AROMA 9

Mulungu na anthu ache akusankhulika

1Ndikulonga pyakuonadi: ine ndine wache wa Khristu, pontho nkhabe longa pyakunama tayu. Chikumbu mtima changa chimbatongwa na Mzimu Wakuchena chile, chimbatsikimizira kuti ine nkhabe nama tayu, 2ndingalonga kuti ndina nsisi zikulu, pontho ndikuva kupha kokhonda mala mumtima mwanga 3thangwi ya abale anga, ale mbanthu a dzinzanga. Na thangwi ya kufuna kuaphedza, ine ndikhapifuna kuti ndikhale pyanga nyadzedze pamaso pa Mulungu, pontho wakulekaniswa kuna Khristu. 4Iwo mbanthu a Israele, Mulungu adaasankhulambo kukhala anache mbaaonesa demelero yache; iye adachita nawo piverano#9.4 piverano: Pyakulembwa pinango pyakale pyalonga chiverano. mbaapasa mwambo; iwo akupembedza mwakuonadi pontho atambira pinthu pidadumbira Mulungu kuna iwo pile.#Kub. 4.22. 5Iwo mphidzukulu pya makolo athu akuveka a Chiheberi, pontho kulonga pya umunthu wa Khristu, iye ngwadzinzawo. Mulungu ule ana utongi papinthu pyonsene mbalemedzwe kwenda na kwenda!#9.5 Mulungu…na kwenda: penu Tenepo iye, ule ndi Mulungu wakutonga pinthu pyonsene mbalemedzwe kwenda na kwenda. Ameni.

6Kadi ndikulonga kuti pidadumbira Mulungu pyachimwanika? Nkhabe tayu, thangwi si onsene anthu a ku Israele mbanthu a Mulungu tayu. 7Si pidzukulu pyonsene pya Abrahamu mbana a Mulungu tayu. Mulungu adalonga kuna Abrahamu mbati, “Kudzera muna Isake iwe unakhala na pidzukulu ninga mudadumbira ine kuna iwe.”#Kut. 21.12. 8Penepi pikulonga kuti si ana onsene adabalwa na Abrahamu mbana a Mulungu tayu.#9.8 Penepi…Mulungu tayu: Nkhulonga pya pidzukulu pya Abrahamu kudzera muna Ishimaele, mwana adabala iye na Hagara ule (yang'anani Agal. 4.22-23). Pidzukulu pyache chadi-chadi mphyokha pile pidadumbira Mulungu kuti anampasa. 9Thangwi pinthu pidadumbira Mulungu pidalongwa tenepa: “Ndinati ndidze pontho pandzidzi wache wakuthema,#9.9 pandzidzi wache wakuthema: penu pandzidzi ninga uno chaka chamangwana. tenepo Sara anakhala na mwana wamamuna.”#Kut. 18.10.

10Apo si pyokhapyo tayu, ana awiri amuna a Rebeka akhali na baba mbodzi, ule ndi kholo wathu Isake. 11-12#Kut. 25.23.Kwache anawo mbadzati balwa, pontho mbadzati chita nee chadidi penu chakuipa tayu, Mulungu adalonga kuna Rebeka mbati, “Mkulu anatumikira mwana.” Pidakhala tenepo kuti kusankhulwa kwa mbodzi kule kukhale ninga mudapisasanyira Mulungu. Tenepo kusankhula kwa Mulungu kudagona pa kuchemera kwache, nee pachinthu chonsene chikhadachita iwo tayu. 13Ninga munalongera Malemba kuti, “Ndidamfuna Yakobo, mbwenye ndidazonda Esau.”#Mal. 1.2, 3.

14Kadi penepa tilonge kuti Mulungu ngokhonda lungama? Nkhabe na pang'ono pene tayu. 15Iye adalonga kuna Mose mbati, “Ndinavera nsisi anthu onsene anafuna ine kuvera nsisi, pontho ndinakomera mtima anthu onsene anafuna ine komera mtima.”#Kub. 33.19. 16Tenepo pyonsene pyagona pansisi za Mulungu, nee pana pimbafuna munthu, penu pimbachita iye tayu. 17Malemba akulonga kuna Mfumu wa ku Iguputo kuti, “Ndakupitisa ufumu towera ndikuphatise basa kuonesa mphamvu zanga, pontho kuti undivekese padziko yonsene yapansi.”#Kub. 9.16. 18Tenepo Mulungu ambavera nsisi munthu onsene ninga mumbapifunira iye, pontho ambaumisa mtima wa munthu onsene ninga mumbapifunira iye.

Pya ukali na nsisi za Mulungu

19Mbodzi pakati panu anati alonge kuna ine mbati, “Pinakwanisika tani Mulungu kulonga kuti munthu adawa? Mbani angakhonde kufuna kwa Mulungu?” 20Mwanzanga, ndiwe animbo iwe, kuti utawire Mulungu? Chikalango nkhabe vunza adachiumba ule kuti, “Udandiumbiranji ninga tenepa?”#Yes. 29.16; 45.9. 21Angamala penepo nyakuumba pikalango ule ana utongi kuphatisa basa dongo ninga munapifunira iye mbaumba pikalango piwiri na dongo ibodzi-bodziyo, chibodzi mbachikhala chakuphatisirwa basa yakufunika pyakwanga, chinangombocho mbachikhala chikalango chene pyacho chakuphatisa basa nsiku na nsiku.

22Penepi ndi sasawa na pinthu pyachita Mulungu pile. Iye akhafuna kuonesa ukali wache, pontho kudziwisa mphamvu zache. Mbwenye iye adapirira pyakwanga na anthu adazhangalira iye ale, anthu adathemadi kuvungika ale. 23Iye akhafuna pontho kuonesa demelero yache yakuinjipa, ile idakhuthulwa pana ife, anthu akhadavera iye nsisi ale, pontho asasanya iye kuti titambire demelero yeneyi ale. 24Ife ndife anthu adachemera iye ale, nee pakati pa Ayuda okha tayu, mbwenye pontho pa anthu okhonda khala Ayuda ene. 25Penepi ndiye pinalonga iye m'bukhu ya mprofeti Hosea kuti,

“Anthu okhonda khala anga,

ndinati ndiachemere kuti, ‘Anthu anga.’

Anthu ale si apamtima panga tayu,

ndinati ndiachemera kuti, ‘Anthu a pamtima panga.’#Hos. 2.23.

26Pontho pambuto padapanga iwo kuti, ‘Si imwe anthu anga tayu,’

penepo pene iwo anachemerwa ana a Mulungu wamoyo.”#Hos. 1.10.

27Tenepo mprofeti Yesaya adalonga mwakugaluza fala pya Israele mbati,

“Podi anthu a ku Israele ainjipe pyawo tani ninga tchetcha ya m'nyanza,

mbwenye akuchepa okha ndiye anapulumuka,#Yes. 10.22, 23.

28thangwi Mbuya anatonga mseru anthu onsene padziko yapansi pano

mwakuchimbiza pontho mwakupimalisiratu.”

29Penepi ndiye pikhadalonga mprofeti Yesaya kale ene mbati,

“Mbuya wamphamvu zonsene mbadakhonda kutisiyirambo pidzukulu pinango,

ife mbatidakhala ninga mizinda ya Sodomu na Gomora.”#Yes. 1.9.

Paulo apempherera anthu a ku Israele

30Apo penepa tinalonga tani? Tinalonga kuti anthu okhonda khala Ayuda, ale adakhonda kupilungamisa pamaso pa Mulungu, chinchino alungamiswa na Mulungu kudzera muna chikhulupiro chawo; 31mbwenye Aisraele ale akhasaka-saka mwambo udanyerezera iwo kuti unaalungamisa pamaso pa Mulungu ule hadaugumane tayu. 32Apo thangwi yache ninji? Thangwi yache njakuti iwo hadanyindire pa chikhulupiro tayu, mbwenye adanyindira pinthu pidachita iwo. Natenepo iwo adagwegweduka na mwala wakugwegwedusa anthu 33ule unalonga Malemba kuti,

“Yang'anani, ndaikha m'Zioni mwala,

ule unafuna dzagwegwedusa anthu,

chimwala chinafuna dzaagwisa chile.

Mbwenye munthu onsene anamkhulupirayo hanachita manyadzo tayu.”#Yes. 28.16.

Currently Selected:

AROMA 9: SenaMw

Highlight

Compare

Copy