CHIDZIWISO 16

Ndilo za ukali wa Mulungu

1Tenepo ndidava fala yakugaluza kulonga kuna angelo anomwe ale kubulukira m'Nyumba ya Mulungu kuti, “Ndoko kakhuthule ndilo zinomwe za ukali wa Mulungu padziko yapansi!” 2Mngelo wakutoma adenda mbakakhuthula ndilo yache padziko yapansi. Pironda pyakugoswa na pyakupha pidabuluka m'manungo mwa ale akhali na chidindo cha chirombo na mwa ale adapembedza mfanikizo wache.#Kub. 9.10.

3Tenepo mngelo wachiwiri adakhuthulambo ndilo yache pabara. Madzi adasanduka ninga chiropa cha munthu wakufa. Tenepo pinthu pyonsene pyamoyo pidafa m'baramo.

4Mngelo wachitatu adakhuthula ndilo yache m'mikulo na m'mphuno za madzi; madzi ache adasanduka chiropa.#Kub. 7.17-21; Mas. 78.44. 5Ndidava mngelo wakuyang'anira madzi kulonga mbati, “Kutonga mseru kwachita imwe nkhwakulungama. Imwe nyakuchena, ndimwe ule alipo chinchino, pontho ule akhalipo kale! 6Anthu enewa adachuchisa chiropa cha anthu a Mulungu na cha maprofeti, natenepo mwaapasambo chiropa kuti amwe. Tenepo akutambira pyakuthemerana na pidachita iwo.” 7Penepo ndidava fala yakubulukira pa guwa yansembe kulonga kuti, “Mbuya Mulungu Wamphamvu zonsene, kutonga kwanu mseru nkhwakuonadi pontho kwakulungama!”

8Tenepo mngelo wachinayi adakhuthulira ndilo yache padzuwa. Dzuwayo idatawiriswa kuti ipise anthu na moto wache. 9Iwo adapiswa na kupisa kwakugoswa, tenepo anthu ale adatemberera Mulungu, ule ana utongi pamiliri yeneyi. Kwache iwo hadaleke pyakudawa pyawo mbakuza Mulungu tayu.

10Tenepo mngelo wachishanu adakhuthulira ndilo yache pampando wachifumu wa chirombo. Mdima udagwera ufumu wa chirombo. Anthu adadzadzada malulume awo thangwi ya kuva kwawo kupha.#Kub. 10.21. 11Iwo adatemberera Mulungu wa kudzulu thangwi ya pironda na kuva kwawo kupha. Kwache iwo hadaleke pyakudawa pyawo tayu.

12Tenepo mngelo wachitanthatu adakhuthulira ndilo yache pamkulo ukulu wa Yufurate. Mkulo udauma kupereka njira kuna mafumu akubulukira kumabulukiro dzuwa.#Yes. 11.15. 13Tenepo ndidaona mizimu mitatu yakuipa ile idaoneka ninga anyanchidwe. Mizimu yeneyi ikhabulukira m'kanwa mwa nthonga, m'kanwa mwa chirombo na m'kanwa mwa mprofeti wakunama. 14Yeneyi ndi mizimu mitatu yakuipa, ile imbachita pyakudodomesa. Mizimuyi imbaenda kuna mafumu a padziko yonsene yapansi kugumanyisa mafumu onsene pabodzi kudzamenya nkhondo pa Nsiku ikulu ya Mulungu Wamphamvu zonsene.

15Mbuya akulonga kuti, “Ngavani! Ndikudza ninga mbava! Ngwakutsanzaya ule anakhala m'maso mbakoya nguwo zache chifupi na iye, towera akhonde dzafamba chipezi-pezi mbachita napyo manyadzo!”#Mt. 24.43, 44; Lk. 12.39, 40; Chid. 3.3.

16Tenepo mizimu ile idagumanyisa mafumu onsene ale pabodzi pene pambuto yakuchemerwa Aramagedo.#16.16 Aramagedo: Fala yeneyi ndi dzina ya Phiri ya Megido M'Chiverano Chakale ndi mbuto kule kudakunda Mulungu anyamalwache kazinji kene. Tenepo ndi mbuto kule kunafuna Mulungu dzakunda gulu yankhondo ya anyamalwache (Chid. 16.16) m'Chiheberi.#2Maf. 23.29; Zek. 12.11.

17Kubuluka penepo mngelo wachinomwe adawazira ndilo yache m'dzulu. Fala yakugaluza idaveka kubulukira kumpando wachifumu m'Nyumba ya Mulungu kulonga kuti, “Pyamala!” 18Pakhali kuchetuma kwa njazi, mungu na kuguma kwa chiphaliwali, pontho chiteke-teke chakugoswa. Chipo nkhabe chiteke-teke chinango chakukhala ninga chenechi chidachitika kutomera kulengwa kwa munthu tayu; chenechi chikhali chakugoswa pyakwanga kupiringana pyonsene.#Chid. 8.5; 11.13, 19. 19Mzinda ukulu udagawikana m'mapindi matatu. Mizindambo ya madziko onsene idavungika. Mulungu adakumbuka mzinda ukulu wa Babiloni mbaumwesa vinyu wa m'khomitcho mwache, vinyu wa ukali wache wakugoswa.#Yes. 51.17. 20Ntchuwa zonsene zidabisika; mapiri onsene adamala fudzika.#Chid. 6.14. 21Matalala akulu-akulu, akulemera ninga makilogramu makumashanu na ibodzi adagwera anthu kubulukira kudzulu. Tenepo iwo adatemberera Mulungu thangwi ya miliri ya matalalawo, podi miliri ikhali yakugoswa pyakwanga.#Kub. 9.23; Chid. 11.19.

Currently Selected:

CHIDZIWISO 16: SenaMw

Highlight

Copy

Compare