CHIDZIWISO 22

1Mngelo adandionesa pontho mkulo wa madzi akupasa moyo. Akhayetima ninga mwala wa khulustali, kukuka kubulukira pa mpando wachifumu wa Mulungu pontho wa Mwanabira.#Ezk. 47.1; Zek. 14.8. 2Ukhatchithira pakati na kati pa msewu wa mumzinda mule. Makhundu onsene mawiri a mkulo ule akhali na muti wakupasa moyo. Muti wenewu ukhabala nsapo kakhumi na kawiri pachaka, kabodzi pamwezi. Masambache ngakuwangisa nawo madzinza.#Kut. 2.9. 3Nkhabe chibodzi chakutembererwa na Mulungu chinafuna dzagumanwa mumzindamu tayu. Mpando wachifumu wa Mulungu pontho wa Mwanabira unakhala mumzindamu, anyabasachembo anampembedza.#Zek. 14.11. 4Iwo anaona nkhope yache, pontho dzinache inalembwa papipumu pawo. 5Panakhala nkhabeve mosiku, pontho iwo nkhabe dzafuna nyale, penu cheza cha dzuwa tayu, thangwi Mbuya Mulungu anakhala cheza chawo, pontho iwo anatonga ninga mafumu kwenda na kwenda.#Yes. 60.19; Dan. 7.18.

Pya kudza kwa Yesu

6Tenepo mngelo adalonga kuna ine mbati, “Mafala enewa ngakuonadi, pontho anakwanisa kunyindirwa. Mbuya Mulungu ambapasa maprofeti Mzimu wache ule, atumiza mngelo wache kudzaonesa anyabasache pinthu pyathema dzachitika chinchino pano.”

7Yesu alonga mbati, “Ngavani! Ndikudza chinchino pano! Ngakutsanzaya ale ambavera mafala auprofeti a m'bukhumu!”

8Ine pano, Yohani, ndava na kupiona pinthu penepi. Pidamala ine kupiva na kupiona, ndidalamba pamaso pa mngelo adandionesa pinthu penepi ule. Ndikhali chifupi kumpembedza, 9mbwenye iye adandipanga mbati, “Leka chita penepi! Ndine nyabasa mwanzako pontho wa abale ako maprofeti, pontho na ale onsene ambavera mafala a m'bukhu yeneyi. Pembedza Mulungu!” 10Tenepo adandipanga mbati, “Leka kubisa mafala auprofeti a m'bukhuyi, thangwi ndzidzi wakuti pinthu pyonsenepi pichitike uli chifupi. 11Nyakuchita pyakuipa mbachite pyache pyakuipapyo. Nyakunyansa mbakhale pyache wakunyansa. Nyakulungama mbathimize kukhala wakulungama. Nyakuchena mbathimize kukhala wakuchena.”#Dan. 12.10.

12Yesu alonga mbati, “Ngaveserani! Ndikudza chinchino pano! Ndinabwera na mfupo yanga kupasa kada munthu malingana na mabasa akhaphata iye.#Mas. 28.4; Yes. 40.10; 62.11; Yer. 17.10. 13Ndine Alefa pontho Omega, nyakutoma na nyakumalisa, kutoma na kumalisa.”#Yes. 44.6; 48.12; Chid. 1.8, 17; 2.8.

14Ngakutsanzaya ale afula mikhanjo yawo, towera akhale na utongi kudya nsapo za muti wakupasa moyo mbapita mumzinda na pamsuwo.#Kut. 2.9; 3.22. 15Mbwenye kunja kwa mzinda kuna anyakuchita pyaunambwa, anyamatsenga, anyakuchita pyakuzuda, mphandu, anyakupembedza mifanikizo na ale kunama nkhudya kwawo na pyakuchita pyawo pene.

16“Ine, Yesu, ndatuma mngelo wanga kudzachitira umboni pya pinthu penepi kuna imwe m'mipingo. Ndine chidzukulu cha dzinza ya Davite. Ine ndine nthanda.”#Yes. 11.1, 10.

17Mzimu Wakuchena na mwali wakufuna kukazhali alonga mbati, “Bwera!”

Onsene anapiva alongembo mbati, “Bwera!”

Mbadze anyakuva nyota; anapifunayo atambire mwakukhonda pagali madzi akupasa moyo.#Yes. 55.1.

Mafala akumalisa nawo

18Ine Yohani ndikucheuza onsene anava mafala auprofeti a m'bukhumu: ngakhala unango anathimizira chinango pamafala enewa, Mulungu anamthimizirambo miliri yalembwa m'bukhumu.#Deut. 4.2; 12.32. 19Ngakhala unango anabulusa chinthu pa mafala auprofeti m'bukhumu, Mulungu anambulusirambo khundu yache pamuti wakupasa moyo na ya Mzinda Wakuchena unalongwa m'bukhumu. 20Nyakuchitira umboni pyonsenepi alonga mbati, “Andedi! Ndikudza chinchino pano!”

Pikhale tenepo. Idzani Mbuya Yesu!

21Kukoma mtima kwa Mbuya Yesu mbakukhale na anthu onsene a Mulungu.#22.21 anthu onsene a Mulungu: Pyakulembwa pinango pyakale pyalonga anthu onsene; pinango pyalonga anthu a Mulungu. Ameni.

Currently Selected:

CHIDZIWISO 22: SenaMw

Highlight

Copy

Compare