E'yo O'beza 16
16
E’yo o’beza adriza ’bani ma e’yosi ’diyi
1 #
Mat 10:19
E’yo otuza asini yi ’bani, te omvita andresiri enga Yehova vu.
2 #
1 Sam 16:7; Dan 5:27 Geri aguni ’diyi dria alaru eri ma ngulupi ma milia, te Yehovani orindi ’bani o’bini.
3Mi ku ’yeta mini ’yele ’diyi Yehova dri, azini eri nga fe e’yo mini otule ’diyi ma ’ye yi ra.
4 #
Isa 43:7; Rum 11:36; Yob 21:30; Rum 9:22 Yehova o’ba afa dria ekile erini otule i ma asiarile; adaru eri ’ba ’ba onzi ’diyi cazu o’du onziri ma tia.
5’Ba dria asi be afuru ’diyi yi afa Yehovani ngule onziri; ndi ndi yi ngani ece panga isukokoru ku.
6 #
Dan 4:27; Luk 11:41 E’yo onzi ovu wuzaru yiki pisi E e’yo ada be, azini ruta Yehovani ruzurisi ’ba yi yi ona e’yo onzisi ona ona.
7 #
Kol 1:10
Geri ’bani ka ovu onyiru Yehova ma milia, eri fe ari’ba ’ba ndeni ’diyi ma ngulupi ovu asi anzurusi eri be.
8Afa were e’yo cililiruri beri ovu onyiru aga lonyi amboru e’yo kililiru kuri beri ra.
9 #
Yer 10:23
’Ba ma asini geri ini otuni, te Yehovani aci erini acizuri ma dri ceni.
10E’yo liza adaruri eri opi ma tilea ti erini ngani eza e’yo liria ku.
11 #
Lev 19:36
Ratili afa ma nziza o’bipi kililiru ’diyi yi Yehovani; oni nziza dria jurua alia ’diyi yi erini.
12Azi onzi ’yezu ovu ’ba opiru ’diyi ma milia afa onzikanyarurile, a’disiku ogunani pa so e’yo onyirurisi.
13Tile e’yo kililiru ’yopi ’diyi yi ovu ayikoru opi dri, eri adri ’ba e’yo ’yopi onyiru ’diyi le tu.
14Aoko opiniri ekile dra ma ojiole, te ’ba onduaruri nga fe e’yoniri ma ambini.
15Mile ala opiniria idri indi, azini asi ndriza eriniri ovu ekile iriti fepi ozoo ewadrisinirini ’dizurile.
16Ondua isuzuri onyiru aga mele isuzuri ra ’doni! Ada ’ba ma pe e’yo vaza isuzu’i aga dahabu ra.
17 #
O’be 4:24-27; Isa 35:8; ’Yeta 24:16 ’Ba kililiruri ma gbokoni i ona e’yo onzisi ona; ’ba i ma geri bipi kilili ’daniri eri i ma idri ma ta mba ra.
18Afuni fe ’bani dri jani, asi afuruni fe ’bani e’de vani.
19Eri ovu onyiru ovuzu asi e’yere be ’ba alioru ’diyi be tualu aga afa opale ombaari awazu ’ba afuru ’diyi beri ra.
20 #
Isa 30:18
’Ba e’yo eripiri nga onyi isu ra, ’ba asi ’bapi Yehova ma driari eri ayiko beni.
21Yi nga ’ba asia ondua beri omve ’ba e’yo egapi e’yo vaza beri e’yo ’yoza tilea aluzaruri fe onitani i ereni.
22E’yo vaza ovu yi a’di idrini egapi egari e’ini dri, te panga ’ba ondua kokoru ’diyini eri onduaakoni.
23 #
Mat 12:34
’Ba ondua beri ma asi imba ngulupi ma ti e’yo ’yozu, eri o’ba nita i ma tilea.
24E’yo ’yole ayiko fepi ’diyi ovu ekile anyu anyusoro berile, yi aluzaru orindi dri, eri rua ala feni.
25 #
O’be 14:12
Geri indi ovupi onyiru ’ba ma miliari, te asizaniri geri dratani.
26Abiri ’ba azi ngapirini nga azi eri drini; a’disiku tile eriniri eri omini.
27’Ba tokoni e’yo onzi otumi, eri ma tilea afa ekile aci afa evepirileri ci.
28’Ba ambo beri agata gaza ereni, ’ba ’ba ndropi oyokolosiri ’ba agyiru tu ’diyi ma esele co ra.
29’Ba ’ba ’yepi eganasiri i ma agyi ma bile ewi, eri ce eri ma dri geri ovupi onyiru kuri ma alia.
30’Ba i ma mile bipi ciri bi i mile e’yo dri fupi kuri otuzu, ’ba i ma ti nzupi ciri fe e’yo onzini i ’ye ra.
31Ozoforo eri oku dizani ’ba driari; ’ba nga eri isu adriza kililiruri ma alia.
32’Ba aoko ’bapi mbele kuri nde ’ba okporuri onyisi ra, te ’ba i ma orindi dri cepiri aga vini ’ba aku ndepi ombasiri ra.
33’Ba yi odrisi ’be afa awazu, te e’yo lizaniri dria enga Yehova vu.
Bible in Lugbara © United Bible Societies, 1966.