1 Timote 6

1Wo wose mbaŵanda pasi pagoŵa ŵapimiye ŵambuyawo ŵaku ŵija nge mbakwenere thumbiku lose, alinga kuti lingatokoskeka cha zina laku Chiuta, ndichisambizgu cho. 2Ndipo wo ŵe ndi mbuya wakuvwana, ŵangaŵayuyu-wanga cha, pa chifukwa chakuti mbabali; kweni ukongwaku ŵaŵaŵetekenge, pakuti wo ŵatovyeka ndi mlimu wawo wamampha mbakuvwana ndi ŵakwanjiwa.

Chisambizgu cha utesi ndi usambasi weneko

Vyenivi sambizganga ndi chiskanga. 3Asani yumoza wasambizga chinyake, ndi wareka kuzomerezga mazu ghazirima, gho gha Ambuyafwe Yesu Kristu, ndichisambizgu cha uwopa Chiuta, 4watutumuka, waziŵa kanthu kamoza cha, kweni ngwakutangwamikiya pa malifumbafumba ndi masuskano gha mazu, mwenimo mutuliya chiŵinu, ndeu, matusi, masachizgu ghaheni, 5ndi mihohotu ya ŵanthu, wo mbakuwo mu njuŵi ndi ŵakukavuka uneneska wo, pakughanaghana kuti uwopa Chiuta mbuparauzi. 6Kweni uwopa Chiuta pamoza ndi kukoroka mu mtima mbuparauzi ukuru: 7chifukwa kuti nkhuti tingutolemu mu charu chingana nkhanthu kamoza cha, chingana nkhuti tiziŵa kutuzga mu cha chingana nkhamoza, 8kweni pakuŵa ndi kurgha ndi vyakuvwara, tikhorwenge navyo. 9Kweni wo mbakukhumba kusambasa ŵatuwa mu kesedu ndi chikhwiriki ndi malikhumbira ghanandi ghazereza ndi gharwani, ghenigho ghose ghabizga ŵanthu mu chipasuka ndi wanangiku. 10Chifukwa kwanja ndrama ndi msisi wa mauheni ghose; pakutambazukiya chenicho ŵanyake ŵarandizgika nacho kutuwako ku chivwanu cho, ndipo ŵakoreka ndi soni zinandi.

Mapangizgu

11Kweni iwe, wa munthu waku Chiuta, thaŵa vyenivi, ndipo rondo urunji, uwopa Chiuta, chivwanu, chanju, unkhunthiya, upovu. 12Limba-limbanga mlimbanu wo weneko wa chivwanu, jibwakiye umoyo wo wamuyaya, kwaku weniwo ungudanikiya, ndipo unguzomerezga chizomerezgu cho cheneko pa maso gha ŵakaboni ŵanandi. 13Ndikulanguliya pa maso ghaku Chiuta, wakupaska vyose umoyo, ndi ghaku Kristu Yesu, mweniyo wangusimikizgiya paurongo paku Pontio Pilato chizomerezgu cho cheneko, 14ndikuchiska sungirizga langulu lo lizira donthu, lizira kalema, mpaka ku chiwoneka cha Ambuyafwe Yesu Kristu; 15chenicho mu nyengo zake zeneko wakachirongonga Wanthazi yo, wakutumbikika ndi wayija, Karonga yo wa ŵakaronga, ndi mweneko wa ŵakweni; 16mweniyo yija we ndi uwuranyifwa wakuja mu ukweru wambura maŵandikika, mweniyo palive munthu wamwona chingana waziŵa kumwona: kwaku mweniyo kuŵiye thamu ndi mazaza ghamuyaya. Ameni.

17Ŵalanguliye ŵasambasi mu mgonezi wa sono kuti ŵareke kujitumphuska, chingana nkhugomekezgapo pa kanthu kakuwura ukhonge ndi chuma, kweni mwaku Chiuta, mweniyo watipaska vyose kwakusakata kuti tikakondweremo; 18kuti ŵachite umampha, kuti ŵasambasiye mu nchitu zeneko, kuti ŵaŵe ŵapusu kupaska kwawezi, ndi wanangwa pakusangana; 19ŵakujiŵikiya chiŵanja chenecho chaku mkucha, alinga kuti ŵajibwakiye umoyo wo weniwo mbumoyo weniweni.

20Timote we, sungirizga chakupazgika cho; pambukako ku makani ghamtonyoru ndi kuvimikiranu vya mziŵiru wo, weniwo utamulika viyo kwautesi; 21weniwo ŵanyake pakuuzomerezga ŵambwita pa chivwanu cho.

Wezi uŵe nawe.

Currently Selected:

1 Timote 6: TongaMw

Highlight

Copy

Compare