E'yo Eceza 1

E’yo eceza Yesu Kristoni

1 # Dan 2:28, 29 E’yo eceza Yesu Kristoni, Mu-nguni fele eri dri e’yo ngapi yi ’yepi mbele ndo ’diyi ecezu ati’ba erini ma tiari; eri pe tini malaika erini vurisi, e’yo nde ecezu ati’bo erini Yohana ma tia; 2#Eceza 6:9eri’i eri nze e’yo Munguni pi ma eti, e’yo nzeza Yesu Kristoni be, ada afa dria erini ndrele ’diyi. 3#Eceza 22:7, 10’Ba e’yo ’diri lapiri pi yi drilebaru, ’ba e’yo ondriza eripi, e’yo sile aleniari ta mbapi ’diyi be; a’disiku ewuniri ogogo.

Kanisa aziri zizu ci ciri

4 # Efu 3:14, 15; Isa 41:4; Eceza 3:1; 4:5; 5:6 Yohana si Asiaa ’diyi vu: ’Yeta anzutiri pi ma ovu emi vu asi anzuru be, engazu ’ba ovupi curu’do indi, azini ovupi andra, azini emupi ndori pi vu, orindi aziri ovupi oguna erini ma drilia ’diyi pie, 5#Isa 55:4; 40:2; Zab 89:27, 37; 130:8; Yoh 18:37; Kol 1:18; Ebra 9:14; Eceza 3:14; 7:14; 19:16Yesu Kristo pie, eri ’ba e’yo eti nzepi adaruri, ’ba tile oko ’ba draza ma eseliari, ’ba opi a’biru nyakua ’diyi ma dri cepiri,

6 # Efu 19:6; Eceza 5:10; 1 Pet 2:5, 9; Isa 61:6 ’Ba ama lepi avasi, ama trupi e’yo onzi amanisi i ma arisiri vu; eri’i ama ’bapi ovuzu opi nyazaniru azini atalau edeta edepi Mungu i ma Ataruri dri ’diyiruri’i; diza pi ma ovu ’eri vu ’dani ’dani e’yo dri cezaniri be. Amena. 7#Dan 7:13; Mat 24:30; Mar 13:26; Luk 21:27; 23:27, 28; 1 Tes 4:17; Zek 12:10-14; Yoh 19:34, 37Mi ne, eri emu iriti be; ’ba dria yi nga eri ndre yi milesi, ’ba ndra eri sopi ’diyi nga eri ndre indi; suru dria nyakua ’diyi nga owu owu eri dri, Ma ovu ’dini, Amena,

8 # Efu 3:14; Eceza 22:13; 4:8; 21:6; Isa 41:4 Ma Alifani azini Omegani, opi Mungu ’yo ra, ’ba ovupi curu’do indi, azini ovupi andra, azini ngapi emupiri, okpo dria ma e’i’i.

Mvi ’bani ndrezu ecetasiri

9Ma Yohana, emi adri, inzata isupi emi be tualu Yesusi, suru pie, asi teza pieri’i, ma ndra angu ilipi yi ma alia omvele Patamo’iria, e’yo Mungunisi azini e’yo eti nzeza Yesunisi. 10Ma ndra Orindi alia o’du Opinisi, te ma eri o’duko amboru ma ngukua, ekile gukanirile 11#Eceza 2:8; 22:13’yozu kini, E’yo mini ndreleri mi si buku alia, mi pe tini kanisa aziri, ’diyi vu; Efeso pi vu, Simurina pie, Peregamo pie, Tuatira pie, Saridisi pie, Filadelefia pie, Laodikia pie.

12Ma oja di ma, o’duko e’yo ’yopi ma beri ndrezu, Ma ka ma oja ’bo, ma ndre talapati meleru aziri, 13#Dan 7:13; 10:5; Eze 1:26; 8:2te talapati nde ’diyi ma eselia ma ndre ’ba alu ekile Mvi ’banile, afa suza supi i ruaa kpere paari, anzuzaru baka melerosi eri ma agatia. 14#Dan 7:9; 10:6; Eceza 2:18; 19:12Drini pi dribi be yi ovu emveru pambale, sile; mileni di aci ma andre drilele, 15#Eze 1:24; 43:2pani ekile mola trile tri ’bale alaru aci droza ma aliarile, o’dukoni ekile yi kakau ma o’dukole. 16#Lip 5:31; Eceza 2:12, 16; 19:15Eri ’du ’bi’bio aziri i ma dri ndisi; sei cizaru si be irileirileri efu eri ma tilia; andretini di ekile etu dipi okposirile.

17 # Isa 44:6; 48:12; Eceza 2:8; 22:13; Dan 8:18; 10:15-19 Ma ka eri ndre ra, ma eco ma va eri ma palaa ekile ’ba avule. Te eri ’ba i dri ndiri ma dria, kini, Mi ru ku, ma ’ba okori’i azini asizuri’i indi, 18ma vini ’ba Idriruri’i; ma dra, ndra ra, te mi ne, ma ovu di idriru kpere ’dani ’dani, azini ma ovu fungua drata pini Pari ’ba drazaniri be ’diyi be. 19#Isa 48:6; Dan 2:29E’yo ’disi mi si ani e’yo mini te ndrele ’diyi pi, e’yo ovupi curu’do indi ’diyi pie, e’yo ngapi yi ’yepi ndo ’diyi pie. 20#Mal 2:7; Dan 2:29E’yo vale ku ’bi’bio aziri mini ndrele ma dri ndiri ma alia ’diyi pini, talapati meleru aziri ’diyi beri eri ’di: ’bi’bio aziri yi malaika kanisa aziri ’diyini, azini talapati aziri yi kanisa aziri ’diyi.

Currently Selected:

E'yo Eceza 1: LB66

Highlight

Compare

Copy