KALEMBERA 1
1
Kalembera wakutoma wa Aisraele
1MBUYA adalonga kuna Mose m'Chikhumbi cha Mulungu, m'thando yatchetcha ya Sinai pansiku yakutoma ya mwezi wachiwiri wa chaka chachiwiri pidabuluka Aisraele m'dziko ya Iguputo. Iye adalonga mbati,#Kal. 26.1-51. 2“Iwe na Aroni chitani kalembera wa Aisraele onsene malingana na madzinzawo pontho mabanjawo. Mulembe dzina ya mamuna onsene 3wakukwanisa pyaka makumawiri pyakubalwa penu kupiringana penepo, ale anakwanisa kupita unyankhondo. Mualembe madzinawo malingana na gulu ina iwo. 4Munthu mbodzi kada dzinza, ule ndi mkadamu wa banja, athema kukuphedzani.” 5-15Madzina a anthu ale athema kuphata basa yeneyi mbawa:
| Elizuri mwana Shedeuri wa dzinza ya Rubeni; |
| Shelumiele mwana Zurishadai wa dzinza ya Simioni; |
| Nashoni mwana Aminadabu wa dzinza ya Yuda; |
| Netanele mwana Zuari wa dzinza ya Isakara; |
| Eliabu mwana Heloni wa dzinza ya Zebuloni; kubulukira kuna ana achimuna a Yosefe mbawa: |
| Elishama mwana Amihudi wa dzinza ya Eferemu; Gamaliele mwana Pedazuri wa dzinza ya Manase; |
| Abidani mwana Gideoni wa dzinza ya Benjemani; |
| Ahiezere mwana Amishadai wa dzinza ya Dani; |
| Pagiele mwana Okarani wa dzinza ya Asheri; |
| Eliasafu mwana Deuele wa dzinza ya Gadi; |
| Ahira mwana Enani wa dzinza ya Nafitali. |
16Enewa mbamuna ale adasankhulwa kubulukira kuna anthu onsene a Israele. Iwo akhali akadamu m'madzinza mwawo.
17Mose na Aroni pabodzi na amuna, ale madzinawo akhadaperekwa, 18adachemeresa anthu onsene a Israele kugumanyikana pabodzi pansiku yakutoma ya mwezi wachiwiri mbaalemba anthu onsene malingana na mbumba, pontho mabanjawo. Madzina a amuna onsene a pyaka makumawiri pyakubalwa, penu kupiringana penepo adamala lembwa na kulengeswa kwene, 19ninga mudalongera MBUYA. M'thando yatchetcha ya Sinai Mose adalemba anthu onsene.
20-43Amuna onsene a pyaka makumawiri pyakubalwa penu kupiringana penepo, ale akhali akukwanisa kupita unyankhondo, onsene mbodzi mbodzi akhadamala lembwa madzinawo malingana na mbumba pontho mabanjawo kutoma na pidzukulu pya Rubeni mwana wautombo wa Israele. Konta ya anthu a dzinza yonsene ikhali tenepa:
| Dzinza ya Rubeni ikhali na pikwi makumanayi na pitanthatu na madzana mashanu. |
| Dzinza ya Simioni ikhali na pikwi makumashanu na pifemba na madzana matatu. |
| Dzinza ya Gadi ikhali na pikwi makumanayi na mashanu na madzana matanthatu na makumashanu. |
| Dzinza ya Yuda ikhali na pikwi makumanomwe na pinayi na madzana matanthatu. |
| Dzinza ya Isakara ikhali na pikwi makumashanu na pinayi na madzana manayi. |
| Dzinza ya Zebuloni ikhali na pikwi makumashanu na pinomwe na madzana manayi. |
| Dzinza ya Eferemu ikhali na pikwi makumanayi na madzana mashanu. |
| Dzinza ya Manase ikhali na pikwi makumatatu na piwiri na madzana mawiri. |
| Dzinza ya Benjemani ikhali na pikwi makumatatu na pishanu na madzana manayi. |
| Dzinza ya Dani ikhali na pikwi makumatanthatu na piwiri na madzana manomwe. |
| Dzinza ya Asheri ikhali na pikwi makumanayi na chibodzi na madzana mashanu. |
| Dzinza ya Nafitali ikhali na pikwi makumashanu na pitatu na madzana manayi. |
44Enewa ndiye amuna ale adalengeswa na Mose pontho Aroni na akadamu khumi na awiri a Aisraele, ale mkadamu onsene akhaimirira banjache. 45Amuna onsene a Aisraele a pyaka makumawiri penu kupiringana penepo, ale akhali akukwanisa kupita unyankhondo adalengeswa na kulembwa kwene madzinawo malingana na mabanjawo. 46Konta ya anthu onsene ikhali pikwi madzana matanthatu na pitatu na madzana mashanu na makumashanu.
47Kwache mabanja a m'dzinza ya Levi hadalengeswe pabodzi na madzinza anango ale tayu, 48thangwi MBUYA adalonga kuna Mose mbati, 49“Leka lengesa anthu a m'dzinza ya Levi penu kualengesa kubodzi na anthu anango a Aisraele. 50M'mbuto mwache sankhula Aleviwo kuti akhale akuyang'anira Chikhumbi cha Mulungu na pyonsene pili mwenemopyo. Iwo basawo njakuthukula Chikhumbicho na pyonsene pili mwenemopyo. Iwo athema kuiyang'anira mwadidi, pontho amange makumbi awo kuzungulira Chikhumbi changachi. 51Ngakhala panafunika kuti Chikhumbichi chibuluke kwenda panango, Alevi ndiye athema kukhutcha pyonsene. Tenepo pangafunika kuti Chikhumbicho chimangwe pontho, Alevi ndiye athema kuchimanga. Munthu unango onsene, ule anafuna dzafedzera chifupi na Chikhumbicho athema kuphiwa. 52Aisraele athema kumanga makumbi awo m'magulu-magulu mwakuti anthu onsene akhale pagulu pawo pansi pa banderawo. 53Kwache Alevi athema kumanga makumbi awo kuzungulira Chikhumbi cha Mulungu, towera ukali wanga uleke gwera anthu onsene a Israele. Alevi basawo njakuyang'anira Chikhumbi cha Mulungu.”
54Aisraele adachita pyonsenepi ninga montho mudalongera MBUYA kuna Mose.
Currently Selected:
KALEMBERA 1: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
