KALEMBERA 29
29
Chakupereka cha pa Phwando ya Chaka Chitswa
(Lev. 23.23-25)
1Pansiku yakutoma ya mwezi wachinomwe mugumanyikane kuti mupembedze mbamuleke phata mabasanu a nsiku na nsiku. Pansiku yeneyo ngoma zathema kulizwa. 2Perekani nsembe yakupyerera kuna MBUYA, khwemache imbamkomera MBUYA: mwanamphulu mbodzi wamamuna, bira wamamuna mbodzi na anabira anomwe a chaka chibodzi, onsenewa akhale akusowa chilema. 3Perekani chakupereka cha mapira cha ufa wakunyodoka wakuvungazwa na mafuta aolivi: ufa wakulemera makilogramu matatu aperekwe pabodzi pene na ng'ombe; makilogramu mawiri aperekwe pabodzi pene na bira; 4pontho kilogramu ibodzi iperekwe pabodzi pene na mwanabira onsene. 5Pontho perekani bokho mbodzi kukhala nsembe yakubulusira pyakudawa; na njira yeneyi chitani mwambo wakuchenesa anthu onsene. 6Perekani penepi kuthimizira pa nsembe yakupyerera imbapereka imwe pansiku yakutoma ya mwezi onsene pabodzi pene na chakupereka chache cha mapira, pontho na nsembe yakupyerera imbapereka imwe nsiku na nsiku pabodzi pene na chakupereka chache chakumwa, khwemache ya pyakupereka penepi MBUYA ambakomerwa napyo.
Chakupereka cha pa Nsiku yakulekererwa Pyakudawa
(Lev. 23.26-32)
7Pansiku yachikhumi ya mwezi wachinomwe gumanyikanani kuti mupembedze; lekani kudya chinthu na chibodzi chene mbamuleke phata mabasanu a nsiku na nsiku.#Lev. 16.29-34. 8Perekani nsembe yakupyerera kuna MBUYA, ile khwemache imbamkomera MBUYA: mwanamphulu wamamuna mbodzi, pontho na anabira anomwe a pyaka pinomwe, onsenewa akhale akusowa chilema. 9Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu a ufa aperekwe pabodzi pene na mwanamphulu wamamuna, makilogramu mawiri aperekwe pabodzi pene na bira wamamuna, 10kilogramu ibodzi iperekwe pabodzi pene na mwanabira onsene. 11Perekani pontho bokho mbodzi kukhala nsembe yakubulusira pyakudawa. Kuthimizira pa bokho adaperekwa kuchita mwambo wakuchenesa anthu ule, pontho na nsembe yakupyerera ya nsiku na nsiku pabodzi pene na chakupereka chache cha mapira pontho chakupereka chache chakumwa.
Chakupereka cha pa Phwando ya Misasa
(Lev. 23.33-44)
12Pansiku yakhumi na chishanu ya mwezi wachinomwe gumanyikanani kuti mupembedze. Chitani phwando yakulemedza nayo MBUYA nsiku zinomwe mbamuleke phata mabasanu a nsiku na nsiku.#Lev. 23.34; Deut. 16.13-15. 13Pansiku yakutomayi perekani kuna MBUYA chakupereka chakusasanywa na moto, chile khwemache imbamkomera MBUYA: anamphulu amuna khumi na atatu, mabira amuna awiri, anabira achimuna khumi na anayi a chaka chibodzi, onsenewa akhale akusowa chilema. 14Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu aperekwe pabodzi pene na ng'ombe yonsene, makilogramu mawiri aperekwe pabodzi pene na bira onsene, 15kilogramu ibodzi iperekwe pabodzi pene na mwanabira onsene. 16Mupereke pontho bokho mbodzi kukhala nsembe yakubulusira pyakudawa. Perekani penepi kuthimizira pa nsembe yakupyerera imbapereka imwe nsiku na nsiku pabodzi pene na chakupereka chache cha mapira pontho chakupereka chache chakumwa.
17Pansiku yachiwiri perekani anamphulu amuna khumi na awiri, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema. 18-19Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
20Pansiku yachitatu perekani anamphulu amuna khumi na mbodzi, mabira amuna awiri, na anabira amuna khumi na anayi a chaka chibodzi, onsenewa akhale akusowa chilema. 21-22Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
23Pansiku yachinayi perekani anamphulu amuna khumi, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema. 24-25Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
26Pansiku yachishanu perekani anamphulu amuna afemba, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema. 27-28Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
29Pansiku yachitanthatu perekani anamphulu asere, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema. 30-31Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
32Pansiku yachinomwe perekani anamphulu amuna anomwe, mabira amuna awiri, pontho na anabira khumi na anayi a chaka chibodzi, onsenewa akhale akusowa chilema. 33-34Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
35Pansiku yachisere gumanyikanani kuti mupembedze mbamuleke phata mabasanu a nsiku na nsiku. 36Perekani nsembe yakupyerera kukhala chakupereka chakusasanywa na moto kuna MBUYA, chile khwemache imbamkomera MBUYA: mwanamphulu wamamuna mbodzi, bira wamamuna mbodzi, pontho na anabira amuna anomwe a chaka chibodzi, onsenewa akhale akusowa chilema. 37-38Penepi mupereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.
39Wenewu ndiye mwambo wa nsembe zakupyerera, pyakupereka pya mapira, pyakupereka pyakumwa na nsembe zachiphatizano, pile pyathema imwe kupipereka kuna MBUYA pandzidzi wa maphwando anu akusankhulika. Penepi nkhuthimizira pa pyakupereka pimbapereka imwe kuchitisa kuti pidadumbira imwe pikwane-kwane penu pyakupereka na kufuna kwache munthu.
40Natenepo Mose adapanga Aisraele pyonsene pikhadalonga MBUYA pile.
Currently Selected:
KALEMBERA 29: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
