LEVITIKO 19

Matongero akusiyana-siyana

1MBUYA adapanga Mose 2kulonga kuna dzinza yonsene ya Israele mbati, “Khalani akuchena, thangwi ine, MBUYA Mulungu wanu, ndine wakuchena.#Lev. 11.44, 45; 1Pet. 1.16. 3Munthu onsene athema kulemedza babache na mache, pontho athema kukoya nsiku zakupuma ninga mudakupangirani ine. Ine ndine MBUYA Mulungu wanu.#Kub. 20.8, 12; Deut. 5.12, 16.

4“Lekani kundikhonda mbamupembedza mifanikizo. Lekani kupisasanyira milungu yantove na kuipembedza. Ine ndine MBUYA Mulungu wanu.#Kub. 20.23; 34.17; Lev. 26.1; Deut. 27.15.

5“Mungapha nyama kuti ikhale nsembe yachiphatizano, tewezani mwambo wakupasani ine ule, towera nsembeyo itambirwe. 6Nyama ya nsembeyo ingaphiwa yathema kudyiwa nsiku yonthoyo penu mangwana mwache. Nyama yonsene yakusala kufikirana nsiku yachitatu, yathema kupiswa, 7thangwi iyo njokhonda chena pamaso pa Mulungu, tenepo ngakhala munthu anaidya, ine nkhabe tambira nsembeyo tayu. 8Munthu onsene wakuidyayo anakhala wakudawa, thangwi ya kuyesa chinthu chakupambulika kuna ine ninga chinthu chene pyacho, pontho ine nkhabeve dzamuyesa mbodzi wa anthu anga tayu.

9“Mungavuna mbewu zanu za kumunda, lekani vuna na kufikiratu m'madire, pontho lekani bwererako kaphakalatira.#Lev. 27.15; Deut. 24.19-22. 10Lekani bwerera pontho m'nduli m'mundanu wamfesa kasaka-saka mfesa zakusalira penu kulokotera mfesa zakugwa; penepyo mupilekere anthu akutcherenga pontho na alendo. Ine ndine MBUYA Mulungu wanu.

11“Lekani kuba, kunama, penu kunyengeza mwanzanu.#Kub. 20.15, 16; Deut. 5.19, 20. 12Lekani kudumbira mwakunama na dzinanga; penepi pimbalulupisa dzinanga. Ine ndine MBUYA Mulungu wanu.#Kub. 20.7; Deut. 5.11; Mt. 5.33.

13“Lekani kudyera mwanzanu nkope-kope, penu kumbera. Nsiku yakupagali nyakuphata basa ingakwana, lekani dokerwa napyo pyakupagali pyachepyo kukhonda kumpasa.#Deut. 24.14, 15. 14Lekani temberera dodo, penu kuikha chinthu kutsogolo kwa boli-boli kuti chinamgwegweduse. Ndigopeni, ine ndine MBUYA Mulungu wanu.#Deut. 27.18.

15“Lekani potoza chilungamo pakutonga mwakuyang'ana nkhope anyakutcherenga, penu kugopa anyakufuma.#Kub. 23.6-8; Deut. 16.19. 16Lekani famba-famba na kulonga tsweda, pontho ngakhala munthu ana mseru wakuphiwa nawo, longani umboni wanu ule unakwanisa kumphedza munthu. Ine ndine MBUYA.

17“Lekani kuzonda mwanzanu, mbwenye ngakhala mwasosana chinthu chinango, khaliranani pansi, towera iwe uleke dawa thangwi ya iye.#19.17 towera…iye: penu iwe uleke kumdawira.#Mt. 18.15. 18Lekani bwezera chakuipa kuna mwanzanu, penu kuthimiza kumzonda. Mbwenye mfuneni mwanzanu ninga mumbapifunira imwe mwekha ene. Ine ndine MBUYA.#Mt. 5.43; 19.19; 22.39; Mk. 12.31; Lk. 10.27; Arom. 13.9; Agal. 5.14; Yak. 2.8.

19“Verani matongero anga. Lekani chitisa nyama za mtundu unango kuti zibebese nyama za mtundu unango. Lekani bzala mbewu za mtundu uwiri m'munda ubodzi ene. Lekani vala nguwo zakusasanywa na nguwo ya mitundu iwiri.#Deut. 22.9-11.

20“Ngakhala bitchu wamkazi avunzirwa na munthu unango, pontho kuti nee hadaombolwe penu kusudzulwabi, penepo ngakhala mamuna unango anadza mbagonana naye, onsene awiri atchunyuswe, mbwenye aleke#19.20 onsene…aleke: penu anapivunza-vunza mwadidi mbwenye aleke. phiwa, thangwi iye ndi bitchu. 21Mamunayo athema kudza na bira wamamuna pamsuwo wa Chikhumbi cha Mulungu kukhala nsembe yakupagalira pyakudawa pyache, 22tenepo na nsembeyo nyansembe anachita mwambo wakuchenesa nawo munthu ule kumbulusira pyakudawa pyache, natenepo MBUYA anamulekerera.

23“Mungafika m'dziko ya Kanani mbamubzala nsapo za mtundu na mtundu pyaka pitatu pyakutomapyo, nsapo muziyese zokhonda chena. Pandzidzi wenewu muleke kudya nsapo zache. 24Chaka chachinayicho nsapozo ziperekwe ninga nsembe yakukuza nayo ine,#19.24 yakukuza nayo: penu yakupereka takhuta kuna ine. MBUYA. 25Mbwenye chaka chachishanucho munakwanisa kudya nsapozo. Mungachita pyonsenepi miti yanu inabala nsapo zakuinjipa. Ine ndine MBUYA Mulungu wanu.

26“Lekani kudya nyama uku chiropa chili mwenemo. Lekani kuombedza, penu kuchita pyaufiti.#Kut. 9.4; Lev. 7.26, 27; 17.10-14; Deut. 12.16, 23; 15.23; 18.10. 27Lekani kujemera, penu kuchinga ndevu zanu.#Lev. 21.5; Deut. 14.1. 28Lekani kupicheka-cheka kusintili anyakufa, penu kupilemba nembo mwekha ene. Ine ndine MBUYA.

29“Lekani lulupisa ananu achikazi pakuachitisa kukhala maputa;#19.29 maputa: Akazi enewa akhagumanwa m'nyumba zakupembedzeramo milungu ya Akanani, kule kukhapembedzwa milungu yakubalisa pinthu. Iwo akhakhulupira kuti kugonana na maputa enewa ndiye kukhachitisa kuti minda na pifuyo pyawo pibale pizinji. mungapichita, imwe munazungunukira kuna milungu inango, pontho dziko inadzala na pyakuzuda.#Deut. 23.17. 30Koyani Nsiku Yakupuma, pontho lemedzani mbuto zimbapembedzwa ine. Ine ndine MBUYA.#Lev. 26.2.

31“Lekani vunza nzeru kuna anyakuombedza na anyakukhumira. Mungapichita, munakhala anthu okhonda chena pamaso pa Mulungu. Ine ndine MBUYA Mulungu wanu.#Deut. 18.11; 1Sam. 28.3; 2Maf. 23.4; Yes. 8.19.

32“Godamani pamaso pa anyaimvi, pontho lemedzani akulu. Ndigopeni, ine ndine MBUYA.

33“Lekani kuavuya alendo anakhala na imwe pabodzi m'dziko mwanu.#Kub. 22.21; Deut. 24.17, 18; 27.19. 34Achitireni pinthu ninga mukupichita kuna Aisraele anzanu, pontho afuneni ninga mumbapifunira imwe mwekha ene. Kumbukani kuti imwe nsiku inango mukhalimbo alendo m'dziko ya Iguputo. Ine ndine MBUYA Mulungu wanu.

35“Lekani phatisa basa mdida wakunama kuyeza nawo ulaphi, kulemera penu kuinjipa kwa chinthu.#Deut. 25.13-16; Miy. 20.10; Ezk. 45.10. 36Phatisani basa masikelo akuona, pontho na midida yakuona. Ine ndine MBUYA Mulungu wanu, pontho ndidakubulusani ndine m'dziko ya Iguputo. 37Verani mwambo wanga na matongero anga onsene. Ine ndine MBUYA.”

Currently Selected:

LEVITIKO 19: SenaMw

Highlight

Copy

Compare