CHIDZIWISO 1

1Bukhu yeneyi ikulonga pya chidziwiso chidalonga Yesu Khristu chile. Mulungu adampasa chidziwiso chenechi kuti aonese anyabasache pinthu pyathema kuchitika chinchino pano. Khristu adaonesa nyabasache Yohani pinthu penepi kudzera muna mngelo wache adatuma iye ule. 2Yohani alonga pyonsene pidaona iye mbachitira umboni mafala a Mulungu na pyakuonadi pidatchulula Yesu Khristu. 3Ngwakutsanzaya munthu anawerenga bukhu yeneyi, pontho ngakutsanzaya ale anavera mafala a mphangwa zauprofeti m'bukhumu mbaakoya mumtima mwawo! Thangwi ndzidzi wakuti pyonsenepi pichitike uli chifupi kudza.

Yohani apereka mwenyikiro kuna mipingo minomwe

4Kubulukira kuna ine Yohani,

Kwenda kuna mipingo minomwe m'nthemba ya Asia:

Kuna imwe mbakukhale mtendere na kukoma mtima pyakubulukira kuna Mulungu, ule alipo chinchino, akhalipo kale, pontho anakhalapo kwenda na kwenda, pontho pyakubulukira kuna mizimu minomwe yakukhala pamaso pampando wache wachifumu,#Kub. 3.14; Chid. 4.5. 5pontho pyakubulukira kuna Yesu Khristu, mboni yakukhulupirika, nyakutoma kulamuka kuimfa, pontho mfumu wa mafumu onsene a padziko yapansi ule.

Iye ambatifuna, tenepo na imfache ya pamtanda ninga nsembe, iye adatisudzula kuna pyakudawa pyathu.#Yes. 55.4; Mas. 89.27. 6Iye adatisanduza kukhala dzinza yachifumu, pontho anyansembe kuti tiphatire basa Babache Mulungu. Kuna Yesu Khristu kukhale demelero na mphamvu kwenda na kwenda! Ameni.#Kub. 19.6; Chid. 5.10.

7Ngayang'anani, iye akudza pamakole! Munthu onsene anamuona. Podi na adamlasa ene ale anamuona. Anthu a madzinza onsene a padziko yapansi analira thangwi ya iye. Pilekeni pikhale tenepo! Ameni.#Dan. 7.13; Zek. 12.10; Mt. 24.30; Mk. 13.26; Lk. 21.27; Yoh. 19.34, 37; 1Ates. 4.17.

8Mbuya Mulungu Wamphamvu zonsene, ule alipo chinchino, akhalipo kale, pontho anakhalapo kwenda na kwenda alonga mbati, “Ine ndine nyakutoma, pontho nyakumalisa.”#Kub. 3.14; Chid. 22.13.

Yohani aona Khristu kumasomphenya

9Ine ndine Yohani, mbaleanu, pontho mwanzanu wakukwata naye khundu m'nyatwa, mu Ufumu, na mukupirira mwakufulika, ninga nyakutewera Yesu. Ndidaponywa pantchuwa ya Patimo thangwi ndikhalalika mafala a Mulungu na pyakuonadi pidatchulula Yesu. 10Pa Nsiku ya Mbuya ndidagudumirwa na Mzimu Wakuchena, tenepo ndidava kunduli kwanga fala yamphamvu ninga kulira kwa ngoma. 11Fala ile idaveka kuti, “Lemba mumpukutu pinaona iwe mbuutumize kuna mipingo minomwe: Mpingo wa ku Efeso, wa ku Simirina, wa ku Perigamu, wa ku Tiatira, wa ku Saridi, wa ku Filadelifia, na wa ku Laodikea.” 12Pidazungunuka ine kuti ndione ule akhalonga na ine, ndidaona pyakuikhirapo nyale pinomwe pya golidi. 13Pakati pa nyale zile ndidaona unango wakukhala ninga munthu. Iye adavala mkhanjo wakufika kumanyalo, pagangafuwa pachembo adamangapo na bande ya golidi.#Dan. 7.13; 10.5. 14Tsisi yache ikhali ninga ubweya wakuchena wa bira, penu ninga matalala. Maso ache akhayerima ninga malulume a moto;#Dan. 7.9. #Dan. 10.6. 15manyalo ache akhayetima ninga utale wakunyunguluswa m'dzenje ya moto. Falache ikhatitima ninga madzi mazinji.#Ezk. 1.24; 43.2. 16M'dzanjache yamadyo adaphatira nyenyezi zinomwe. M'kanwa mwache mudabuluka talasada yakutwa uku na uku. Nkhope yache ikhayetima ninga kugaka kwa dzuwa masikati.

17Pidamuona ine, ndidagwa pansi pamanyalo ache ninga munthu wakufa. Mbwenye iye adandisanjika dzanjache yamadyo mbandipanga mbati, “Leka gopa! Nyakutoma, pontho nyakumalisa ndine pano.#Yes. 44.6; 48.12; Chid. 2.8; 22.13. 18Ana moyo ule ndine pano! Ine ndikhali wakufa, mbwenye chinchino ndina moyo kwenda na kwenda. Imfa na dziko ya anthu akufa#1.18 dziko ya anthu akufa: Pidanyerezerwa kuti anthu akufa adathimiza kukhala m'dziko yamdima pansi pamataka. ene pili pansi pa utongi wanga. 19Tenepo, lemba pyaona iwepi, pinthu pinachitika ndzidzi uno na pile pene pinafuna dzachitika m'tsogolo muno. 20Pyakubisika pya nyenyezi zinomwe zaona iwe m'dzanjanga yamadyo, na pyakuikhirapo nyale pinomwe pya golidi pile pikulonga tenepa: nyenyezi zinomwe zile ndi angelo a mipingo minomwe, pyakuikhirapo nyalembo pinomwe pile ndi mipingo minomweyo.

Currently Selected:

CHIDZIWISO 1: SenaMw

Highlight

Copy

Compare