CHIDZIWISO 2

Mphangwa kuna mpingo wa ku Efeso

1“Kuna mngelo wa mpingo wa ku Efeso umulembere kuti:

“Mafala akubulukira kuna ule anaphatira nyenyezi zinomwe kudzanjache yamadyo mbafamba pakati pa pyakuikhirapo nyale pinomwe pya golidi mbawa: 2Mabasako onsene ndimbaadziwa; ndimbapidziwa kuti udaphata basa mwakuwangisa mbupirira pikulu. Ndimbapidziwa pontho kuti iwe nkhabe yang'ana kwene anthu akuipa tayu. Anthu ambapiyesa okha ene kuti mbanyakutumwa, kwache iwo si anyakutumwa tayu, udaayesa mbuona kuti mbakunama. 3Iwe ndiwe wakupirira, udabonera pyakwanga thangwi yakundiphatira basa, pontho iwe hudatope tayu. 4Kwache chinthu chinafuna ine kukupokanya nacho ntchichi: chinchino iwe nkhabe kundifuna ninga mukhachitira iwe pakutoma pale tayu. 5Nyerezeratu mphapo kwagwera iwe. Leka pyakudawa pyako mbuphate pontho pikhaphata iwe pakutoma pile. Ungakhonda leka pyakudawa pyako ndinadza mbandibulusa chakuikhirapo nyale chako pambuto pache. 6Chimbakomera iwembo ntchakuti umbazonda pinthu pimbachita Anikolai#2.6 Anikolai: ndi gulu ile ikulongwa m'bukhu ya Chidziwiso (Chid. 2.6, 15). Iwo akhabausa akhristu pakuafunzisa kuti kuchita uputa pontho kudya nyama yakuperekwa nsembe kuna mifanikizo si kudawa tayu. pile ninga mumbapizondera inembo.

7“Ule ana makutu akuva, mbave pinalonga Mzimu Wakuchena kuna mipingopi!

“Nyakukunda ndinampasa utongi wakudya nsapo za muti wakupasa moyo ule uli m'munda mwa Mulungu.#Kut. 2.9; Ezk. 28.13; 31.8; Chid. 22.2.

Mphangwa kuna mpingo wa ku Simirina

8“Kuna mngelo wa mpingo wa ku Simirina umulembere kuti:

“Mafala akubulukira kuna nyakutoma pontho nyakumalisa, ule adafa mbakhala pontho na moyo mbawa:#Yes. 44.6; 48.12; Chid. 1.17; 22.13. 9nyatwa zako ndimbazidziwa, pontho kutcherenga kwako ndimbakudziwa (kwache ndiwedi nyakufuma!) Pyakuipa pimbakulongera anthu ambapiyesa kuti mba Yuda ale, kwache si Ayuda tayu, ndimbapidziwa; iwo ngam'gulu ya Satana. 10Leka chita mantha na nyatwa zinafuna iwe kuona chinchinozi. Vesera kuno! Satana anayesa anango a imwe pakukuponyani m'perezo mbamusanyika nsiku khumi. Khala wakukhulupirika kuna ine, podi na kufa kwene, tenepo ndinakupasa moyo ninga mfupo wakuonesa kukunda kwako.

11“Ule ana makutu akuva, mbave pinalonga Mzimu Wakuchena kuna mipingopi!

“Anyakukunda nkhabe dzakuwazwa na imfa yachiwiri tayu.#Chid. 20.14; 21.8.

Mphangwa kuna mpingo wa ku Perigamu

12“Kuna mngelo wa mpingo wa ku Perigamu umulembere kuti:

“Mafala akubulukira kuna nyakukhala na talasada yakutwa uku na uku mbawa: 13Ndimbapidziwa kuti kumbakhala iwe ndiye kuna mpando wachifumu wa Satana. Iwe wakhala wakukhulupirika kuna ine mbukhonda kutaya chikhulupiro chako podi na pandzidzi wa Antipasi, mboni yanga yakukhulupirika. Iye adapherwa kuna iwe makako, kumbakhala Satana kule. 14Mbwenye pana pinthu pingasi pinafuna ine kukupokanya napyo: kuna iweko kuna anthu anango ale ambateweza chifunziso cha Balamu, ule adafunzisa Balaki kuchitisa Aisraele kudawa pakuanyengerera kuti adye pyakudya pyakuperekwa nsembe kuna mifanikizo, pontho kuchita pyakuzuda.#Kal. 22.5, 7; 25.1-3; 31.16; Deut. 23.4. 15Ntchibodzi-bodzi pakati pako pana anthu anango ale ambateweza chifunziso cha Anikolai. 16Natenepo leka pyakudawa pyako. Ungakhonda leka pyakudawa pyako ndinati ndidze kuna iwe chinchino pano mbandichita nkhondo na anthu enewa na talasada yakubuluka m'kanwa mwanga.

17“Ule ana makutu akuva, mbave pinalonga Mzimu Wakuchena kuna mipingopi!

“Kuna anyakukunda ndinaadyesa mana akubisika. Ndinapereka pontho kuna munthu onsene wa iwo mwala wakuchena wakulembwa dzina yachinchino, ile yakuti nkhabe kuidziwa munthu na mbodzi ene tayu, kupambula nyakuitambira yekha basi!#Kub. 16.14, 15; 16.33, 34; Yoh. 6.48-50; Yes. 62.2; 65.15.

Mphangwa kuna mpingo wa ku Tiatira

18“Kuna mngelo wa mpingo wa ku Tiatira umulembere kuti:

“Mafala akubulukira kuna Mwana Mulungu, ule maso ache ngakuyerima ninga malulume a moto, pontho manyalo ache ngakuyetima ninga utale mbawa: 19Mabasako onsene ndimbaadziwa. Kuafuna kwako anango, kukhulupirika kwako, kuphata kwako basa ya Mulungu, na kupirira kwako kwene ndimbapidziwa. Ndimbapidziwa chinchino ukuphata basa kupiringana pakutoma pale. 20Kwache chinthu chinafuna ine kukupokanya nacho ntchichi: iwe umbayang'ana kwene mkazi wakuchemerwa Yezebele, ule ambapilonga kuti ndi mprofeti. Na chifunziso chache iye ambanyengeza anyabasanga mbaafunzisa kuti achite pinthu pyakuzuda mbadya pyakudya pyakuperekwa nsembe kuna mifanikizo.#1Maf. 16.31; 2Maf. 9.22, 30. 21Mkazi weneyu ndidampasa ndzidzi wakuti aleke pyakudawa pyache, kwache iye hadafune kuleka pyakuzuda pyachepyo tayu. 22Natenepo ndinamchitisa kugona pabonde na utenda ukulu mbandionesa nyatwa ikulu kuna ale akhachita naye pyauputa angakhonda leka pyakudawika pikhachita iwo na iye pile. 23Ndinapha anyakutewerache, penepo mipingo yonsene inapidziwa kuti ine ndine nyakudziwa manyerezero awo na pikhumbo pyawo. Ndinapagali munthu onsene muna iwe pyakuthemerana na mabasache.#Mas. 7.9; 62.12; Yer. 17.10.

24“Mbwenye anango monsenene a mumpingo wa ku Tiatira hamudateweza chifunziso chakuipachi tayu; mbamukhonda kufunzambo pimbalonga iwo kuti ‘mphinthu pyakuzwika pyakubisika pya Satana.’ Sinakuthimizirani mitolo inango padzulu pa yeneyi tayu, 25mbwenye imwe muphatise pidafunza imwe, kufikirana ndibwere. 26Kuna nyakukunda ule ambachita pinafuna ine mpakana kumamalisiro ndinampasa utongi pa anthu a madzinza onsene,#Mas. 2.8, 9. 27utongi ule udatambira ine kubulukira kuna Baba. Iwo anaatonga na mthondodzo wa simbi mbaaswa ninga nkhali 28mbandiapasa nthanda.

29“Ule ana makutu akuva, mbave pinalonga Mzimu Wakuchena kuna mipingopi!

Currently Selected:

CHIDZIWISO 2: SenaMw

Highlight

Copy

Compare