LEVITIKO 27
27
Mwambo wakulonga pya mtukwa wakuperekwa kuna MBUYA
1MBUYA adapanga Mose 2kulonga kuna Aisraele kuti: Ngakhala munapereka munthu kuna MBUYA kuchitisa kudumbira kwakupambulika kudachita imwe kukwane-kwane, munthu weneyo anakwanisa kusudzulwa mungapagali konta ya kobiri ili m'tchindemu, 3-7malingana na mdida ukhaphatiswa basa ndzidzi wenewo:
Mamunamkulu wa pyaka makumawiri pyakubalwa kwenda m'tsogolo mpakana makumatanthatu: Kobiri zasiliva zakukwana makumashanu;
mkazimkulu: Kobiri zasiliva makumatatu;
Mphale wa pyaka pishanu mpakana makumawiri pyakubalwa: Kobiri zasiliva makumawiri;
mtsikana: Kobiri zasiliva khumi;
khombwani wamamuna wa mwezi ubodzi mpakana pyaka pishanu: Kobiri zasiliva zishanu;
khombwani wamkazi: Kobiri zasiliva zitatu;
mkazi wakupiringana pyaka makumatanthatu pyakubalwa: Kobiri zasiliva khumi.
8Ngakhala munthu adadumbirayo ngwakutcherenga pyakwanga mwakuti hanakwanisa tayu kupagali konta ya nsiku na nsiku adzeswe kuna nyansembe, tenepo nyansembeyo anatchithisa kontayo malingana na pinakwanisa kupipagali munthuyo.
9Ngakhala kudumbirako nkhwa nyama yakutambirwa kukhala nsembe kuna MBUYA, tenepo mitukwa yonsene yaperekwa kuna MBUYA njakupambulika. 10Munthu adadumbirayo mbaleke chinjisa nyamayo na inango. Angachita tenepo nyama zonsene ziwiri nsa MBUYA. 11Mbwenye ngakhala kudumbirako nkhwa nyama yokhonda chena, pontho yokhonda tawiriswa kukhala nsembe kuna MBUYA, munthuyo akwate nyamayo kwenda nayo kuna nyansembe. 12Nyansembe alonge konta ya nyamayo malingana na udidi, penu kuipa m'maso kwa nyamayo, tenepo kontache inakhala yonthoyo. 13Ngakhala mwenechiroyo anafuna kuiombola, iye athema kupereka konta yonthoyo pontho chachishanu cha kontache kuthimizirapo.
14Ngakhala munthu anapambulira nyumbache kuna MBUYA, nyansembe ailonge kontache malingana na udidi penu kuipa kwa nyumbayo. Konta inafuna kulonga nyansembe ikhale yonthoyo. 15Ngakhala nyakupambulira nyumbayo kuna MBUYA anafuna kuti aiombole, iye athema kupagali konta yalonga nyansembeyo pontho chachishanu cha kontache kuthimizirapo.
16Ngakhala munthu anapambulira munda ubodzi pa mindache kuna MBUYA, kontache ilongwe malingana na kuinjipa kwa mbewu zidabzala iye m'mundamo pakuchita kulengesa kuti: barele wakulemera makilogramu makumawiri ndi sasawa na kobiri zasiliva khumi. 17Ngakhala iye aupambulira sindzidzi nkhumala chaka chakubwezera, munda wenewu upagali kontache yonsene yamumphu. 18Ngakhala iye aupambulira uku chaka chakubwezera chagwanda kale, pontho papita pyaka pingasi, nyansembe alonge kontache malingana na pyaka pyasalira mbachidzati fika chaka chakubwezera, tenepo kontache inakhala yakutchitha. 19Ngakhala munthu adapambulira mundayo anafuna kuti auombole, iye athema kupagali kontache pontho chachishanu cha kontache kuthimizirapo. 20Ngakhala anaugulisa na munthu unango mbakhonda chakutoma kuuombola m'manja mwa MBUYA, iye ataya mwayi wakuuombola. 21Chaka chakubwezera chingafika mundawo unakhala wakupambulirwa monsene mwene kuna MBUYA; tenepo unakhala wa anyansembe.
22Ngakhala munthu apambulira kuna MBUYA munda udachita iye kugula, 23nyansembe aulonge kontache malingana na pyaka pyasalirapyo mbachidzati fika chaka chakubwezera, pontho munthuyo apereke kobirizo nsiku yonthoyo; kobirizo zinakhala za MBUYA. 24Chaka chakubwezera chingafika, mundawo unabwerera kuna mwenechiro wakutoma, penu kuna pidzukulu pyache.
25Konta yonsene yathema kukhala malingana na mdida ukhaphatiswa basa ndzidzi wenewo. 26Mwana wautombo wa nyama ngwa MBUYA na kale ene, natenepo munthu aleke pambulira yeneyi kuna MBUYA ninga chakupereka chakuperekwa na kufuna kwache. Mwanamphulu, mwanabira na mwanambuzi mphya MBUYA, 27mbwenye mwana wautombo wa nyama yokhonda chena mwenechiro anakwanisa kuiombola malingana na konta ya nyamayo, pontho chachishanu cha kontache kuthimizirapo. Ngakhala mwenechiro nee anafuna kuiombola tayu, iguliswe kuna anthu anango pakonta ikhaphatiswa basa ndzidzi wenewo.
28Ngakhala munthu anafuna kupambulira monsene mwene#27.28 Kupambulira monsene mwene: Chinthu chonsene chakupambulirwa na njira yeneyi chikhasanduka cha MBUYA chene, tenepo icho chidathema nee kuphatiswa basa tayu, mbwenye kuvungwa kwene basi. chinthu chache kuna MBUYA, penu munthu, nyama, munda udamsiyira makolo ache, chathema nee kuguliswa penu kuombolwa tayu; chonsene chakupambulirwa kuna MBUYA ntchakuchena pyakwanga pamaso pache.#Kal. 18.14. 29Nkhabe munthu wakupambulirwa kuna MBUYA athema kuombolwa tayu; iye athema kuphiwa basi.
30Chakhumi chonsene cha pya munda, penu ndi mapira penu nsapo mphya MBUYA. Ipyo mphyakuchena kuna MBUYA.#Kal. 18.21; Deut. 14.22-29. 31Ngakhala mwenechiroyo anafuna kuombola chinthu chachecho, iye athema kupereka kobiri malingana na konta ya chinthucho pontho chachishanu cha kontache kuthimizirapo. 32Chachikhumi cha pifuyo pyonsene ntcha MBUYA. Nyama zingalengeswa, yachikhumi yonsene nja MBUYA. 33Mwenechiro pifuyo mbaleke kusankhula zadidi kusiya zakupupwa, pontho mbaleke kuchinjisa tayu. Ngakhala iye anazichinjisa nyama inango na inango, nyama zonsene ziwirizo zinakhala za MBUYA, pontho mbaleke kuziombola.
34Enewa ndi matongero adapereka MBUYA kuna Mose paphiri ya Sinai kuti Aisraele aateweze.
Currently Selected:
LEVITIKO 27: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
