo Chiuta ngwanthazi kumfurwiskiyani vitumbiku vyose alinga kuti pakukoroka nyengo zose mu chinthu chose, mufurwiyenge ku mlimu wose wamampha. 9Uli ndimo kwalembeke,

“Wamwaza chisanisani, wapaska ku ŵakavu;

urunji wake ujaririya muyaya.”

10Ndipo mweniyo wapaska mbeu ku ŵakumija ndi chiŵande nge nchakurgha, wamkuskiyako ndi kwandaniska mbeu yinu yakumija, ndipo wamkuzga vipasi vya urunji winu. 11Mu chinthu chose muŵe wakusambasiskikiya ku wanangwa wose, weniwo pakutataliya mwidu ukaperekanga viwongo kwaku Chiuta. 12Pakuti uteŵeti wa mlimu uwu ulive kugutiska usauchi wa ŵakupaturika wo pe cha, kweni so ufurwiya mu kumwonga Chiuta kwa ŵanandi. 13Ŵeniwo ŵamkankhuskiya Chiuta mu karongoledu ka uteŵeti winu, chifukwa cha chithera cha chizomerezgu chinu ku evangeli waku Kristu, ndi chifukwa cha wanangwa wa mpasku winu wamasanga kwaku yiwo ndi kwaku wose; 14penipo iwo, mu niniziku lawo lapa chifukwa chinu, ŵanweke imwe chifukwa cha wezi wakuzungura waku Chiuta wapaku imwe. 15Wawongeke Chiuta chifukwa cha chawezi chake chambura makambika!

Currently Selected:

2 ŴaKorinte 9: TongaMw

Highlight

Copy

Compare