E'yo O'beza 27
27
1 #
Yak 4:13-16; Luk 12:19 Mi ovu afusi e’yo drusirisi ku, mini e’yo ngapi efupi o’du alu ma aliari nile kurisi.
2Mi ku ’ba azini ma inzi mini, mi ngulupi ma ti ma inzi mini ku; ’ba omururi ma inzi mini, mi tile ma inzi mini ku.
3 #
Esi 1:12
Oniri nzizaru, azini cinya nzi nzi indi, te ’ba ondua kokoruri ma adra nde yi iritro nzizasi ra.
4 #
1 Yoh 3:12
Adra ma yiki yo, azini aoko eri vini etatani; te a’di eco pa sozaru a’ya ma aliani ya?
5 #
Gal 2:14
’Bani egazu ’ba dria mgboruri eri onyiru aga ’bani ’ba lezu ndindiruri ra.
6Agyini adri ebi ’ba ’ba ruaa asi basi, te ari’boni adri ’ba o’de dika dika.
7’Ba trapi huruhururi leni anyuoso ku, te ’ba abirini fule kairi dri afa draza okangalikaru ’diyi dria alu alu.
8 #
Yob 39:14
’Ba i ma pari kupi abapi abari si ekile aria jorovu ini kupirile.
9Odu efiza pi odu aji be aluzaruri be, yi ayiko fe ’ba ma asia; agu ma agyi e’yo amaza onyiru fepiri eri alu agu nderi dri ’dinile.
10Mi ku mi agyi azini mi ati ma agyi ku; azini mi mu mi adripi vile akua o’du candi amboruni ecazu mi vurisi ku. ’Ba ma agyi ovupi ogogori eri onyiru aga adripi ovupi ziriri ra,
11 #
Zab 119:42
Mva mani, mi ma ovu onduaru, mi fe di ma asi ma ovu ayikosi fo, ma ma omvi e’yo ’ba ma o’dapiri ma tia ani.
12 #
Isa 32:2
’Ba e’yo egapi e’yo vazasiri adri e’yo onzi ndre ra, nga i zi ani ra; te ’ba e’yo vaza kokoruri ini aga drile ’dani, eri nga ani candi isu ra.
13’Ba ka le afa fe toboru juru ma paria, mi ma ’du bongo ’ba nderini, mi fe ’ba nde afa toboru fepi jurusiri ma de oyo ini soleri ma e’yo ra.
14 #
Zab 12:2
’Ba engapi o’biti drio drio asi ndriza fepi i agyi dri o’duko urusiri, ’ba nga e’yoni la eri dri ekile ’ba trizale.
15Ozoo oyipi zu o’du ozooni ’dizu turiari azini oku e’yo o’yopi kurukuru zuri be yi si yi si si;
16’ba lepi eri ogapiri oga olini, azini eri ma dri adari nga eri bi nzola ekile odule.
17Aya pi yi si eji i agyi be; agu pi yi yi eji i agyi be ’dinile.
18 #
Azi 20:6; 1 Opi 11:8; O’be 12:24; 1 Kor 3:8 ’Ba elio pati ma agei tepiri nga efini nya ra, azini ’ba opi ini ma agei tepiri nga ovu inzizaru.
19Ekile yi alioni fele agu ma mileni endrelerile, asi ’banini fe agyi ma asini endre ’dinile.
20 #
O’be 30:15, 16; Hab 2:5 Pari ’ba drazaniri pi Abadoni be trani ku, azini ’ba ma mile trani vini ku.
21Okalamvu ovu dahabu o’bizu, azini aci ’ba oka dipirini ovu mele o’bizu, te yi adri agu o’bi inzita erini vusi.
22Mi ka ’ba ondua kokoruri pi patisi anya be tualu afa anya sizuri ma alia ti, onduaako eriniri ngani eri ku ku.
23Mi ndre kabilo mini ma e’yo asi alusi, mi te vini ti mini ma agei asi driasi indi;
24a’disiku lonyi ovuni ’dani ku; oku opiniri nga adri a’bianzi vusi ’dani ra ya?
25’Ba omvu ase vole ’bori ra, azini ase o’diru idu ra, ’ba oku vini ebiko oni ruaari indi.
26Kabiloanzi nga mini afa suza feni, ndri pisi yi adri ani amvu je;
27ndri lesu nga dri fu mi dri nyakaru ’ba mi vile akua ’diyi be ra; eri vini nga ovu idri ezoanzi mini ’diyi dri indio
Bible in Lugbara © United Bible Societies, 1966.