CHIDZIWISO 21

Pya kudzulu kwachinchino na dziko yapansi yachinchino

1Tenepo ndidaona kudzulu kwachinchino na dziko yapansi yachinchino. Kudzulu kwakale na dziko yapansi yakale pidamala, pontho bara ikhali nkhabepo.#Yes. 65.17; 66.22; 2Pet. 3.13. 2Ndidaona Mzinda Wakuchena, Yerusalemu wachinchino, ukutchitha kudzulu kuna Mulungu. Akhali wakusasanyika ninga mwali wakufuna kukazhali wakuvala mwadidi kuti akagumane na mamunache.#Yes. 52.1; 61.10; Chid. 3.12. 3Ndidava fala yakugaluza kubulukira kumpando wachifumu kulonga kuti, “Chinchino kumusa kwa Mulungu kuna anthu. Iye anakhala na iwo, iwombo anakhala anthu ache. Mulungu mwenechiro anakhala na iwo mbakhala Mulungu wawo.#Lev. 26.11, 12; Ezk. 37.27. 4Iye anadzapukusa misozi m'maso mwawo. Nkhabe dzakhala pontho imfa, penu kutsukwala, penu kulira, penu kuva kupha tayu. Pinthu pyakale pyamala.”#Yes. 25.8; 35.10; 65.19. 5Tenepo nyakukhala pampando wachifumu adalonga mbati, “Ndinasasanya pinthu pyonsene kukhala pyachinchino.” Adalonga pontho kuna ine mbati, “Ulembe penepi thangwi mafala enewa ngakuonadi, pontho akunyindirika.” 6Adalonga pontho mbati, “Pyamala! Ndine Alefa pontho Omega, nyakutoma na nyakumalisa. Ule anava nyota ndinampasa mwakukhonda pagali madzi akubulukira m'mphuno za madzi akupasa moyo.#Yes. 55.1. 7Nyakukunda onsene ndinampasa penepi. Ine ndinakhala Mulungu wache, iyembo anakhala mwananga.#2Sam. 7.14; Mas. 89.26, 27. 8Mbwenye anyamantha na anyakusowa chikhulupiro, anyakuchita pyakunyansa, mphandu, anyakuchita pyakuzuda, anyamatsenga, anyakupembedza mifanikizo, na anyakunama onsene, mbuto zawo ndi nyanza ya moto wa sulufule. Yeneyi ndi imfa yachiwiri.”

Pya Yerusalemu wachinchino

9Mbodzi mwa angelo anomwe, ale akhaphatirira ndilo zinomwe zakudzala na miliri yakumalisa minomwe adadza kuna ine mbalonga mbati, “Bwera ndikuonese nyakufuna kukazhali na Mwanabira.” 10Ndidagudumirwa na Mzimu Wakuchena, tenepo mngelo adandithukula mbandiendesa kuphiri ikulu pontho yakulapha. Adandionesa Yerusalemu, Mzinda Wakuchena, wakutchitha kudzulu kuna Mulungu,#Ezk. 40.2. 11mbuyetima na demelero ya Mulungu. Mzinda wenewu udayetima ninga mwala wakudula, ninga mwala wa yasipi, wakuoneka ninga mwala wa khulustali. 12Mzinda ule ukhali na mafufu makulu-makulu pontho akulapha, pontho ukhali na misuwo khumi na miwiri. Anyakuonera misuwoyo akhali angelo khumi na awiri. Pamisuwopo padalembwa madzina a madzinza khumi na awiri a Aisraele.#Ezk. 48.30-35. 13Makhundu onsene manayi akhali na misuwo mitatu-mitatu. Mitatu kumabulukiro dzuwa, mitatu kumpoto, mitatu kumwera, pontho mitatu kumadokero dzuwa. 14Mafufu a mzinda wenewu adamangwa pamiyala ya maziko khumi na miwiri yakuikhwa pansi. Pamiyala yeneyi padalembwa madzina khumi na awiri a anyakutumwa a Mwanabira. 15Mngelo adalonga na ine ule akhali na mdida wa mthondodzo wa golidi kuyeza nawo mzinda ule, mafufu na misuwo yache.#Ezk. 40.3. 16Mzinda ukhali sasawa makhundu onsene; umimba na ulaphi wache pikhali sasawa. Mngelo adauyeza mzindawu na mdida wache wa mthondodzo: ulaphi na umimbache na chengo chene pikhali mathanyo chikwi cha pikwi piwiri na madzana manayi. 17Mngelo ule adayeza pontho fufu. Chengo#21.17 Chengo: penu Ntchindu. chache chikhali makhono makumi matanthatu, malingana na mdida ukhaphatisa iye basa. 18Mafufu adasasanywa na miyala yakuchemerwa yasipi. Mzinda udasasanywa na golidi chadi-chadi wakuonekera ninga gilazi.#Yes. 54.11, 12. 19Miyala ya maziko a mafufu a mpanda pikhali pyakusasanywa na miyala yamtundu na mtundu yakudula. Mwala wa maziko akutoma ukhali yasipi, wachiwiri ukhali safira, wachitatu ukhali kalikedoni, wachinayi ukhali samarada, 20wachishanu ukhali onikisi, wachitanthatu ukhali kaneliani, wachinomwe ukhali kirisolite, wachisere ukhali berili, wachifemba ukhali topazi, wachikhumi ukhali kirisoparasa, wachikhumi na chibodzi ukhali yakinthu, pontho wachikhumi na chiwiri ukhali amatisita. 21Misuwo khumi na miwiri ya mzinda ule idasasanywa na miyala khumi na miwiri ya usanga wakudula. Pamsuwo onsene mwala wa usanga ubodzi-ubodzi. Msewu ukulu wa mumzinda mule ukhali wa golidi chadi-chadi ninga gilazi yakuonekera uku na uku.

22Ine sidaone Nyumba ya Mulungu mumzinda mule tayu, thangwi Mbuya Mulungu Wamphamvu zonsene na Mwanabira ndiye Nyumba ya Mulungu. 23Mzinda wenewu nkhabe funika dzuwa penu mwezi tayu kuti aumwinikire thangwi demelero ya Mulungu ndiye imbaumwinikira, Mwanabira mbakhala nyale yache.#Yes. 60.19, 20. 24Madzinza a padziko yapansi anafamba akumwinikirwa na cheza cha mzindawu. Mafumu a dziko yapansi anadza na mfuma zawo mumzindamu.#Yes. 60.3. 25Misuwo ya mzindawu inakhala yakufungulwa ndzidzi onsene; nkhabeve dzafungwa thangwi nkhabe dzakhala mosiku tayu.#Yes. 60.11. 26Demelero na mfuma ya madzinza pinapitiswa mumzindamu. 27Mbwenye nkhabe chinthu chakuipa chinafuna dzapitiswa mumzindamu, penu munthu wakuchita pinthu pyakuchitisa manyadzo, penu kulonga pyakunama tayu. Mbwenye ale ene basi madzinawo adalembwa m'bukhu ya moyo ya Mwanabira ndiye anapita mumzindamo.#Yes. 52.1; Ezk. 44.9.

Currently Selected:

CHIDZIWISO 21: SenaMw

Highlight

Copy

Compare