E'yo O'beza 7

Lokiri oku mile aci berini

1Ma mvi la, mi bi e’yo mani ’yole ’diyi, mi mba azita mani ’diyi ma ta mi vu ci;

2 # Lev 18:5; O’be 4:4; Isa 55:3; Azi 32:10 mi bi e’yo mani azile ’diyi, mi ovu di idriru ani, mi mba azita mani ma ta ekile mileefi minile;

3 # Azi 6:8; O’be 3:3; Isa 30:8; Yer 17:1; 2 Kor 3:3 mi ombe yi drianzi mini ma ruaa, mi si yi karatasi mi asiari ma dria.

4Mi ’yo ondua ma tia, Mi ma amvi’i; mi ’da e’yo vaza ma ru mi amviazi’i;

5yi ma mba mi ma ta oku saarurisi, oku mile aciru ’ba inzupi lokirisirisi indi.

6A’disiku mani pa soria ma vile joa derisa vualeru, ma lu amve derisa talaasi,

7 # O’be 6:32 azini ma ndre ’ba ondua kokoru ’diyi ma eselia, ma ama karile ma eselia karilau ovupi e’yo vaza kokoruri

8erini agaria geria oku nde vile aperitiasi ogogo, erini firia geri mupi eri vile joarisi

9 # Yob 24:15 omuneritisi, ondreni, angu bizasi, ini be.

10 # 1 Tim 2:9 Te ma ndre, oku nga efu dri fu oku nde osu i awuoule, eri ma asia lokiri ga tre.

11 # 1 Tim 5:13; Tit 2:5 Eri e’yo o’yo o’duko urusi afuru, eri ’ye ini lelerile, nduniri rini va i vile akua ku;

12etu azinisi eri geria, azinisi eri cuua, azinisi eri ’ba te geri aritiasi dria.

13Geri ’disi eri bi eri, eri o’de eri ombelekoa zitasi, eri ’yo mileacisi drinza kokoru tinia kini:

14Edeta asi anzuruni ovu te ma vu ci, andru ma fe afa mani oyoni soleri ’bo;

15e’yo ’disi ma efu te lezu dri fuzu mi be, mi mile gazu asi driasi; ma isu di mi ’do.

16 # Isa 19:9 Ma aja bongo cale wura be korikoriru ’diyi pari mani lazuri ma dria, yi bongo cale pamba Misiriarisi’diyi;

17ma ’ba afa arikariru gbolo manili ma dria ’bo, odu arikariruri pie, ojo nzoru pie, pari madalasiniruri ma o’boroko pie.

18Ama emu, ama ma tra alesi de nga etu efuni ku; ama ma ovu di ayikosi ama eselea letasi.

19A’disiku agupi mani ovuni akua ku; eri mu aci izurua;

20eri ji silingi jurua alia i be indi; eri nga emvi akua mba emvesi ndo.

21Erini e’yo ’yole aluzaru kakaurisi,eri ewi eri ma bile; eri omi eri inzita lokiriru i ma tiliarisi.

22Eri bi eri ma vuti coti, ekile monio ’bani jile so sorile, ekile ova embani bile ra

23de nga ’ye soni asini kurile; ekile aria sapi mbele ese vurile; te eri nini kini eri ovu idri ini bizuri ku.

24E’yo ’disi, anzi mani la, emi co di bile ma vu fo, i emi eri e’yo efupi ma tilia ’diyi e’yere.

25Mi asi ma fe dri geri erinirialeru ku, mi fe mi abazu leti eriniri ma alia ku indi;

26 # Neh 13:26 a’disiku eri o’be ’ba erini ofule ’diyi va kakau ’bo; ada, ’ba dria erini ofule kai kai ’diyi yi o’biru.

27 # O’be 2:18; 1 Kor 6:9, 10; Ebra 13:4; Eceza 22:15 Jo eriniri ovu geri muzu Pari ’ba drazaniria, sizu va dra vile joari’i.

Popular Bible Verses from E'yo O'beza 7