1 ŴaTesalonika 2

Nchitu yaku Paulo mu Tesalonika

1Chifukwa mwa ŵabali, mwaŵeni muziŵa mo tinguserere kwaku imwe, kuti chenga chinthu chaumbuwuya cha; 2tinguŵa ndi chiganga tati takunthiyapo kali, ndi kuyuzgika ku Filipi, uli ndimo muziŵiya, tinguŵa ndi chiganga mwaku Chiuta kukambiya imwe evangeli waku Chiuta mu kulimbalimba kukuru. 3Chifukwa chichichizga chidu kuti nchakutuwa ku urandizgi cha, chingana nkhu unyakazi, chingana ndi mu fuzi; 4kweni uli ndimo tazomerezgeke ndi Chiuta kutipingizga evangeli wo, viyo tikamba; nge mbakukondweska ŵanthu cha, kweni Chiuta yo watesa mitima yidu. 5Chifukwa, uli ndimo muziŵiya, chingana nkhuti kosekose tinguŵa ŵakukamba utesi mu mazu cha, chingana nkhuti tinguŵa ŵarghargha mu bina cha, Chiuta ndiyo kaboni; 6chingana nkhuti tapenjanga unkhankhu ku ŵanthu cha, pamwenga kwaku imwe, pamwenga ku ŵanyake, chingana nge mbakutumika ŵaku Kristu tinguziŵa kujiŵangiya ulemu. 7Kweni tinguŵa ŵapovu mukati mwinu, nge ndimo mlezi wapakati ya ŵana ŵapa mtima wake. 8Viyo taŵakunweka imwe tingukondwa kukupaskani evangeli waku Chiuta pe cha, kweni ndi mauzima ghidu nagho, pakuti mwenga ŵakwanjiwa kwaku ifwe.

9Chifukwa mukumbuka, mwa ŵabali, mtima widu ndi chitakataka chidu; tichitakataka usiku ndi msana, alinga kuti tingamzitiska yumoza waku imwe cha, tichikutauliyani evangeli waku Chiuta. 10Mwe ŵakaboni imwe, ndi Chiuta viyo, mo tingujaririya kuchiri kwaku imwe mwaŵakuvwana, kwakupaturika, ndi kwaurunji, ndi kwambura kalema: 11uli ndimo muziŵiya mo tinguchitiya ndi munthu yose waku imwe, mo wiske wachitiya pa ŵana ŵaku yija, kuŵeyere ndi kuchiska ndi kusimikizgiya imwe, 12kwenda kwakwenere chiuta, yo wakudaniyanimo mu ufumu ndi unkhankhu waku iyo mweneko.

13Chifukwa chenichi nafwe so timwonga Chiuta kwambura kulekezga, kuti pakuronde kwaku ifwe mazu gha uthenga waku Chiuta, mungugharonde nge ndi mazu gha ŵanthu cha, kweni, mo ghaliri, nge ndi mazu ghaku Chiuta, ghenigho nagho ghatakataka mwaku imwe mwaŵakuvwana. 14Chifukwa imwe, mwa ŵabali, munguŵa wakwezga mipingu yaku Chiuta mwaku Kristu Yesu gho ghe muYuda: pakuti namwe so mungukunthiyapo vyaviyo pe kutuliya mu ŵanthu ŵamtundu winu uli ndimo nawoso ŵangukunthiyapo ku ŵaYuda. 15Wo nawo ŵangubaya Ambuya Yesu ndi ŵamchimi, ndipo ŵangutidikiska ifwe, ŵambura kumkondweska Chiuta, ndipo mbakumikirana ndi ŵanthu wose; 16pakuti ŵatitikanizga kuŵakambiya ŵaMtundu kuti ŵataskike. Nyengo yose iyi ŵatakatakanga kuti ŵazaze mweso wa maulakwi ghawo. Ndipo sono ukari waku Chiuta wafikiya paku iwo.

Khumbu laku Paulo kuchezga nawo so

17Kweni imwe, mwa ŵabali, pakutuwako kwaku imwe kanyengo kamanavi (ku chisku, ku mtima cha), tingutunthwiya ukongwa ndi linweka lakuruska kuwona chisku chinu: 18chifukwa chenichi tingukhumbiska kuza so kwinu, ine nda Paulo, kaŵikaŵi; kweni Satana wangutitangwamiska. 19Chifukwa nchine chigomekezgu chidu, pamwenga chimwemwe, pamwenga chifuku cha chitumbwa paurongo pa Ambuya Yesu pa uzi wake? Asi ndimwe na? 20Chifukwa imwe mwe unkhankhu widu ndi chimwemwe chidu.

Currently Selected:

1 ŴaTesalonika 2: TongaMw

Highlight

Copy

Compare