1 ŴaTesalonika 1

1Kalata wakutuwa kwaku Paulo, ndi Silvano, ndi Timote, ku mpingu wa ŵaTesalonika mwaku Chiuta Dada ndi Ambuya Yesu Kristu: Wezi kwaku imwe, ndi chimangu.

Umoyo ndi chivwanu cha ŵaTesalonika

2Tiwonga Chiuta nyengo zose pa chifukwa chaku imwe mose, tichimzumbuwani mu marombo ghidu; 3pakukumbuka kwambura kurekezga nchitu yinu ya chivwanu ndi chitakataka chinu cha chanju, ndi unkhunthiya wachigomekezgu mu Ambuyafwe Yesu Kristu, paurongo paku Chiuta widu ndi Auskefwe. 4Pakuziŵa, mwa ŵabali ŵakwanjika ndi Chiuta, kusankhika kwinu; 5pakuti evangeli widu kuti unguziya imwe mu mazu pe cha, kweni so mu nthazi ndi mu Mzimu Wakupaturika, ndi mu uzali wenecho wa chigomekezgu. Uli ndimo muziŵiya po tinguŵiya mwinu wakuti e, pa chifukwa chinu. 6Ndipo imwe munguŵa wakwezga ifwe ndi Ambuya, munguti mwaronde mazu mu suzgu yikuru, pamoza ndi chimwemwe cha Mzimu Wakupaturika; 7viyo kuti munguŵa chandiru imwe ku ŵakuvwana wose mu Makedonia ndi Akhaia.

8Chifukwa kutuwa kwinu ghawandiya mazu gho gha Ambuya mu Makedonia ndi Akhaia pe cha; kweni mu malo ghose chivwanu chinu chamwaku Chiuta chawanda; viyo kuti palive chifukwa kuti tikambepo kanthu ifwe. 9Chifukwa iwo ŵeneko ŵakamba gha kurondereka kwidu kwaku imwe ko tinguŵa nako, ndimo mungung'anamukiya kwaku Chiuta kutuwako ku vyangoza kwachiteŵete Chiuta wamoyo ndi muneneska, 10ndi kwachilindizga Mwana wake wachisoromoka kuchanya, mweniyo wangumyuska ku ŵakufwa Yesu, mweniyo ngwakutitaska ku kandundu ko katuza.

Currently Selected:

1 ŴaTesalonika 1: TongaMw

Highlight

Copy

Compare