2 ŴaKorinte 5

1Chifukwa tiziŵa kuti asani nyumba yapa charu ya hema lidu yabwanganduka, uzengi wakutuliya kwaku Chiuta te nawo, nyumba yakuchitika ndi manja cha, yamuyaya, mu machanya. 2Chifukwa nadi mwaku yeniyi titamantha, taŵakunweka kuvwalikika uja widu wo wakutuliya kuchanya, 3mwakuti titakuti tavwalikika kuti tikasanirikanga ŵankhuli so cha. 4Chifukwa nadi po teche mu hema la liŵavu lenili titamantha ndi kuzitiskika, chifukwa kuti tikhumba kuvwinkhulika cha, kweni kuvwalikika, alinga kuti lachifweni ili limezeke ndi umoyo. 5Kweni yo watichitiya chenichi chaviyo ndi Chiuta, mweniyo watipaska Mzimu nge nchamatomi cha umoyo wo utuza. 6Viyo tikhwima mtima nyengo zose, po tiziŵa kuti po teŵalendo pano mu liŵavu ili te kunyake ndi Ambuya, 7chifukwa titende mu chivwanu, mu kawonedu cha. 8Kweni tikwimadi mtima ndipo ukongwako tinweka kutuwamo mu liŵavu ili ndi kwachija ndi Ambuya. 9Chifukwa chenichi likhumbira lidu ndakuti manyi tepamoza ndi Mbuya, manyi te kunyake, kweni tiŵe nge mbanthu wo ŵatenere kumkondweska Iyo. 10Pakuti tose tikawonekanga paurongo pa chitengu chakweruzgiyapo chaku Kristu; kuti yose waronde vyapa liŵavu, kwakulingana ndi vyo wachita, pamwe vyamampha, pamwe viheni.

Ubwezi ndi Chiuta mwaku Kristu

11Viyo pakuziŵa wofi wa Ambuya tichichizga ŵanthu, kwani ifwe mo tiliri tawoneka kwaku Chiuta; ndipo ndigomekezga kuti tawoneka mu njuŵi zinu so. 12Kuti tijanizgiya so kwaku imwe cha, kweni timpaskani pakutumbwiyapo pa chifukwa chidu, alinga mungaŵa nacho chakwamukiya weniwo ŵatumbwiya mu kawonekedu, ndi mu mtima cha. 13Chifukwa asani tiwoneka nge tifuntha, nchifukwa cha mlimu waku Chiuta; ndipo asani tiziza, nkhwaku imwe. 14Chifukwa chanju chaku Kristu chititikakamizga, taŵakweruzga chenichi, chakuti Yumoza wangufwiya wose, viyo wose wangufwa; 15ndipo chifukwa chaku wose wangufwiya, alinga kuti wo mbakuŵa ndi umoyo ŵangajijariya ŵija so cha, kweni mweniyo pa chifukwa chawo wangufwa ndi kuyuka so.

16Viyo na, ifwe kutuwa ku sono kuti tiziŵa yumoza uli nkhu liŵavu cha: chingana napo tamziŵa Kristu uli nkhu liŵavu, ndikweni sono kuti timziŵa viyo so cha. 17Ndiviyo asani yumoza we mwaku Kristu, nchakulengeka chifya: vyakale vyarutapo; awonani, vyaza vifya. 18Kweni vyose ivi vituliya kwaku Chiuta, yo watanjaniskiya kwaku yija mwakuKristu, ndipo wapaska ifwe uteŵeti ndi wa chanjanisku; 19nge nkhuti Chiuta wenga mwaku Kristu wakwanjaniskiya charu kwaku yija, wakuŵapimiya vilakwa vyawo cha, ndi wakutipazgiya ifwe mazu gha chanjanisku cho. 20Viyo te mathenga pa chifukwa chaku Kristu, nge Chiuta waŵeyererenga mwaku ifwe: tininizikiya imwe pa chifwa chaku Kristu, mwanjaniskikiye kwaku Chiuta. 21Yo ngwambura kuziŵa ulakwi wangumuchita wakusangana nafwe ulakwi, mwakuti ifwe pakubatikana nayo, tisangane nayo urunji waku Chiuta.

Currently Selected:

2 ŴaKorinte 5: TongaMw

Highlight

Copy

Compare