LEVITIKO 20

Kutchunyuswa thangwi ya kukhonda vera

1MBUYA adapanga Mose 2kulonga kuna Aisraele mbati, “Munthu onsene pakati panupa, penu ndi mlendo wakukhala pakati panu, angapereka anache kuti aphatiswe basa pachipembedzo cha milungu Moleki, weneyo athema kuphiwa pakuponyerwa miyala na dzinza yonsene ya Israele. 3Ngakhala munthu anapereka mwanache mbodzi kuna Moleki mbachitisa Chikhumbi changa chakuchenachi kukhala chakuswipa na kululupisa dzinanga yakuchenayi, ine ndinati ndimpase nkhodolo, pontho iye nkhabeve dzayeswa mbodzi wa anthu anga tayu. 4Mbwenye ngakhala dzinza yonsene ya Israele inayang'ana kwene pinapereka munthu ule mwanache kuna Moleki, pontho mbakhonda kumponyera miyala, 5ine ene ndekha ndinampasa nkhodolo munthuyo pabodzi na banjache yonsene, pontho pabodzi pene na anthu onsene ambamtewera kuchita pinthu pyokhonda khulupirika kuna ine pakupembedza Moleki ale. Anthu enewo ine nkhabe kuayesave ninga anthu anga tayu.

6“Ngakhala munthu anavunza nzeru kuna anyakuombedza na anyakukhumira, ine ndinampasa nkhodolo, pontho ine nkhabeve dzamuyesa mbodzi wa anthu anga tayu. 7Pikoyeni mwekha ene akuchena, thangwi ine ndine MBUYA Mulungu wanu. 8Verani mwambo wanga thangwi ine ndine MBUYA, pontho ine ndimbakuchitisani kukhala akuchena.

9“Ngakhala munthu anatemberera babache na mache, weneyo athema kuphiwa; iye apiphesa yekha ene.#Kub. 21.17; Mt. 15.4; Mk. 7.10. 10Ngakhala munthu achita uputa na mkazi wa Muisraele mnzache, onsene uwiriawo, mkazi na mamuna ene, athema kuphiwa.#Kub. 20.14; Lev. 18.20; Deut. 5.18. 11Mamuna anagonana na mkazi babache alulupisa babache, natenepo onsene uwiriawo, mkazi na mamuna ene, athema kuphiwa; iwo apiphesa okha ene.#Lev. 18.8; Deut. 22.30; 27.20. 12Ngakhala mamuna agonana na mkwenyache, onsene uwiriawo athema kuphiwa, thangwi pyachita iwopyo mphinthu pyakuzuda; iwo apiphesa okha ene.#Lev. 18.15. 13Ngakhala mamuna agonana na mamuna mnzache, iwo achita pinthu pyakunyansa pyakwanga, natenepo onsene uwiriawo athema kuphiwa; iwo apiphesa okha ene.#Lev. 18.22. 14Ngakhala mamuna anasemba mkazi pabodzi na mache mkazi ule, onsene utatuawo athema kuphiwa thangwi ya pinthu pyakuchitisa manyadzo pyachita iwopyo; pinthu ninga penepi pileke tawiriswa pakati panupa.#Lev. 18.17; Deut. 27.23. 15Ngakhala mamuna agonana na nyama, iye na nyamayo athema kuphiwa.#Kub. 22.19; Lev. 18.23; Deut. 27.21. 16Ngakhala mkazi anapiyesera kugonana na nyama, iye na nyamayo athema kuphiwa; iwo apiphesa okha ene.

17“Ngakhala munthu anasemba nyamaingache, penu nyamaingache wa bele inango, iwo alulupiswe pakwecha, pontho athamangiswe m'dzinza ya Israele. Iye agonana na nyamaingache, natenepo iye athema kuoneswa nyatwa.#Lev. 18.9; Deut. 27.22. 18Ngakhala mamuna agonana na mkazi pandzidzi wache wakumwezi, onsene uwiriawo athamangiswe m'dzinzamo, thangwi aswa mwambo wakulonga pya kukhonda chena pamaso pa Mulungu.#Lev. 18.19.

19“Ngakhala mamuna agonana na mkazi mbaleache mache, penu nyamaingache babache, weneyo na mkaziyo aoneswe nyatwa thangwi ya kugonana ubaleawo okhokha. 20Ngakhala mamuna anagonana na mkazi mbaleache babache, mamunayo alulupisa mbaleache babache, natenepo mamuna na mkaziyo anati apagali pyachita iwopyo; nkhabe mbodzi wa iwo anakhala na mwana tayu. 21Ngakhala mamuna anasemba mkazi mbaleache, uwiriawo onsene anakhala akusowa mwana. Mamunayo achita chinthu chokhonda chena pamaso pa Mulungu, pontho alulupisa mbaleache.”#Lev. 18.16.

22MBUYA adalonga mbati, “Koyani mwambo na matongero anga onsene, towera muleke tapikwa na dziko ya Kanani kunakuendesani ineku. 23Lekani tsanzira mitemo ya madzinza anakhala mwenemo; ine ndikuathamangisamo towera mukapite m'dzikomo. Ine ndanyansirwa nawo thangwi ya makhaliro awo akuipa. 24Mbwenye ine ndidadumbira kuti ndinakupasani dziko yamphonje kuti ikhale yanu ene, natenepo ndinati ndiipereke kuna imwe. Ine ndine MBUYA Mulungu wanu, pontho ndakupambulani pakati pa madzinza anango. 25Natenepo mwathema kusiyanisa mwadidi pakati pa nyama na mbalame zakuchena na zokhonda chena. Lekani kudya nyama penu mbalame zokhonda chena. Ine ndazilonga kuti nsokhonda chena, tenepo mungazidya zinakuchitisani kukhala okhonda chena. 26Imwe munakhala akuchena, pontho munakhala anthu anga ene, thangwi ine ndine MBUYA, pontho ndine wakuchena. Ine ndakupambulani pakati pa madzinza anango, towera mukhale anga ene.

27“Mamuna penu mkazi wakukhumira athema kuphiwa pakuponyerwa miyala; munthu onsene wakuchita penepi apiphesa yekha ene.”

Currently Selected:

LEVITIKO 20: SenaMw

Highlight

Copy

Compare