AROMA 10
10
1Abale anga, ndikupifuna na mtimanga onsene kuti Aisraele anzanga apulumuke. Ine ndimbaapempherera pikulu kuna Mulungu. 2Ndinakwanisa kuchitira umboni kuti iwo ngaphinga na pinthu pya Mulungu, kwache phingawoyo si yanzeru nayo chadi-chadi tayu. 3Iwo hakudziwa tayu mule mumbalungamisira Mulungu anthu pamaso pache, mbwenye m'mbuto mwache iwo apiyesera okha kupiikhira njirawo, nee kupipereka tayu kuna njira ya Mulungu yakulungamisira nayo. 4Khristu amalisa mwambo, towera onsene ambamkhulupira ale akhale akulungama pamaso pa Mulungu.
Chipulumuso ntcha anthu onsene
5Mose adalemba tenepa pya kulungamiswa kwa anthu pamaso pa Mulungu kudzera muna mwambo: “Munthu anavera mwambo, anakhala na moyo kudzera muna mwambowo.”#Lev. 18.5. 6Mbwenye pidalonga Malemba pya kulungamiswa kwa anthu pamaso pa Mulungu kudzera muna chikhulupiro mphipi: “Lekani kupivunza mwekha ene kuti, ‘Mbani anafuna dzaenda kudzulu?’ ” (Kweneku ndiye kutchithisa Khristu kubulukira kudzulu.)#Deut. 30.12-14. 7“Pontho lekani kupivunza kuti, ‘Mbani anafuna dzatchitha pansi ku Chiphompho chikulu?’ ” (Kweneku ndiye kubulusa Khristu kumbuto ya anyakufa.) 8Penepi pikulonga kuti, “Mphangwa za Mulungu zili chifupi namwe, m'kanwa mwanu na mumtima mwanu mwene.” Zenezi ndi mphangwa za chikhulupiro zimbalalika ife zile. 9Imwe mungatawira na mulomo wanu kuti Yesu ndi Mbuya mbamukhulupira mumtima mwanu kuti Mulungu adamulamusa kuimfa, munati mupulumuke. 10Thangwi Mulungu ambatilungamisa pamaso pache kudzera muna chikhulupiro mumtima mwathu, pontho timbapulumuka kudzera muna kutawira kwathu na mulomo wathu. 11Malemba akulonga kuti, “Munthu onsene anamkhulupirayo nkhabe dzachita manyadzo tayu.”#Yes. 28.16. 12Penepi pikulonga kuna munthu onsene, thangwi nkhabe kusiyana tayu pakati pa Ayuda na anthu okhonda khala Ayuda. Mulungu ndi Mbuya mbodzi wa anthu onsene, tenepo iye ambatsanzayisa pikulu pene anthu onsene ambamchemera kuti aaphedze ale. 13Ninga munalongera Malemba kuti,
“Munthu onsene anachemera Mbuya kuti amphedzeyo,
anapulumuka.”#Yow. 2.32.
14Apo pinakwanisika tani kuchemera Mbuya kuti aaphedze ngakhala iwo nkhabe khulupira tayu? Pinakwanisika tani kuti iwo akhulupire ngakhala hadave mphangwa tayu? Pinakwanisika tani kuti iwo ave mphangwa ngakhala mphangwazo zikulalikwa kuna iwo tayu? 15Apo mphangwazo zinalalikwa tani, ngakhala anthu akuzilalika nkhabe tumwa kazilalika tayu? Ninga munalongera Malemba kuti, “Mphyakukoma pyakwanga kudza kwa anyakulalika mphangwa zadidi.”#Yes. 52.7. 16Kwache si anthu onsene atambira mphangwa zadidi tayu. Mprofeti Yesaya ene adapilonga mbati, “Mbuya, mbani adakhulupira mphangwa zathu?”#Yes. 53.1. 17Tenepo chikhulupiro chimbadza munthu angava mphangwa; angava mphangwa zakulonga pya Khristu zikulalikwa.
18Apo ndivunze, ayi mphyakuonadi kuti anthu a ku Israele hadave mphangwa zadidi tayu? Ndimomwene iwo adava, thangwi Malemba akulonga kuti,
“Falawo idaveka padziko yonsene yapansi,
mafalawo adafika kumadolomero a dziko.”#Mas. 19.4.
19Ndivunze pontho: Ayi anthu a ku Israele hadapivese tayu?
Mose ene ndiye nyakutoma kutawira kuti:
“Ndinakuchitisani kukhala abivu
pakuphatisa basa dzinza yokhonda khala dzinza chadi-chadi.
Ndinakuchitisani kuzhangali
pakuphatisa basa dzinza ya anthu akupupwa.”#Deut. 32.21.
20Yesaya awanga mtima pyakwanga pinalonga iye mbati,
“Anthu adakhonda kundisaka-saka, ndiye adandigumana.
Ndidaonekera kuna anthu akhakhonda kuvunza pya ine.”#Yes. 65.1.
21Mbwenye pya anthu a ku Israele iye adalonga mbati,
“Nsiku yonsene ndidafuthula dzanjanga
kutambira anthu okhonda vera na akupandukira.”#Yes. 65.2.
Currently Selected:
AROMA 10: SenaMw
Highlight
Share
Compare
Copy
Want to have your highlights saved across all your devices? Sign up or sign in
© Bible Society of Malawi
