Kalafe 8
8
Aronini tala o’izuri
1 #
Efu 25:31-40; 37:17-24 Yehova nga di ’yo Musa ma tia, kini, 2#Efu 40:25; Lev 24:1, 2; Zab 119:105; Isa 8:20; Mat 5:14; Yoh 1:9; 8:12Mi olu Aroni ma tia, mi ’yo tinia, Mi ka tala ’i ra, tala aziri ma di tala pati ma drilia. 3Aroni nga di ’ye ’dinile; eri talani ra, diza fezu ani tala pati ma drilia beni, Yehovani azile Musa ma tiarile. 4#Efu 25:31, 18, 40Tala pati ma edezari ’dini, ede eri mele dile dirisi kpere etinialeru trua funialeru, di eri di di, ekile eceta Yehovani ecele Musa dri ’borile, yi ede eri ’dinile.
’Ba Levini ’bazu alaru
5Yehova ’yo Musa ma tia kini, 6#Zab 26:6; Isa 52:11; Ebra 7:26; 10:22Mi ope ’ba Levini anzi Israelini ma eselia, mi ’ba yi alaru. 7#Lev 14:8, 9Geri mini ngazu yi ’bazu alaruri ’di: mi ma oya yi e’yo onzi wuzuri yi ma dria, yi ma fa ’biko yi ma ruaa ’diyi dria, ma oji vini yi ma bongo yi ma ngulupi ’bazu alaru. 8#Lev 2:1Yi ma ’du di monio aluduru, edeta erini anyafurasiri be, anyafura inikiniru osale odusiri’i, mi ma ’du vini monio azini edeta e’yo onzi edezuriru indio 9#Efu 29:4; 40:12; Lev 8:3Mi nga ’ba Levini ji fe e’dazu hema ti ecizaniri ma drilia; mi nga anzi Israelini ongulumuru ’diyi oku dria. 10#Lev 1:4Mi nga ’ba Levini ji fe e’dazu Yehova ma milia, anzi Israelini nga di yi ma dri o’ba ’ba Levini ma dria. 11Aroni nga di ’ba Levini fe Yehova ma milia edeta oyale oyariru anzi Israelini ma paria, yi ma ovu ’ba azi Yehovani ngapi ’diyiru beni. 12#Efu 29:10; Lev 1:4; 8:14’Ba Levini nga yi ma dri o’ba monio ’diyi ma dria; mi nga ani aluri fe edeta e’yo onzi edezuriru, aziniri edeta vezaruriru Yehova ma drilia, ’ba Levini ma e’yo onzi edezu, 13Mi nga ’ba Levini ’ba Aroni pi ma milia anzipi be, nga yi fe Yehova dri edeta oyale oyariru. 14#Kal 3:45; 16:9; Mal 3:17Mi nga ’ba Levini ma esele co anzi Israelini be ndu ’dinile; ’ba Levini ’diyi nga ovu mani. 15#Efu 29:24Mi nga ’ba Levini ’ba alaru yi ofezu, edeta oyale oyariru raka, yi nga di fi hema ti ecizaniri ma azi ngazu ndo, 16#Kal 3:12, 45A’disiku fe yi pi tuke ma dri anzi Israelini ma eselia; ma o’du yi maniru, anzi dria opojo ma ti zipi, ada anzi Israelini dria ma anzi otile oko ’diyi ma paria. 17#Efu 13:2, 12-15; Luk 2:23; Kal 3:13Te Israeli anzipi ma anzi otile oko ’diyi yi dria mani, ada ’ba piyi ma anzi anyapa be; o’du ndra mani anzi otile oko angu Misiriaria ’diyi ofuzurisi ma ope ndra yi ndu ma ngulupiniru. 18Te ma ope ’ba Levini anzi otile oko ’diyi ma paria Israeli anzipi ma eselia ’bo. 19#Kal 3:9; 18:2-6; 1:53; 16:46; 18:5Ma fe vini ’ba Levini afa fezale Aroni pi dri anzipi be anzi Israelini ma eselia, anzi Israelini ’diyi ma azi ngazu hema ti ecizaniria, azini Israeli anzipi ma e’yo onzi edezu, azo muaru kazu ovuzu ani Israeli anzipi ma eselia ku beni, Israeli anzipini ngaria esiria pari alatararuri vu ogogoria. 20Musa pi nga di ’ye ’ba Levini vu ’dini Aroni pie, ’ba Israelini pie dria, ekile e’yo dria Yehovani azile Musa dri ’ba Levini ma e’yosirile, anzi Israelini ’ye e’yo nde yi vu ’dinile trotro, 21#Rum 15:16’Ba Levini ’ba di yi alaru onzi ma e’yosi, oji vini yi ma bongo ra; Aroni ofe di yi edeta oyale oyariru Yehova ma milia, Aroni ede edeta e’yo onzi edezu, yi ’bazu alaru ra. 22#2 Sur 30:15; 31:2’Di ma vutia ’ba Levini nga di fi azi ngazu hema ti ecizaniria Aroni pi ma drilia anzipi be ndo, ekile Yehovani e’yo azile Musa tia ’ba Levini ma e’yosirile, yi ’ye yi vu ’dinile trotro. 23Yehova nga di ’yo Musa ma tia kini, 24#Kal 4:3; 1 Sur 23:3; 24:27’Ba Levini ma e’yo eri ’di e’dozu ’ba capi eli be kali iri drini towi ’diyisi, muzu drile, yi ma fi azi ngaza hema ti ecizaniriari ma azi okporuri ’yezu; 25te ’ba capi eli be kali towi ’diyi nga ku fizu azi nde ngazu ja, ngani asi azi okporuri ’ye dika ku, 26#Kal 1:53; 1 Sur 23:28-32; 26:20-29; Eze 44:8, 11te yi nga azi nga yi adripi be tualu hema ti ecizaniri ma alia azi inzitaniri ma agei tezu, te ma nga azi okporuri ku. Mi ma ’ye ’ba Levini vu ’dini, e’yo azile yi dri ’diyi ma e’yosi.
Currently Selected:
Kalafe 8: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
