E'yo O'beza 20
20
1 #
E’do 9:21; Isa 28:7 Patiefi su eri agu edematara beri’i, ewa eri agu awata awapi turi’i, ’ba ezapi afa nde ’diyisiri onduani yo.
2Adra opiniri si ekile kami ma awule; ’ba fepi aoko erini ma enga rari eza i ma ngulupi ma idrini.
3 #
E’do 13:7
’Ba ka i gbu ndu awata lezu ku, ’di ’ba nde dri inzitani, te ’ba ondua kokoru ’diyi dria yi adri yi awa awa.
4Ovuou ngani amvu ’ya ewu egbenirisi ku; e’yo ’disi eri nga afa ndru ewu anya lozurisi, te ngani afa isu ku.
5E’yo otule ’ba ma asiari eri yi alirule, te ’ba e’yo vaza beri nga yi eko alenia.
6 #
Mat 6:2; Zab 12:1; Ekl 7:28; Yer 5:1; Luk 18:8 Tuni ’ba kakauni nga yi ma ngulupi ma yiki ma e’yo oluni, te a’di eco ’ba asi ada beri isuzaruni ya?
7’Ba kililiru acipi e’yo kililiru iniri vusirianzi erini nga ovu drilebaru eri ma vutisi!
8Opi ripi oguŋa e’yo lizani ma mi eri e’yo onzi dria ndri i milesi anyadrilekole,
9 #
Yob 14:4; Ekl 7:20; 1 Yoh 1:8 A’di eco ’yozaru, Ma ’ba ma asi alaru ra; ma di alatararu, e’yo onzi mani yo-’dinini ya?
10Oni afa ma nziza o’bizu ndu ndu ’diyi, okelea ndu ndu ’dinile ’diyi be, yi iritro afa Yehovani ngule onziri.
11 #
Mat 7:16
Ka ovu mvani ti, eri fe i nizu ’yeta ini ’diyisi, kani e’yo erini ’yeleri ovu ’yeke, kani kililiru yani.
12 #
Efu 4:11; Rum 11:36 Bile e’yo eripiri, mile afa ndrepiri be, Yehova ’ba yi iritroni.
13 #
Rum 12:11
O’du koza ma va mi tu ku, mi kazu ecazu alioru ku; mi zi mi mile, mi nga tra enyasi ani.
14’Ba afa jepiri ’yo kini, ’Di afa tokoni, ’di afa tokoni; te ka di mu i ma ’bo, eri ovu afusi afa nderisi.
15Mele indi, azini nyoro ekaru o’biru; te tile onduaruri nyoro ajeambosirile.
16’Ba ka le afa fe toboru juru ma paria, mi ma ’du bongo ’ba nderini, mi fe ’ba nde afa toboru fepi jurusiri ma de oyo ini soleri ma e’yo ra.
17Enya inzoniri alu ’ba dri alu alu, te vilerisi ’ba nde ma tileni nga ga oparafisi tre.
18E’yo ’bani otule ’diyi yi pa so e’yo amazasi; mini ’yeria omba ’baria, mi ’ye dri ceza onduarurisi.
19’Ba acipi ’ba azini esupiri eri e’yo zizaru e’da’i; e’yo ’disi mi eci mi agu tile azipi e’yo ’yopi turi be ku.
20 #
Efu 21:17; Lev 20:9; Mat 15:4; Rum 3:23 ’Ba i ma ati pi tripi andri beri, yi nga eri ma tala inyu angu biza iniciciruria.
21 #
O’be 28:8; Hab 2:6 Awuruso a’ile mbelekocici e’doriari, asizaniri drileba kokoru.
22 #
Azi 32:35; Rum 12:17; 1 Pet 3:9 Mi ’yo, Ma nga e’yo onzi ma aroti ofe ma’i-’dinini ku; mi ma te Yehovani, eri nga mi pani.
23Oni afa ma nziza o’bizu ndu ndu ’diyi yi afa Yehovani ngule onziri, afa afa o’bizu lokirisi ’diyi yi onyiru yo.
24 #
Yer 10:23; Rum 8:26 Acita ’bani enga Yehova vu; ka’dini agu eco i ma geri vazaru ngoni ngoni ya?
25’Ba ka ’yo mbele egata kokoru, Eri alatararu; te ka oyo so de ’bo, eri di mu e’yo ma eti nda vilerisi, e’yoni nga eri bi ra.
26Opi onduaruri eri ’ba onzi ’diyi ndri anyadrilekole, eri yi odi oni anya dizurisi.
27Orindi ’baniri eri tala Yehovani, eri ’ba ma asi alialeruri ndru teketeke dria.
28Yiki pi mba opi ma tani e’yo adaruri be; oguna eriniri so pa okporu yikisi.
29’Ba karileru ’diyi ma diza eri yi ma okponi; ’ba dezaru ’diyi ma ndriza eri ozoforo yi ma driari.
30Ebi kaliniri adri e’yo onzi ojini; cotani adri ’ba ma asi alialeruri oji indi.
Bible in Lugbara © United Bible Societies, 1966.