KALEMBERA 28
28
Pyakupereka pya nsiku na nsiku
(Kub. 29.38-46)
1MBUYA adalonga kuna Mose 2kuti apange Aisraele kuti iwo athema kupereka pandzidzi wache wakusankhulika pyakupereka pyakusasanywa na moto kuna MBUYA ninga khwema yakumkomera MBUYA.
3Pyakupereka pyakusasanywa na moto pile pyathema kuperekwa kuna MBUYA mphipi: anabira amuna awiri a chaka chibodzi akusowa chilema ninga nsembe yakupyerera ya nsiku na nsiku. 4Bira mbodzi aperekwe nsembe na machibese, nyachiwiriacheyi aperekwe nsembe pakuthobila dzuwa. 5Pa mabira awiri paperekwe chakupereka cha mapira chakulemera kilogramu ibodzi chakuvungazwa na mafuta adidiletu aolivi akukwana tugwe mbodzi. 6Chenechi ntchakupereka cha nsiku na nsiku chile chimbapiswa chonsenene. Chenechi ntchile chidakhazikiswa paphiri ya Sinai kukhala chakupereka chakusasanywa na moto kuna MBUYA, chile khwemache MBUYA ambakomerwa nayo. 7Chakupereka chakumwa cha vinyu chakukwana tugwe mbodzi chikhuthulirwe pana mabira awiri ale paguwa yansembe. 8Pakuthobila dzuwa perekani bira wachiwiriyo ninga montho mwachitira imwe na chakupereka cha machibese chile pabodzi pene na chakupereka chakumwa. Chenechi pontho ntchakupereka chakusasanywa na moto kuna MBUYA, chile khwemache imbamkomera MBUYA.
Chakupereka cha pa Nsiku Yakupuma
9Pa Nsiku Yakupuma perekani anabira amuna awiri a chaka chibodzi akusowa chilema, ufa wakulemera makilogramu mawiri wakuvungazwa na mafuta aolivi kukhala chakupereka chakumwa, pontho na chakupereka cha mapira. 10Nsembe yakupyererayi yathema kuperekwa pa Nsiku yonsene Yakupuma kuthimizira pa nsembe yakupyerera ya nsiku na nsiku pabodzi pene na chakupereka chache chakumwa.
Chakupereka cha mwezi na mwezi
11Perekani nsembe yakupyerera kuna MBUYA pakutoma pamwezi onsene: ng'ombe zimuna zing'ono-zing'ono ziwiri, bira wamamuna mbodzi, na anabira anomwe a chaka chibodzi, onsenewa akhale akusowa chilema. 12Pontho mupereke ufa wakuvungazwa na mafuta aolivi kukhala chakupereka cha mapira. Pabodzi pene na ng'ombe yonsene perekani ufa wakulemera makilogramu matatu; pabodzi pene na bira wamamuna perekani ufa wakulemera makilogramu mawiri; 13pontho pabodzi pene na bira onsene perekani ufa wakulemera kilogramu ibodzi. Nsembe zakupyerera nsakupereka zakusasanywa na moto, zile khwemache MBUYA ambakomerwa nayo. 14Na ng'ombe yonsene paperekwe chakupereka chakumwa cha vinyu chakukwana matugwe mawiri, na bira wamamuna tugwe mbodzi na theka, pontho na mwanabira onsene tugwe mbodzi. Wenewu ndi mwambo wa nsembe zakupyerera zakuperekwa pansiku yakutoma ya mwezi onsene pa chaka. 15Kuthimizira pa nsembe zakupyerera za nsiku na nsiku pabodzi pene na chakupereka chakumwa, perekani bokho mbodzi kukhala nsembe yakubulusira pyakudawa.
Chakupereka cha pa Phwando ya Mikate yakusowa Chakufufumisira
(Lev. 23.5-14)
16Phwando ya Paska yakulemedza nayo MBUYA yathema kuchitika pansiku yakhumi na chinayi ya mwezi wakutoma.#Kub. 12.1-13; Deut. 16.1, 2. 17Pansiku yakhumi na chishanu phwando ya chipembedzo itome. Tenepo pangamala nsiku zinomwe phwandoyo imale. Pandzidzi wa phwandowu idyani mikate yakusowa chakufufumisira.#Kub. 12.14-20; 23.15; 34.18; Deut. 16.3-8. 18Pansiku yakutoma ya phwandoyi mwathema kugumanyikana kupembedza, tenepo lekani phata basa pansiku yeneyo. 19Perekani nsembe yakupyerera kuna MBUYA kukhala chakupereka chakusasanywa na moto: ng'ombe zimuna ziwiri, bira wamamuna mbodzi, na anabira amuna anomwe a chaka chibodzi, onsenewa akhale akusowa chilema. 20Perekani chakupereka cha mapira cha ufa wakunyodoka wakuvungazwa na mafuta aolivi akukwana makilogramu matatu pabodzi na ng'ombe yonsene, makilogramu mawiri pabodzi pene na bira, 21pontho na kilogramu ibodzi pabodzi pene na bira onsene. 22Mupereke pontho bokho mbodzi kukhala nsembe yakubulusira pyakudawa. Na njira yeneyi chitani mwambo wakuchenesa anthu onsene. 23Perekani penepi kuthimizira pa nsembe zakupyerera zimbapereka imwe na machibese onsene zile. 24Montho-monthomo perekani nsiku na nsiku mpakana nsiku zinomwe chakupereka chakusasanywa na moto kuna MBUYA, khwemache imbamkomera MBUYA. Perekani pyakuperekapi kuthimizira pa nsembe yakupyerera ya nsiku na nsiku pabodzi na chakupereka chache chakumwa. 25Pansiku yachinomwe mwathema kugumanyikana pabodzi kuti mupembedze, mbamuleke phata mabasanu a nsiku na nsiku.
Pyakupereka pya pa Phwando ya Pyakuvuna
(Lev. 23.15-22)
26Pansiku yakutoma ya Phwando ya Pyakuvuna, mungapereka pyakupereka pyanu pya mapira achinchino kuna MBUYA, imwe mwathema kugumanyikana kuti mupembedze mbamuleke phata mabasanu a nsiku na nsiku.#Kub. 23.16; 34.22; Deut. 16.9-12. 27Perekani nsembe zakupyerera kuti zikhale khwema yakukomera MBUYA: anamphulu amuna awiri, bira mbodzi na mabira anomwe a chaka chibodzi, onsenewa akhale akusowa chilema. 28Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu aperekwe pabodzi na ng'ombe yonsene, makilogramu mawiri aperekwe pabodzi na bira wamamuna, 29pontho kilogramu ibodzi iperekwe pabodzi na mwanabira onsene. 30Perekani pontho bokho mbodzi kukhala nsembe yakubulusira pyakudawa. Na njira yeneyi chitani mwambo wakuchenesa anthu onsene. 31Perekani penepi na chakupereka chakumwa kuthimizira pa nsembe yakupyerera ya nsiku na nsiku pabodzi na chakupereka chache cha mapira.
Currently Selected:
KALEMBERA 28: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
